नयाँ सत्ता समीकरणको प्रभाव शेयर बजारमा, के भन्छन् लगानीकर्ता ?

काठमाडौं । नेपाली कांग्रेस र नेकपा (एमाले)बीच एमाले अध्यक्ष केपी शर्मा ओलीको नेतृत्वमा नयाँ सरकार वनाउने सहमति भएको भोलिपल्ट मंगलवार शेयर बजारमा उछाल आयो ।

नेपाल स्टक एक्स्चेञ्ज (नेप्से) परिसूचक ४७ दशमलव शून्य ४ प्रतिशतले वढ्यो । परिसूचकमा भएको वृद्धिसँगै नेप्सेले दुईपटक सर्किट ब्रेकर लगाउनुप¥यो ।

पहिलो एक घण्टाभित्र वा १२ बजेभित्र चार प्रतिशत वा सोभन्दा बढीले नेप्से सूचकांक घटबढ भएमा २० मिनेट कारोवार वन्द गरिन्छ । १ बजेभन्दा अगाडि ५ प्रतिशत वा त्योभन्दा बढीले परिसूचक घटबढ भएमा ४० मिनेट कारोवार बन्द गर्नुपर्ने नियम छ । ६ प्रतिशत वा सोभन्दा बढीले सूचक घटबढ भएमा शेयर कारोबार दिनभर बन्द गरिन्छ । यसरी गरिने कारोवार बन्दलाई ‘सर्किट ब्रेकर’ भनिन्छ ।

प्रि–ओपन सेसनमै नेप्से ३२ दशमलव ४४ अंक बढेको थियो । त्यसपछि नियमित सेसनमा ११ बजे खुलेको बजार २ मिनेट नपुग्दै ४ प्रतिशत बढेर २० मिनेटको लागि कारोबार बन्द भयो । त्यसपछि ११ बजेर २१ मिनेटमा फेरि खुलेको बजार ५ प्रतिशत बढेर २ हजार १५६ दशमलव ०७ विन्दुमा पुग्यो । त्यसपछि ४० मिनेटसम्म कारोवार बन्द भयो । त्यसपछि खुलेको बजार अन्त्यमा नेप्से २ दशमलव २९ प्रतिशत बढेर २ हजार १ सय दशमलव ४३ विन्दुमा पुगेको छ ।

सोमवार नै सरकार परिवर्तन हुने हल्ला भएसँगै शेयरको दोस्रो बजार केही सकारात्मक भएको थियो । सोमवार नेप्से परिसूचक १६ दशमलव २९ अंक बढेको थियो ।

शेयर बजारलाई स–साना कुराले सकारात्मक र नकरात्मक प्रभाव पार्ने गर्दछ । अझै राजनीतिक प्रभाव धेरै नै देखिने गर्दछ । गत वर्षको फागुन २१ गते पनि कांग्रेससँग मिलेर एमाले सरकारमा सहभागी हुने हल्लाले शेयर बजार तीन पटक ‘सर्किट ब्रेक’ लागेर बन्द भएको थियो ।

नयाँ सरकार गठनपछि राजनीतिक स्थायित्व, आर्थिक सुधारसँगै पूँजी बजारमा पनि नीतिगत सुधार हुने अपेक्षामा बजार बढेको लगानीकर्ता राधा पोखरेल बताउँछिन् ।

दुईओटा सबैभन्दा ठूला दलहरूले नै संयुक्त सरकार बनाउने हुनाले राजनीतिक स्थायित्व हुनसक्ने लगानीकर्ता बताउँछन् । २०७९ सालमा संसदको चुनाव भएपछि प्रधानमन्त्री पुष्पकमल दाहालकै नेतृत्वमा तीनओटा सरकार बनिसकेको छ भने ओलीको नेतृत्वमा बन्दा डेढ वर्षमै चौथो सरकार बन्ने छ ।

अर्का लगानीकर्ता नवराज दाहाल पनि कांग्रेस–एमालेको सरकार बन्ने समाचारको असर शेयर बजारमा देखिएको वताउँछन् । ‘लामो समयदेखि शेयर बजार माथि उठ्न नसक्दा लगानीकर्ताहरू धेरै नै आत्तिएका छन्,’ उनले भने, ‘ठूला दलहरूको सरकार बन्ने कुरालाई लगानीकर्ताहरूले सकारात्मक ठानेकोले बजार बढेको हो ।’