arthik abhiyan
ad banner Mango Tech Digital Marketing Solution

अलिबाबाका अध्यक्षबाट सेवामुक्त भए ज्याक मा

Sep 11, 2019  
अन्तरराष्ट्रिय
Image Not Found


अलिबाबाकै कारण मा चीनको सबैभन्दा धनी व्यक्ति बन्न सफल भएका छन् । फोब्र्सका अनुसार उनको सम्पत्ति साढे ३८ अर्ब डलरभन्दा धेरै छ ।  साङ्हाई (चीन) । चिनियाँ अनलाइन कम्पनी अलिबाबाका अध्यक्ष ज्याक माले औपचारिक रूपमै आफ्नो पद छोडेका छन् । मंगलवार शिक्षा दिवसको अवसर पारेर माले अध्यक्षको पदबाट राजीनामा दिएका हुन् । गत वर्ष नै उनले आफ्नो जन्म दिन अर्थात् सेप्टेम्बर १० मा कम्पनी छाड्ने घोषणा गरेका थिए । 

सन् १९९९ मा केही साथीहरूसँग मिलेर ६० हजार डलरको लगानीमा माले स्थापना गरेको उक्त कम्पनी अहिले विश्वको सबैभन्दा ठूलो इन्टरनेट कम्पनी बनेको छ । कम्पनीको इ–कमर्श व्यवसाय सुस्ताइरहेको बेलामा साढे ४ खर्ब डलरभन्दा ठूलो कम्पनीलाई उनले आपैmले छानेका उत्तराधिकारी ड्यानिएल चाङको हातमा छाडेका छन् । चाङ कम्पनीका प्रमुख कार्यकारी पनि हुन् । 

आफ्नो कम्पनीबाट बाहिरिने उनी प्रमुख चिनियाँ इन्टरनेट कम्पनीका पहिलो संस्थापक हुन् । ‘मलाई लाग्छ ज्याक मा जस्तो व्यक्तिलाई विस्थापित गर्न निकै गाह्रो हुनेछ,’ चीनका ठूला प्रविधि कम्पनीबारे पुस्तक लेखेकी लेखिका रेबेका फनिन भन्छिन् । मा चिनियाँ स्टिभ जब्स भएको उनको भनाइ छ । 
चीनको अनलाइन बजार परिपक्व बन्दै गएको छ । यस्तोमा वृद्धिको नयाँ क्षेत्र खोज्नु चाङको प्रमुख चुनौतीहरूमध्ये एक हुने विश्लेषकहरू बताउँछन् । माले अध्यक्ष पद छाडे पनि अलिबाबा पार्टनरसिपको सदस्यका रूपमा भने कम्पनीमा रहिरहनेछन् । ३६ जना सदस्य रहने यो अलिबाबा पार्टरनसिपले कम्पनीका सञ्चालक सदस्यहरू छान्ने अधिकार राख्दछ । अमेरिका–चीन बीचको महशुल युद्धका कारण कम्पनीको व्यवसाय नै संकटमा पर्ने हो कि भन्ने चिन्ता बढेको समयमा माको बहिर्गमनले कम्पनीमा कस्तो असर पर्छ, त्यो भने हेर्न बाँकी नै छ । 

चिनियाँ खुद्रा बजारमा हाल अमेरिकी कर वृद्धिले ठूलै असर पारेको छ । अमेरिकाले चीनबाट आयातित सामानमा गरेको करवृद्धिले त्यहाँका बजारमा चिनियाँ सामग्री प्रवेश महँगो हुँदै गएको छ । अनलाइन विक्रीमा पनि सन् २०१९ को पहिलो अर्धवार्षिक अवधिमा करीब १८ प्रतिशतले घटेको छ । चीनको आर्थिक वृद्धिमा मन्दी आएको छ । यद्यपि, अघिल्लो वर्षको तुलनामा कम्पनीको मुनाफा भने सो अवधिमा करीब ३ अर्ब डलरले बढेको कम्पनीले बताएको छ । 
अलिबाबाको इ–कमर्श प्लेटफर्मबाट गत वर्ष ८ खर्ब ५३ अर्ब डलर बराबरको कारोबार भएको थियो । तर, अमेरिकाको सर्वाधिक ठूलो इ–कमर्श कम्पनी अमेजनबाट २ खर्ब ७७ अर्ब डलरको कारोबार भएको थियो ।     

को हुन् मा ?
माको जन्म पूर्वी चीनको हाङचाउ शहरमा सन् १९६४ को सेप्टेम्बर १० मा एक गरीब परिवारमा भएको थियो । उनले आप्mनो करियरको शुरुआत शिक्षण पेशाबाट गरेका थिए । कम्प्युटिङको पृष्ठभूमि नै नभएको माले १७ जना साथी र विद्यार्थीहरूसँग मिलेर सन् १९९९ मा आप्mनै अपार्टमेन्टमा अलिबाबाको स्थापना गरेका थिए । आफ्नो अनलाइन मार्केटप्लेसमा लगानी गर्न उनले साथीहरूलाई निकै मनाउनु परेको थियो । यसअघि पनि कम्पनी स्थापना गर्ने उनको दुईओटा प्रयास असफल भइसकेको थियो । तर, अलिबाबाबाट भने उनले निराश हुनु परेन । 

समय बित्दै जाँदा अलिबाबा अनलाइन मार्केटप्लेसबाट विशाल इ–कमर्श कम्पनी बन्यो । अहिले अलिबाबाको सम्पत्ति ४ खर्ब ८० अर्ब डलर पुगेको छ । अलिबाबाकै कारण मा पनि चीनको सबैभन्दा धनी व्यक्ति बन्न सफल भएका छन् । अमेरिकी व्यावसायिक पत्रिका फोब्र्सका अनुसार उनको सम्पत्ति साढे ३८ अर्ब डलरभन्दा धेरै छ । सन् २००३ मा इ–कमर्श कम्पनीका रूपमा विस्तार हुनुपूर्व अलिबाबाले व्यवसायीहरूका लागि ट्रेडिङ मञ्चको रूपमा काम 
गर्ने गर्थ्यो । 

मामा प्रविधिको खासै ज्ञान नै थिएन अनि उनीसँग धेरै पैसा पनि थिएन । 

तर प्रतिभा र रणनीतिक दृष्टिकोण नै माको सबैभन्दा ठूलो सम्पत्ति बन्योे । कर्मचारी, उपभोक्ता र मुख्यतः शेयरधनीहरूलाई मनाउन सक्ने उनको क्षमता राम्रो छ । यस मामिलामा उनी जादूगर नै हुन् भने पनि हुन्छ । तर माले अबको दिनमा परोपकार र शिक्षामा आफ्नो समय दिने योजना बनाएका छन् । कुनै समय अंग्रेजीका शिक्षकबाट आफ्नो करियर शुरू गरेका माले असल शिक्षक बन्ने धोको लिएका छन् । एजेन्सी


 

प्रतिक्रिया [0]
प्रतिक्रिया दिनुहोस्