नक्सालमा खुल्यो सि–कार, नयाँ तथा पुराना गाडीको शोरुमदेखि चार्जिङसम्मको सुविधा एकै ठाउँमा

काठमाडौं । नक्सालमा सवारी साधनसम्बन्धी विभिन्न सेवा एकै थालोमा उपलब्ध गराउने उद्देश्यले ‘सि–कार’ सञ्चालनमा आएको छ । एक औपचारिक समारोहबीच महानायक राजेश हमालले सि–कारको शुभारम्भ गरेका छन् ।

सि–कारमा नयाँ तथा सेकेन्ड ह्याण्ड गाडीको शोरुम, एस्सेसरिज पसल, चार्जिङ स्टेसन र क्याफेलगायत सुविधा एकै स्थानमा उपलब्ध भएको सि कारका संस्थापक रोशन घिमिरेले बताए ।

शुभारम्भका अवसरमा महानायक हमालले सवारीसाधनसम्बन्धी विभिन्न सेवा एकै थलोमा उपलब्ध हुनुले ग्राहकको समय र खर्च बचत भएको प्रतिक्रिया दिए । 

कम्पनीका अनुसार पछिल्लो समय विद्युतीय सवारीमा अत्यधिक रुचाइएको बीवाईडीको नयाँ शोरुमले ग्राहकलाई सहज हुनेछ । साथै सि–कारमा विभिन्न ब्राण्डका सेकेन्ड ह्यान्ड सवारी साधन पनि उपलब्ध हुनेछन् । ग्राहकले सेकेन्ड ह्यान्ड सवारी खरीद गर्नुका साथै एक्सचेञ्जका पनि सुविधा पाउने कम्पनीले जानकारी दिएको छ । 

कम्पनीले सवारी खरीदविक्रीका साथै सि–कार परिसरमा चार्जिङ स्टेसन पनि सञ्चालनमा ल्याएको छ । जहाँ एकै साथ ९ हजार १५० भन्दा बढी विद्युतीय सवारी चार्ज गर्न सकिनेछ । कम्पनीले यसका लागि द्रुत गतिमा चार्ज हुने सुविधा ल्याएको छ । 

ग्राहकले सि–कार परिसरमै रहेको इटालियन रेस्टुरेन्टको मज्जा लिन सक्नेछन् । त्यति मात्रै होइन, सि–कारमा सवारी साधनका स्पेयर पार्टस् पनि सुलभ मूल्यमै उपलब्ध हुनेछन् । 

कम्पनीले ग्राहकलाई अधिकतम सेवा दिने उद्देश्यले सेकेन्ड ह्यान्ड सवारी विक्री गरेको तीन महीनासम्मको प्राविधिक रूपमा सम्पूर्ण जिम्मेवारी लिनेछन् । 

'ग्राहकहरू अहिले सेकेन्ड ह्यान्ड सवारी खरीद गर्दा ढुक्क हुने अवस्था छैन, त्यसैले हामीले तीन महीनाका लागि प्राविधिक रूपमा कुनै समस्या आए समाधानको जिम्मेवारी लिने गरी अफर ल्याएका छौं,' घिमिरेले भने ।

साथै कम्पनीले ग्राहकलाई अझ बढी सेवा दिने उद्देश्यले ब्लुबुक नि:शुल्क नवीकरण सुविधा पनि ल्याएको छ । 

सि–कारमार्फत सवारीको बीमा गर्नेले ब्लुबुक नवीकरणको पनि सुविधा पाउनेछन् । जसका लागि उनीहरूले कुनै पनि अतिरिक्त शुल्क तिर्नुपर्दैन ।

कम्पनीले ग्राहकहरूलाई सहज सेवा दिने उद्देश्यले सदस्यता योजना पनि ल्याएको छ । विभिन्न वर्गीकरणका सदस्यता योजनामा सि–कारमा उपलब्ध कुनै पनि सेवा उपयोग गर्दा निश्चित प्वाइन्ट प्राप्त हुन्छ भने विभिन्न सेवामा आकर्षक छूट पनि पाउने कम्पनीको भनाइ छ ।

४ रोपनी क्षेत्रमा फैलिएको सि-कारमा करीब ५० जनाले रोजगारी पाएका छन् ।