तीन कारोबार दिनमा ४ प्रतिशतभन्दा बढी घट्यो नेप्से, कुल बजार पूँजीकरण करीब ४१ खर्बमा खुम्चियो

काठमाडौं । यो साता धितोपत्र दोस्रो बजार तीन कारोबार दिन मात्र खुल्यो । दुई दिन सार्वजनिक बिदाका कारण बन्द भएको नेप्से तीन कारोबार दिनमा ४ दशमलव १६ प्रतिशत घटेको छ । गत साताको अन्तिम कारोबार दिन ७८ दशमलव ३१ अंकले बढेर बन्द भएको बजार यो साता निरन्तर तीन कारोबार दिननै घटेर बन्द भएको हो । 

गत साता पाँच कारोबार दिनमध्ये शुरुका चार कारोबार दिन निरन्तर घटेको बजार अन्तिम कारोबार दिन बढेको थियो । 

पछिल्लो १० कारोबार दिनमा बजार ९ दिन घटेको छ भने एक दिन मात्र बढेको नेप्सेको तथ्यांकले देखाउँछ । यो साता तीन कारोबार दिनमा मात्र नेप्से परिसूचक १११ दशमलव ७७ अंकले घटेको हो । गत साताको अन्तिम कारोबार दिन २ हजार ६८८ दशमलव ५३ विन्दुमा रहेको नेप्से परिसूचक यो साताको अन्तिम कारोबार दिन भने २ हजार ५७६ दशमलव ७६ विन्दुमा बन्द भएको हो ।

करीब ३ महीना घटेर बढ्न थालेको बजार पछिल्लो समय गत साउन ३१ गते ३ हजार विन्दुमाथिसम्म पुगेको थियो । त्यो बेला बजार ३ हजार २०० को ऐतिहासिक विन्दुभन्दा माथि जानसक्ने विश्वास ब्रोकरहरूको थियो । 

वित्तीय प्रणालीमा पर्याप्त तरलता हुनु, निक्षेपको ब्याजदर घट्नु र लगानीकर्ता कर्जा लिएर अन्य क्षेत्रमा लगानी गर्न इच्छुक नभइरहेको अवस्थामा धितोपत्र बजारमै लगानी बढ्ने विश्वास स्टक ब्रोकर एशोसिएसन अफ नेपालका अध्यक्ष धर्मराज सापकोटाको थियो । उनले उल्लेखित आधारलाई हेर्दा बजार अझै माथि जान सक्ने सम्भावना रहेको बताएका थिए । तर, लगानीकर्ताको विश्वास घट्दै जाँदा बजारमा कारोबार रकमसँगै नेप्से परिसूचक पनि निरन्तर घटिरहेको छ । 

यो साता ठूला कम्पनीहरूको मात्र कारोबार मापक सेन्सेटिभ इन्डेक्स ४ दशमलव ४७ प्रतिशत घटेको छ । 

दैनिक करीब ३० अर्बको कारोबार भएको बजारमा यो साता तीन दिनको कारोबारमा २३ अर्ब ३७ करोड ४ लाख रुपैयाँभन्दा बढीको ५ करोड ५८ लाख ६० हजारभन्दा बढी कित्ता धितोपत्र खरीदविक्री भएको छ । गत साताको तुलनामा यो साता कारोबार रकम १८ अर्ब ४५ करोड रुपैयाँभन्दा बढीले र कारोबार कित्ता ४ करोड १३ लाख ९० हजारभन्दा बढीले घटेको हो । गत साता पाँच कारोबार दिनमा ४१ अर्ब ८२ करोड ७५ लाख रुपैयाँभन्दा बढीको ९ करोड ७२ लाख ५१ हजारभन्दा बढी कित्ता धितोपत्र कारोबार भएको थियो ।

गत साताको तुलनामा यो साता दुई दिन कारोबार कम भएपछि औसत कारोबार रकम र कित्ता पनि घटेको छ । गत साता औसतमा ८ अर्ब ३६ करोड रुपैयाँभन्दा बढीको धितोपत्र कारोबार भएकोमा यो साता औसतमा ७ अर्ब ७९ करोड रुपैयाँभन्दा बढीको १ करोड ८६ लाख २० हजारभन्दा बढी कित्ता धितोपत्र कारोबार भएको हो । गत साताभन्दा यो साता औसतमा कारोबार रकम ५७ करोड ५३ लाख रुपैयाँभन्दा बढीले घटेको छ भने कारोबार कित्ता ८ लाख ३० हजारभन्दा बढीले कम भएको छ ।

बजार घटेसँगै कुल बजार पूँजीकरण ४० खर्ब ९७ अर्ब २५ करोड ३६ लाख रुपैयाँमा खुम्चिएको छ । गत साताको अन्तिम कारोबार दिन कुल बजार पूँजीकरण ४२ खर्ब ७४ अर्ब ९७ करोड ७५ लाख रुपैयाँ रहेको थियो । गत साताभन्दा यो साता कुल बजार पूँजीकरण १ खर्ब ७७ अर्ब ७२ करोड ३९ लाख रुपैयाँले घटेको हो ।

सातागत परिसूचकको तुलना 

विवरण	यो साता	गत साता	फरक	फरक प्रतिशत
नेप्से परिसूचक (अंक)	2,576.76	2,688.53	-111.77	-4.16
सेन्सेटिभ इन्डेक्स (अंक)	459.92	476.47	-16.55	-3.47
कारोबार रकम (रू. हजारमा)	23,370,419.30	41,827,536.76	-18,457,117.46	-44.13
कारोबार कित्ता	55,860,710	97,251,296	-41,390,586	-42.56
औसत कारोबार रकम (रू. हजारमा)	7,790,139.77	8,365,507.35	-575,367.58	-6.88
औसत कारोबार कित्ता	18,620,236.67	19,450,259.20	-830,022.53	-4.27
कुल बजार पूँजीकरण (रू. दश लाखमा)	4,097,253.66	4,274,977.58	-177,723.92	-4.16

स्रोत : नेपाल स्टक एक्सचेञ्ज (नेप्से) ।

बैंकिङ समूहको परिसूचक सबैभन्दा कम घट्यो 

यो साता तीन कारोबार दिनमात्र खुलेको बजारमा सबै समूहगत परिसूचक घटेका छन् । यो साता वाणिज्य समूहको परिसूचक सबैभन्दा कम १ दशमलव ७६ प्रतिशत घटेको छ । यस्तै, वित्त समूहको परिसूचक सबैभन्दा बढी ११ दशमलव ४५ प्रतिशत घटेको जानकारी नेप्सेले दिएको छ ।

नेप्सेका अनुसार यो साता होटल तथा पर्यटन समूहको परिसूचक ६ दशमलव २ प्रतिशत, लगानीको ५ दशमलव ७ प्रतिशत, लघुवित्तको ५ दशमलव ३ प्रतिशत, विकास बैंकको ५ दशमलव २९ प्रतिशत, अन्यको ५ दशमलव १३ प्रतिशत, जीवन बीमाको ४ दशमलव ९ प्रतिशत, उत्पादन तथा प्रशोधनको ४ दशमलव २८ प्रतिशत, व्यापारिकको ४ दशमलव २ प्रतिशत, जलविद्युतको ३ दशमलव ९ प्रतिशत, निर्जीवन बीमाको ३ दशमलव ८९ प्रतिशत र म्युचुअल फण्डको परिसूचक २ दशमलव ६ प्रतिशत घटेको हो । परिसूचकमा आएको घटबढलाई आधार मान्दा वित्त समूहले सर्वाधिक गुमाएको देखिन्छ ।

साताव्यापी समूहगत परिसूचकमा आएको परिवर्तन

विवरण	यो साता	गत साता	फरक प्रतिशत
वित्त	3,024.90	3,416.16	-11.45
होटल तथा पर्यटन	6,404.07	6,827.29	-6.2
लगानी	104.72	111.05	-5.7
लघुवित्त	4,885.11	5,158.59	-5.3
विकास बैंक	5,087.53	5,371.47	-5.29
अन्य	1,966.30	2,072.53	-5.13
जीवन बीमा	12,524.17	13,169.99	-4.9
उत्पादन तथा प्रशोधन	6,849.32	7,155.34	-4.28
व्यापार	3,600.78	3,758.63	-4.2
जलविद्युत्	3,190.70	3,320.33	-3.9
निर्जीवन बीमा	12,950.62	13,474.44	-3.89
म्युचुअल फण्ड	21	21.56	-2.6
बैंकिङ्ग	1,462.42	1,488.69	-1.76

स्रोत : नेपाल स्टक एक्सचेञ्ज (नेप्से) ।