arthik abhiyan
ad banner

गाउँपालिकाकै लगानीमा विद्युत् विस्तार गरिँदै

Aug 13, 2019
प्रदेश समाचार प्रदेश ०५
Image Not Found
author avatar भक्तबहादुर शाही

नेपालगञ्ज । बाँकेको राप्तीसोनारी गाउँपालिकाले आफ्नै लगानीमा वडा नं. ३, ४ र ५ मा विद्युत् विस्तार गर्न लागेको छ । गाउँपालिकाको वडा नं. ४ धामपुरमा विद्युत् सबस्टेशन निर्माण भए पनि कोहलपुर–धामपुर ३३ केभी प्रशारण लाइनको काम ठेकेदारको ढिलासुस्तीले एक दशकदेखि अलपत्र परेपछि गाउँपालिका आफै विद्युत् विस्तारमा अग्रसर भएको हो । 

काम अलपत्र पार्ने ठेकेदारसँगको ठेक्का सम्झौता नेपाल विद्युत् प्राधिकरणले तोडे पनि विवाद साम्य हुन सकेको छैन । राप्तीपारि विद्युतीकरणका विषयमा बाँके आउँदा ऊर्जामन्त्रीले धेरै पटक आश्वासन मात्रै बाँडे पनि प्रतिबद्धताअनुसार विद्युत् सेवा भने पुर्‍याउन सकेनन् ।

गाउँपालिका अध्यक्ष लाहुराम थारूले राप्तीपारिका बासिन्दाको बिजुली बाल्ने सपना पूरा गर्न गाउँपालिकाले आफ्नै लगानीमा विद्युत विस्तार गर्न लागेको बताए । गाउँपालिकाको वडा नं. १ स्थित ‘कुसुम सामुदायिक ग्रामीण विद्युत् सहकारी संस्था लिमिटेड’मार्फत ११ केभी प्रशारण लाइन वडा नं. ३, ४ र ५ विस्तार गर्ने प्रक्रिया अघि बढिसकेको उनले जानकारी दिए । 

चालू आर्थिक वर्ष २०७६/७७ भित्रै वडा नं. ३ सम्म विद्युत् विस्तार गर्ने र लगत्तै वडा नं. ४ र ५ मा पनि काम थाल्ने गाउँपालिकाको योजना छ । वडा नं. ३ मा अबको ६ महीनाभित्रै विद्युत् लाइन विस्तार गरिसक्ने लक्ष्य राखिएको राप्तीसोनारी गाउँपालिकाले बताएको छ । सो कार्यका लागि गाउँपालिकाले चालू आवमा रू. १ करोड ३९ लाख छुट्याएको अध्यक्ष थारूले बताए । 

गाउँपालिकाले विद्युत् विस्तारको काम थालेपछि ती वडाका बासिन्दा खुशी भएका छन् । बैजापुरका स्थानीय रामलौटन थारूले भने, ‘वर्षौंदेखि काम अलपत्र पारेर ठेकेदारले हामीलाई धोका दिएको अवस्थामा गाउँपालिकाले महत्वपूर्ण कदम अघि बढाएकोमा हामी अत्यन्त खुशी छौं ।’

प्रतिक्रिया दिनुहोस्