काठमाडौं ।  सूचीकृत १५ फाइनान्स कम्पनीहरुमध्ये सर्वाधिक शेयर मूल्य भएको कम्पनी नेपाल फाइनान्स कम्पनी रहेको छ । यस कम्पनीको पछिल्लो शेयर मूल्य प्रतिकित्ता रू. २ हजार १५४ पुगेको छ । कम्पनीको शेयर मूल्य हालसम्मकै उच्च विन्दुमा पुगेको हो । बजार उकालो लाग्न शुरु हुुनुभन्दा अगाडि असार १६ गतेको शेयर मूल्य र पछिल्लो कारोबार दिन साउन १७ गतेको शेयर मूल्यसँग तुलनामा गर्दा यस फाइनान्सको शेयर मूल्य सर्वाधिक वृद्धि भएको छ ।

असार १६ गते यस कम्पनीको शेयर मूल्य प्रतिकित्ता रू. ९७०  थियो । एक महीना अवधिमा  कम्पनीको शेयर मूल्य १ हजार १८४ रुपैयाँले वृद्धि भएको छ । आइतवार कम्पनीले गत आवको चौथो त्रैमासिक वित्तीय विवरण सार्वजनिक गरेको छ । उक्त वित्तीय विवरण अनुसार कम्पनीको प्रतिशेयर आम्दानी २ रुपैयाँ ४८ पैसा छ भने वितरणयोग्य नाफा रू. २० करोड ८२ लाख ऋणात्मक छ ।

यस आधारमा कम्पनीले शेयरधनीलाई लाभांश वितरण गर्न सक्दैन । तर कम्पनीको शेयर मूल्य  दोस्रो बजारमा यस कम्पनीको शेयर मूल्य अस्वभाविक वृद्धि भएको छ । वित्तीय अवस्था नाजुक भएका कम्पनीको शेयर मूल्य अस्वभाविक बढ्दा लगानी जोखिममा हुने जानकारहरु बताउँछन् । लगानी गर्नु पूर्व कम्पनीको वित्तीय विवरण राम्रो सँग अध्ययन गर्नुपर्ने उनीहरुको भनाई छ ।  

शेयर बजारमा माग र आपूर्तिका कारण मूल्य निर्धारण हुने भएकाले आपूर्ति कम हुँदासाथ त्यो कम्पनीको शेयर मूल्यमा माग उच्च भई शेयर मूल्य बढेको एक लगानीकर्ताले बताए ।  सोही कारण पनि पछिल्लो समय अधिकांश कम शेयर सख्या भएका कम्पनीको शेयर मूल्य उच्चदरले वृद्धि भएको देखिन्छ । 

पछिल्लो पटक नेपाल फाइनान्सले  आर्थिक वर्ष २०६७/६८ मा २२ प्रतिशत बोनस शेयर र १ दशमलव १६ प्रतिशत नगद लाभांश वितरण गरेको थियो । 
शेयर मूल्य बढ्ने दोस्रोमा प्रोग्रेशिभ फाइनान्सको शेयर मूल्य असार १६ गते पछि २ सय ५३ रुपैयाँ ३ पैसा बढेको छ । यस कम्पनीको शेयर मूल्य असार १६ मा प्रतिकित्ता रू. ४०४ रहेकोमा पछिल्लो कारोबार दिन साउन १७ गते रू. ६५७ दशमलव ३ पुगेको छ । सूचीकृत सबै फाइनान्सको कम्पनीको शेयर मूल्य भएको छ ।  कम बढ्नेमा पोखरा फाइनान्सको ७२ रुपैयाँ ६ पैसा बढेको छ  । यस कम्पनीको शेयर मूल्य असार १६ मा प्रतिकित्ता रू. ६०३ रहेकोमा पछिल्लो कारोबार दिन साउन १७ गते बढेर रू. ६७५ दशमलव ६ पैसा पुगेको हो । 

असार १६ मा सूचीकृत १५ फाइनान्स कम्पनीहरुमध्ये सात कम्पनीको शेयर मूल्य ५ सय भन्दा कम  थियो । वेष्ट फाइनान्स,श्री इन्भेष्टमेन्ट एण्ड फाइनान्स,सेन्ट्रल फाइनान्स,समृद्धि फाइनान्स,गुहेश्वरी मर्चेण्ट,रिलायन्स फाइनान्स र प्रोग्रेशिभ फाइनान्सको शेयर मूल्य ५ सय मुनि थियो । तर अहिले यीमध्ये रिलायन्स फाइनान्सको शेयर मूल्य प्रतिकित्ता रू. ५७० छ भने बाँकी सबै कम्पनीको शेयर मूल्य ६ सय भन्दा माथि पुगेको छ ।  

सूचीकृत १५ फाइनान्स कम्पनीहरुको शेयर मूल्य

कम्पनीको नाम	शेयर मूल्य रू.		शेयर मूल्य वृद्धि रू.
	साउन १७ गते	असार १६ गते
नेपाल फाइनान्स	2154	970	1184
प्रोग्रेशिभ फाइनान्स	657.3	404	253.3
मञ्जुश्री फाइनान्स	768	530.1	237.9
समृद्धि फाइनान्स	670	437	233
गोर्खाज फाइनान्स	931	700	231
श्री इन्भेष्टमेन्ट फाइनान्स	686	457.4	228.6
गुडवील फाइनान्स	812	588	224
गुहेश्वरी मर्चेण्ट बैंक एण्ड फाइनान्स	655	431.4	223.6
सेन्ट्रल फाइनान्स	675	452	223
जानकी फाइनान्स	815	596	219
आइएसीएफसी फाइनान्स	767	559	208
मल्टीपर्पस फाइनान्स	675	510	165
वेष्ट फाइनान्स	632.5	470	162.5
रिलायन्स फाइनान्स	570	427.7	142.3
पोखरा फाइनान्स	675.6	603	72.6

स्रोत: नेप्से