इन्टरनेसनल डेभलपमेन्ट बैङ्क विशेष :अहिले शेयर किन्न उपयुक्त देखिन्छ

नारायणप्रसाद घिमिरे
वित्तीय विश्लेषक, नागरिक लगानी कोष

असोज १४ गतेदेखि इन्टरनेसनल डेभलपमेन्ट बैङ्कको रू. १९ करोड २० लाखबराबरको प्राथमिक शेयर निष्कासन खुला गर्ने तयारी गरेका छौं । यसका लागि नागरिक लगानी कोष र एनसीएम मर्चेण्ट बैङ्किङ लि दुवैले विक्री प्रबन्धक तथा शेयर प्रत्याभूतिकर्ताको जिम्मेवारी पाएका छौं । कुल निष्कासनको ५० प्रतिशत रकम (रू. ९ करोड ६० लाख) बराबरको शेयर प्रत्याभूत (अण्डरराइटिङ) गर्नुपर्ने नियमअनुसार रू. १ करोड ६० लाखको एनसीएमले र बाँकी रू. ८ करोडको हामी (नागरिक लगानी कोष)ले प्रत्याभूति गरेका छौं ।

विक्री प्रबन्धक तथा शेयर प्रत्याभूतिकर्ताका लागि सम्झौता गर्नुअघि बैङ्कको वित्तीय अवस्थाको अध्ययन गरेका थियौं । आव २०६८/६९ को अन्त्यमा रू. ४४ करोड ८० लाख चुक्ता पूँजी रहेको यो बैङ्कको खुद मुनाफा रू. ५ करोड छ । अहिले धेरै चुक्ता पूँजी हुने वाणिज्य बैङ्कहरूको मुनाफा पनि रू. ४/५ करोडको हाराहारीमै देखिन्छ । त्यसका आधारमा यो बैङ्कको मुनाफालाई राम्रो मान्नुपर्छ । गत आवको अन्त्यमा बैङ्कका महत्वपूर्ण वित्तीय परिसूचक तथा अन्य आधारभूत पक्ष सकारात्मक नै देखिएका छन् ।

बैङ्कको वर्तमान वित्तीय अवस्था हेर्दा विगतका वर्षहरूको नाफाबाटै बैङ्कले १० देखि १२ प्रतिशतसम्म नगद लाभांश दिन सक्ने देखिन्छ । अहिले बैङ्कहरूले निक्षेपमा ब्याजदर घटाउँदै गएको अवस्था छ । यो अवस्थामा उचित प्रतिफल प्राप्त गर्न यो बैङ्कको शेयर किन्नु उपयुक्त देखिन्छ । प्राथमिक निष्कासनपछि नेप्सेमा सूचीकरण हुँदा यो बैङ्कको प्रतिशेयर मूल्य रू. १ सय २५ देखि १ सय ३० सम्म कायम हुने देखिन्छ ।

शेयर विक्रीका लागि काठमाडौं उपत्यकाभित्र तथा बाहिरका समेत विभिन्न जिल्लाहरूमा अन्तरक्रिया कार्यक्रम (प्रचारप्रसार) सञ्चालन गरिसकेका छौं । सो क्रममा उपत्यकाबाहिरका धेरै लगानीकर्ताले शेयर खरीद गर्ने इच्छा देखाएको पाएका छौं । तीमध्ये पनि धरान, विराटनगर, पोखरा, बुटवल र वालिङजस्ता ठाउँमा धेरै शेयर किन्ने प्रतिबद्धता पाएका छौं । लगानीकर्ताको सुविधाका लागि पाँचै विकासक्षेत्रमा ५८ ओटा आवेदन सङ्कलन केन्द्र स्थापना गरेका छौं ।