arthik abhiyan
ad banner

दीर्घकालीन समस्यामा क्रसर उद्योग

मकवानपुरमा मापदण्ड विपरीतका सबै क्रसर बन्द

Aug 11, 2019
प्रदेश समाचार प्रदेश ०३
NA
author avatar भानुभक्त आचार्य

हेटौंडा । मकवानपुरको सबै क्रसर उद्योग मापदण्ड विपरीत सञ्चालनमा रहेको भन्दै प्रदेश सरकारले क्रसर उद्योग बन्द गर्ने निर्णय गरेको छ । २०७५ मंसिरमा प्रदेश–३ सरकारले क्रसर उद्योग सञ्चालन कार्यविधि बनाएर मापदण्ड विपरीतका क्रसर उद्योग ३ महीनाभित्र स्थानान्तरण वा बन्द गर्न सूचना जारी गरेको थियो । गत चैतमा पुनः असार मसान्तभित्र स्थानान्तरण गर्न समय थपियो । 

मकवानपुरमा ३७ ओटा क्रसर उद्योग रहेको जिल्ला समन्वय समितिका संयोजक रघुनाथ खुलालले बताए । खुलालले बिहीवार एक सूचना प्रकाशन गरी निर्माण सामग्रीको रूपमा प्रयोग हुने गिट्टी, बालुवाको विक्रीवितरणको जिम्मा स्थानीय सरकारलाई भएको र क्रसर उद्योगमा रहेको स्टकबाट खरीद गर्न सकिने जानकारी दिए ।

तर, क्रसर उद्योगले भने स्टक सकिएको बताउँदै आएको छ । दोब्बर मूल्यमा रातारात गिट्टीबालुवा उपलब्ध भइरहेको उपभोक्ताहरूले बताएका छन् । क्रसर उद्योगले हरेक वर्ष समस्या भोग्दै आएको उद्योगीको गुनासो छ । तत्कालीन उद्योगमन्त्री महेश बस्नेतले हेटौंडामा उद्योगीसँगको भेटघाटमा क्रसर उद्योग नयाँ समस्या बनेको बताएका थिए । त्यसपछि मुलुकका हरेक उच्चपदस्थ अधिकारी हेटौंडा आएको समयमा क्रसर उद्योगीले आनो गुनासो राख्न छोडेका छैनन् । तर, समस्या जस्ताको त्यस्तै छ । 

गिट्टी–बालुवा बोकेका ट्र्याक्टर तथा टिप्परहरू प्रहरीले नियन्त्रणमा लिएर दुःख दिएको भनी क्रसर व्यवसायीले बारम्बार गुनासो गर्दै आएका छन् । मापदण्ड अनुसार उद्योग सञ्चालन गर्न नसकिने उद्योगीले बताउँदै आएका छन् । मकवानपुरका २३ ओटा क्रसर उद्योगलाई सरकारले चुरे क्षेत्रमा परेको भनेर परिभाषित गरेको छ । घर बनाउने उपभोक्ताले ४ हजार रुपैयाँमा पाउने एक ट्र्याक्टर बालुवा अहिले १० हजार रुपैयाँ तिर्दा समेत नपाएर हैरान भएका छन् । 

जथभावी नदीजन्य उत्खननले समस्या सृजना भएपछि प्रदेश सरकारले क्रसर बन्द गरेको हो । सरकारले गरेको निर्णय अनुसार स्थानीय अनुगमन समितिले काम नगरेका कारण नदीजन्य निर्माण सामग्री अभाव भएको बताइएको छ । कुन उद्योगसँग कति मौज्दात छ भन्ने कुरा समितिले अनुगमन गर्ने गरेको छ । 

निर्माण सामग्री अभाव तथा कालो बजारीको पछाडि सरकारको निर्णयभन्दा पनि स्थानीय तहको बुझाइमा समस्या देखिएको संयोजक खुलालले बताए । 

प्रतिक्रिया दिनुहोस्