arthik abhiyan
ad banner Mango Tech Digital Marketing Solution

वैशाखभित्रै बजेट खर्च गर्न मोरङका स्थानीय तह प्रतिबद्ध

Aug 12, 2019  
प्रदेश समाचार प्रदेश ०१
Image Not Found
author avatar रोशनी भट्टराई

विराटनगर । मोरङका १७ ओटै स्थानीय तहले आर्थिक वर्ष सकिन दुई महीना अगावै बजेट खर्च गर्ने प्रतिबद्धता व्यक्त गरेका छन् । आर्थिक वर्षको अन्त्यमा बजेट खर्च गर्ने परिपाटीका कारण निराशाजनक खर्च प्रगति व्यहोर्नु परेको र सञ्चालित योजनाको गुणस्तरसमेत कायम नभएको भन्दै स्थानीय तहले यस्तो निर्णय गरेका हुन् ।

स्थानीय तहका प्रमुख, उपप्रमुख र कार्यकारी अधिकृतसहित साउन १६ गते बसेको संयुक्त बैठकले वैशाख महीनाभित्रै बजेट कार्यान्वयन गर्ने मार्गदर्शन तयार गरी त्यसलाई पालना गर्ने प्रतिबद्धता व्यक्त गरेका हुन् । हरेक वर्ष आर्थिक वर्षको अन्तिम दुई महीना जेठ र असारमा मात्रै विकास बजेट खर्च गर्ने प्रवृत्तिका कारण आयोजना तथा कार्यक्रमहरू गुणस्तरीय नभएको, कर्मचारीहरू ठेकेदार र उपभोक्ता समितिसँग मिलेर आर्थिक प्रलोभनमा परेको स्थानीय तहको ठहर छ ।

ग्रामथान गाउँपालिकाका कार्यकारी अधिकृत होमप्रसाद पौडेलले उक्त निर्णय कार्यान्वयन गर्न हरेक दुई महीनामा बैठक बस्ने सहमति भएको जानकारी दिए । ढिलो बजेट खर्च हुने समस्याका कारण प्रदेश सरकार समेत जेठ १५ पछि एक रुपैयाँ पनि भुक्तानी नगर्ने निष्कर्षमा पुगेको छ । प्रदेशका मुख्यमन्त्री शेरधन राईले साउन ६ गते प्रदेश सरकार मातहतका कर्मचारीलाई राखेर प्रदेशको बजेट जेठ महीनाको १५ गतेपछि खर्च नगर्ने घोषणा गरेका थिए । उक्त बैठकले जनप्रतिनिधिहरू समेतको सहभागितामा साझा सरोकार मञ्चसमेत गठन गरेको थियो । 

आर्थिक वर्ष २०७६÷७७ मा सञ्चालन हुने योजना तथा कार्यक्रमलाई वैशाख मसान्तसम्म सम्पन्न गरिसक्ने निर्णय भएको बूढीगंगा गाउँपालिकाका कार्यकारी अधिकृत विनोदकुमार न्यौपानेले जानकारी दिए । उनले त्यसको समन्वयका लागि मञ्च गठन गरिएको बताए । ‘हामीले त्यही निर्णयलाई मार्गदर्शक सिद्धान्त बनाएर काम गर्नेछौं’ न्यौपानेले भने, ‘त्यो निर्णय सबै पालिकाले वार्षिक कार्ययोजना र खरीद योजना बनाएर पूर्ण रूपमा कार्यान्वयन गर्नुपर्ने छ ।’ 

आर्थिक वर्षको अन्त्यमा बजेट खर्च हुने प्रचलनले निकासा दिने कार्यालयका साथै प्रत्येक बैंक तथा वित्तीय संस्थामा भीड लाग्दै आएको थियो । अन्तिममा योजना फछ्र्योट गर्नुपर्दा कर्मचारीलाई भ्याई नभ्याई हुने र आर्थिक प्रलोभनमा परेर उनीहरू पक्राउ पर्ने घटना वर्षेनि बढेका छन् ।

प्रतिक्रिया [0]
प्रतिक्रिया दिनुहोस्