ईङवा हाइड्रोपावरको आईपीओ खरीद गर्ने आज अन्तिम दिन 

काठमाडौं । ईङवा हाइड्रोपावर लिमिटेड (Ingwa Hydropower Limited) ले वैशाख १३ गतेदेखि विक्रीमा ल्याएको आईपीओ (IPO) खरीद गर्ने आज अन्तिम दिन रहेको छ ।

कम्पनीले पहिलो चरणमा वैदेशिक रोजगारीमा रहेका नेपाली र आयोजना प्रभावित स्थानीयमा आईपीओ बाँडफाँट गरी दोस्रो चरणमा सर्वसाधारणका लागि आईपीओ जारी गरेको हो । मागभन्दा बढी आवेदन परिसकेकाले कम्पनीले सर्वसाधारणमा जारी गरेको आईपीओ छिटो अवधि वैशाख १७ गतेभित्र मात्र विक्री गर्न लागेको हो । 

वैशाख १४ गतेसम्म कम्पनीको आईपीओ खरीदका लागि ९ लाख ९४ हजार ६२४ जनाले आवेदन दिएका छन् । सिडिएस एण्ड क्लियरिङ लिमिटेड (सीडीएससी) का अनुसार यी आवेदकहरूबाट १ करोड ९ लाख ६४ हजार ७५० कित्ता शेयर खरीद माग भएको हो । जुन मागभन्दा ८ दशमलव ६४ गुणा बढी आवेदन हुन आउँछ ।

कम्पनीले सर्वसाधारणमा ६८ हजार ६३९ कित्ता शेयर सार्वजनिक निष्कासनमार्फत विक्री खुला गरेको हो ।

कम्पनीले पहिलो चरणमा आयोजना प्रभावित स्थानीयमा ३ लाख ६ हजार ८४० कित्ता र वैदेशिक रोजगारीमा रहेका नेपालीमा १ लाख २० हजार कित्ता शेयर बाँडफाँट गरेको छ । आयोजना प्रभावित स्थानीयमा जारी पूँजी ६० करोड रुपैयाँको १० प्रतिशत दरको ६ लाख कित्ता शेयर विक्री खुला गरिएकोमा २ लाख ९३ हजार १६० कित्ता शेयर भने वितरण हुन सकेको थिएन । स्थानीयमा वितरण हुन नसकेको उक्त शेयर समेत थप गरी कम्पनीले सर्वसाधारणमा विक्री गर्न लागेको हो । 

स्थानीयमा विक्री हुन नसकेको शेयरसमेत गरी सर्वसाधारणमा कुल १४ लाख ९३ हजार १६० कित्ता शेयर वितरण हुनेछ । सर्वसाधारणका लागि छुट्याइएको शेयरमध्ये १० प्रतिशत दरको आरक्षित शेयर वैदेशिक रोजगारीमा रहेका नेपालीमा र ५ प्रतिशत दरको ७४ हजार ६५८ कित्ता शेयर सामूहिक लगानी कोषहरूमा बाँडफाँट गरिएको छ । २ प्रतिशत दरको २९ हजार ८६३ कित्ता शेयर कर्मचारीका लागि सुरक्षित गरी बाँकी शेयर सार्वजनिक निष्कासनमा ल्याएको हो ।

यो आईपीओ खरीदका लागि न्यूनतम १० कित्तादेखि अधिकतम २० हजार कित्तासम्म माग गर्न सकिनेछ । कम्पनीको आईपीओ विक्री प्रबन्धकमा नेपाल एसबिआई मर्चेण्ट बैंकिङ लिमिटेड रहेको छ । विक्री प्रबन्धकसँगै लगानीकर्ताहरूले नेपाल धितोपत्र बोर्डबाट स्वीकृति प्राप्त सम्पूर्ण सी–आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरूबाट आवेदन दिन सक्नेछन् । साथै आवेदनका लागि मेरो शेयर सफ्टवेयर र एपसमेत प्रयोग गर्न सकिने व्यवस्था छ ।

कम्पनीले आईपीओ निष्कासनका लागि गराएको रेटिङमा केयर रेटिङ नेपाल लिमिटेडले कम्पनीलाई वित्तीय दायित्व वहन गर्ने क्षमतामा मध्यम जोखिम रहेको संकेत गर्ने केयर एनपी डबलबी इस्युअर रेटिङ प्रदान गरेको छ । 

कम्पनीले ताप्लेजुङमा ९ दशमलव ७ मेगावाट क्षमताको ईङवा खोला साना जलविद्युत् आयोजना निर्माण गरिरहेको छ । यस आयोजनाबाट २०७९ जेठ १ गतेदेखि व्यापारिक उत्पादन गर्ने लक्ष्य रहेकोमा कोभिडको कारण समयमै मालसामान आयात हुन नसकेपछि २०८० जेठ १६ गतेदेखि पूर्ण व्यावसायिक विद्युत् उत्पादन शुरू गर्ने लक्ष्य लिइएको छ । 

निर्माण अवधिको ब्याजसहित यस आयोजना निर्माण लागत प्रतिमेगावाट औसत २० करोड १० लाख ३० हजार ९०० रुपैयाँ र कुल अनुमानित लागत १ अर्ब ९५ करोड रुपैयाँ हुने अनुमान गरिएको छ । यस आयोजनाको विद्युत उत्पादन अनुमति पत्र बहाल रहने अवधि २०७७ मंसिर १४ गतेदेखि २११० असार २६ गतेसम्म छ ।