विराटनगर। विराटनगर महानगरपालिका वडा नं ४ र ५ मा पर्ने जामुनगाछी–केसलिया हुलाकी सडक आगामी फागुनभित्र कालोपत्र गरिसक्ने निर्माण व्यवसायीले प्रतिबद्धता जनाएका छन् । विराटनगर महानगरपालिकाका मेयर नागेश कोइरालाको पहल र मोरङका प्रमुख जिल्ला अधिकारी प्रेमप्रसाद भट्टराईको समन्वयमा मंगलवार स्थानीयवासी, निर्माण व्यवसायी र हुलाकी सडक आयोजना प्रमुखसहितको छलफलमा निर्माण व्यवसायी वासु उप्रेतीले फागुनभित्र कालोपत्र गरिसक्ने प्रतिबद्धता व्यक्त गरेका हुन् । 

लामो समयदेखि सो सडकको निर्माण अलपत्र छाडेर निर्माण व्यवसायी सम्पर्कविहीन भएपछि स्थानीयले सास्ती खेप्दै आएका थिए । स्थानीयले पटक–पटक महानगरपालिका र जिल्ला प्रशासनको सहयोग मागेका थिए । आवतजावतमा समस्या भएको भन्दै स्थानीयले बाँससमेत तेस्र्याएर विरोध जनाउँदै आएका थिए । 

महानगरको सभाहलमा भएको छलफलमा निर्माण व्यवसायी उप्रेतीले बुधवारदेखि नै काम सुचारु गर्ने बताए । महानगरका मेयर कोइराला, उपमेयर शिल्पा निराला कार्की, प्रजिअ भट्टराई, हुलाकी सडक आयोजनाका प्रमुख युवराज पोखरेल, जिल्ला प्रहरी कार्यालय मोरङका प्रमुख एसपी नवराज कार्की, निर्माण व्यवसायी उप्रेती र स्थानीयवासीबीच भएको छलफलबाट निर्माणलाई तीव्रता दिने निर्णय गरिएको छ । दशैंअगाडि सडकका सबै खाल्डाखुल्डी पुरिसक्ने र तोकिएको मितिअगावै निर्माण सम्पन्न गरी हस्तान्तरण गर्ने निर्णय गरिएको मेयर कोइरालाले बताए । 

यसैगरी धुदुवा पैनीको प्राकृतिक निकासका लागि कल्भर्ट बनाउने निर्णय भएको छ । विराटनगर–५ स्थित गणेशचोकदेखि केसलिया पुलसम्मको ३ दशमलव १९५ किलोमिटर सो सडक आगामी असार मसान्तभित्र निर्माण सक्नुपर्ने सम्झौतामा उल्लेख छ । २०७८ माघ २ गते ठेक्का सम्झौता भए पनि तोकिएको मितिमा निर्माण सम्पन्न नभएपछि दुईपटक म्याद थपिसकिएको छ । सो सडक निर्माण सम्पन्न गर्न भ्याटसहित रू. १७ करोडमा ठेक्का लागेको थियो ।