arthik abhiyan
ad banner Mango Tech Digital Marketing Solution

पाम आयल क्षणिक अवसर

Aug 8, 2019  
सम्पादकीय
NA

नेपालमा उत्पादन नै नहुने पाम आयल गत आर्थिक वर्षमा भारत निर्यात हुने वस्तुमा पहिलो बन्न पुगेको छ । पाम आयल तेस्रो मुलुकबाट नेपाल ल्याई प्रशोधन गरेर भारत निर्यात गरिन्छ ।

 आर्थिक वर्ष (आव) २०७५/७६ मा ११ अर्ब ८६ करोडको कच्चा पाम आयल आयात भएकामा भारततर्फ १० अर्ब ३३ करोडको प्रशोधित पाम आयल निर्यात भएको छ । त्यस्तै रू. २ अर्ब बराबरको भटमासको तेल पनि भारत निर्यात भएको छ । यी दुवै वस्तुको निर्यात स्थिर रहला त ?

 स्वदेशी किसानलाई राहत दिन भारत सरकारले खान तेल र यसको कच्चा पदार्थ आयातलाई निरुत्साहित गर्ने उद्देश्यले पाम आयलको आयातमा ५९ दशमलव ४ र प्रशोधित भटमासको तेलको आयातमा ४४ प्रतिशत भन्सार शुल्क पुर्‍यायो । तर, साफ्टाका प्रावधान अनुसार सार्क मुलुकहरूले शून्य भन्सारको सुविधा पाएका छन् । यही भएर अहिले नेपाल, बंगलादेश र श्रीलंकाले समेत भारतमा पाम आयलको निर्यात बढाएका हुन् । विदेशबाट ल्याएको कच्चा पाम आयल प्रशोधन गरी भारत निर्यात गर्दा अनुदान सहुलियत समेत पाउने भएकाले नेपाली व्यवसायीहरूले मौका छोपेका हुन् । बन्द भएका मिल र सञ्चालनमा रहेका तोरी मिलहरू समेत अहिले धमाधम पाम आयल प्रशोधन गर्न थालेका छन् ।

 पाम आयल निर्यातबाट नेपालले राम्रो लाभ लिन सक्छ । व्यापारघाटा कम गर्न सहयोगी हुन सक्छ । निर्यात गरिएको वस्तु नेपालमा प्रशोधित गरी मूल्य अभिवृद्धि गरिएको भने हुनुपर्छ ।

 भारतीय व्यापारीले भने नेपालले प्रशोधित तेल नै ल्याई भारत निर्यात गरेको आशंका गरी विरोध गरेका छन् । उनीहरूले खानेतेललाई साफ्टा प्रावधान अन्तर्गत नकारात्मक सूचीमा राख्न सरकारसँग माग गरिरहेका छन् र यसलाई ‘वैधानिक तस्करी’को नाम दिएका छन् ।

 नेपालले आफूले कच्चा पदार्थमात्रै ल्याएको र प्रशोधन गरेर भारत निकासी गरेको भनी भारतीय सरकारलाई आश्वस्त नपार्ने हो भने यसरी बढेको निर्यात अर्थहीन हुन सक्छ । अझ भन्ने हो भने नेपालका धेरै उत्पादनलाई भारतले कच्चा पदार्थको नाममा तयारी वस्तु ल्याएर भारतलाई बेचेको आरोप लाग्न सक्छ र भोलिका दिनमा नेपाली कृषि उपज भारत निर्यात गर्न झन् गाह्रो हुन सक्छ । चिनियाँ अदुवालाई नेपाली भनेर भारत निर्यात गर्ने, अन्य देशबाट ल्याएको सुपारी भारत निकासी गर्ने जस्ता कामले नेपालको व्यापारिक छवि खराब बनेको छ । यसैले यस्तो निर्याततर्फ सचेत हुनु जरुरी छ ।

 हरेक देशले आफ्नो व्यापारिक स्वार्थलाई पहिलो प्राथमिकतामा राख्छ । उसले आफ्ना व्यवसायीको स्वार्थ पूरा गर्न कुनै पनि कसर बाँकी राख्दैन । भारत आप्mनो आन्तरिक मामिलमा बढी केन्द्रित भएकाले पाम आयल निर्यातमा कुनै अवरोध खडा गरिएको छैन । तर, उसले कुनै पनि दिन यसमा कुनै बहाना झिकेर निर्यातमा अवरोध खडा गर्न सक्छ ।

 डेढ देशकसम्म भारतीय बजारमा नेपाली वनस्पति घिउको राम्रो बजार थियो । तर, भारतले नेपाली वनस्पति घिउमा अनेक अवरोध लगायो । अन्य छिमेकी मुलुकलाई सहज व्यापारिक क्षेत्रमा निर्यात गर्न दियो भने नेपाली उत्पादनलाई अपायक पर्ने बजारमा निर्यात गर्न दियो । त्यसले गर्दा नेपाली उत्पादनले अन्य देशका उत्पादनसँग प्रतिस्पर्धा गर्न गाह्रो भयो । नयाँनयाँ प्रावधान लगाएपछि हाल घिउ निर्यात नै बन्द भएको छ र कतिपय घिउ उद्योगहरू बन्द भएका छन् ।

 पाम आयलमा पनि यस्तै हुन सक्छ । तर, यो नेपालको उत्पादन नभएकाले त्यसमा अवरोध आए पनि ठूलो समस्या आउँदैन । नेपालका उत्पादनलाई भारतीय व्यापारी र सरकारले हेर्ने दृष्टिकोण नकारात्मक बन्न पुग्यो भने त्यो ठूलो दुर्भाग्य हुनेछ । त्यसैले यस्तो क्षणिक लाभका पछि लाग्नुको साटो दीर्घकालीन निर्यात बढाउने वस्तुको उत्पादनमा लाग्नु नेपालका लागि हितकर हुनेछ ।
 

प्रतिक्रिया [0]
प्रतिक्रिया दिनुहोस्