जनकपुर बसपार्कमा फोहोर थुप्रिँदै

सौरभ यादव जनकपुरधाम । जनकपुरको मुख्य बसपार्क क्षेत्रमा फोहोर व्यवस्थापन नहुँदा दुर्गन्धित बन्दै गएको छ । केन्द्रीय गुठी संस्थानसँग सम्झौता गरी ४ बिघामा निर्माण गरिएको नयाँ बसपार्कमा फोहोर र दुर्गन्धले यात्रुहरूलाई असहज बनाएको छ । दैनिक हजारौं यात्रु आवतजावत गर्ने बसपार्कभित्र बनाइएको शौचालय खण्डहरमा परिणत भएको छ । बसपार्कभित्र रहेका दुई शौचालयमध्ये एउटा प्रयोगविहीन छ भने अर्को शौचालयको सरसफाइ हुने गरेको छैन । जनकपुरधाममा लामो र छोटो दूरी यात्रा तय गर्न बसपार्क आउने जाने यात्रुलाई शौच गर्न खाली चौरको सहारा लिनु पर्ने अवस्था छ । बसपार्कको यो अवस्था आउनुमा नगरपालिका र बस व्यवसायी संघको लापरबाही रहेको स्थानीय शोभाकान्त पाण्डेयले बताए । बस सञ्चालक र साहुहरूसँग लाखौं रुपैयाँ उठाउँदै आएको जनकपुर अञ्चल बस व्यवसायी संघले आफ्नो दायित्व पूरा नगर्दा बसपार्क कुरूप र अस्तव्यस्त देखिएको छ । जनकपुर अञ्चल बस व्यवसायी संघले सटर भाडाबाट प्रत्येक महीना १७ हजार ५ सय रुपैयाँ उठाउँदै आएको छ । संघमा अहिले ५० देखि ५५ जना कर्मचारी छन् । व्यवस्थित र सुविधासम्पन्न बसपार्क बनाउन करोडौं रुपैयाँ खर्च लाग्ने संघका अध्यक्ष मनोज चौधरीको भनाइ छ । उनले भने, ‘करोडौं खर्च गर्न यहाँका व्यवसायीको आँट छैन ।’ उनले बसपार्क व्यवस्थापन नहुनुमा जनकपुर उपमहानगरपालिकालाई दोष दिन्छन् । बसपार्क व्यवस्थापनका लागि गत वर्ष ३२ करोड रुपैयाँ बजेट आए पनि नगरपालिकाको कारण फ्रिज भएको उनले बताए ।