arthik abhiyan
ad banner

नेपाल–भारत–चीन एक्स्पो फेब्रुअरीमा

Sep 12, 2019 
बजार
Image Not Found
author avatar अभियान संवाददाता


काठमाडौं ।नेपाल भ्रमण वर्ष २०२० का अवसरमा प्यासिफिक एशिया ट्राभल एशोसिएशन (पाटा) नेपाल च्याप्टरले नेपाल इन्डिया चाइना एक्स्पो (नाइस) गर्ने भएको छ । भ्रमण वर्ष सचिवालय र नेपाल पर्यटन बोर्डको सहकार्यमा आगामी सन् २०२० को फेब्रुअरी २१ देखि २४ तारिखसम्म एक्स्पो हुने पाटाले जानकारी दिएको छ ।

एक्स्पोमा चीन र भारतबाट पर्यटनसम्बद्ध व्यवसायी र निजी तथा सरकारी निकायका सरोकारवाला सहभागी हुने बुधवार आयोजित पत्रकार सम्मेलनमा जानकारी दिइएको छ । नेपालको भारत र चीन दुवैसँग दुईपक्षीय व्यापार विस्तार एवम् पारस्परिक सम्बन्ध रहेको भए पनि त्रिदेशीय पर्यटन प्रवद्र्धनका निम्ति भने यो पहल पहिलो भएको पाटाको दाबी छ । पाटाले नेपाललाई हिमालयको प्रवेशद्वारका रूपमा ब्रान्डिङ गर्दै हिमालयन ट्राभल मार्ट समेत गर्दै आएको छ । 

उक्त एक्स्पोमा २०० भन्दा बढी क्रेता, १०० विक्रेता, चीन र भारतका ५० भन्दा बढी सञ्चारकर्मी, विज्ञ वक्ता लगायत पर्यटनसँग सम्बद्ध स्थानीय संघसंस्था, सरकारी निकाय, सञ्चारकर्मी तथा सरोकारवाला गरी १ हजारभन्दा बढी सहभागी हुने पाटा नेपाल च्याप्टरका प्रमुख कार्यकारी अधिकृत सुरेशसिंह बुडालले जानकारी दिए । 

एक्स्पोले तीनओटै मुलुकबीच एकीकृत पर्यटकीय सम्भावना र व्यापारिक अवसर पहिचान गर्न तथा तीनै देशबीचको सम्बन्ध थप प्रगाढ बनाउन महŒवपूर्ण भूमिका खेल्ने पाटा नेपाल च्याप्टरका अध्यक्ष सुनिल शाक्यले बताए । नेपाली पर्यटन क्षेत्रको प्रवद्र्धन र विकासका लागि एक्स्पोले ठूलो सहयोग गर्ने भ्रमण वर्ष संयोजक सुरज वैद्यले बताए । उनले एक्स्पोले नेपाल सरकारले लिएको भ्रमण वर्षको लक्ष्य प्राप्ति तथा सन् २०३० सम्ममा ५० लाख पर्यटक ल्याउने लक्ष्य पूरा गर्न आधार तयार पार्ने बताए । चीन र भारत विश्वकै ठूला पर्यटन बजार भएकाले यसको केही प्रतिशत पर्यटक मात्रै नेपाल भिœयाउन सके पर्यटकको संख्या बढ्ने होटल संघ नेपाल ‘हान’ की अध्यक्ष सृजना राणाले बताइन् । चीन र भारतको पर्यटक आगमन हेर्दा नेपालले पर्यटनको सम्भावना हुँदाहुँदै पनि लाभ लिन नसकेको अवस्थामा एक्स्पोले पर्यटन प्रवर्द्धनमा सहयोग पुर्‍याउने पाटाका महासचिव विभूतीचन्द ठाकुरले उल्लेख गरे । 

२०१८ को तथ्यांकअनुसार चीनबाट वार्षिक १५ करोड पर्यटकले विश्व भ्रमण गर्ने गरेकोमा जम्मा शून्य दशमलव १ प्रतिशतले र भारतका २ करोड ५८ लाख ५० हजार आउटबाउन्ड पर्यटकमध्ये शून्य दशमलव ७५ प्रतिशतले मात्र नेपाल भ्रमण गरेका छन् । नेपाल पर्यटन बोर्डको तथ्यांक अनुसार सन् २०१८ मा नेपालमा भारतबाट १ लाख ७८ हजार १३० जना र चीनबाट १ लाख ३४ हजार ३६२ जना पर्यटक नेपाल आए । यी दुई नेपालमा सबैभन्दा बढी पर्यटक आउने मुलुक हुन् ।

प्रतिक्रिया दिनुहोस्