arthik abhiyan
ad banner

न्यूनतम आवश्यकता पूरा गर्दै दिगो विकासमा अघि बढ्छौं

Sep 30, 2019 
अन्तरवार्ता
Image Not Found
खड्ग खत्री, नगर प्रमुख, कमलामाई नगरपालिका, सिन्धुली

जनप्रतिनिधि निर्वाचित भएर आइसकेपछि सिन्धुलीको कमलामाई नगरपालिकाले विकास निर्माणका कामलाई प्राथमिकता दिएको छ । नगरको स्रोत र साधनले भ्याएसम्म विकासका योजना सञ्चालन गरिएको नगर प्रमुख खड्ग खत्री बताउँछन् । निर्वाचनको बेला पार्टीले बनाएको घोषणापत्र अनुसार अहिले काम भइरहेको उनको दाबी छ । प्रस्तुत छ, नगरका विकास गतिविधि, समस्या, चुनौती, भावी योजना लगायत विषयमा आर्थिक अभियानका सिन्धुली संवाददाता एलएन शर्माले नगर प्रमुख खत्रीसँग गरेको कुराकानीको सार :

तपाईं नगर प्रमुख भएर आएपछि यहाँका जनताले महसूस गर्नेगरी भएका विकासका काम के के हुन् ?
निर्वाचित भएर आउनुअघि हामीले निर्वाचनको बेलामै नगरको विकासका लागि गर्न सकिने कामहरू घोषणा गरेका थियौं । त्यसमा मुख्यतः पूर्वाधार विकास नै हो । हामी आइसकेपछि नगरको पूर्वाधार विकासले गति लिएको छ । सिन्धुलीगढीको पर्यटन प्रवद्र्धनको काम अघि बढाएका छौं । स्वास्थ्यको क्षेत्रमा पनि धेरै काम भएका छन् । मोतियाविन्दु, आङ खस्ने, हर्निया जस्ता रोगको निःशुल्क उपचारको व्यवस्था गरेका छौं । शैक्षिक गुणस्तर सुधारका लागि पनि कार्यक्रम सञ्चालन भएका छन् । यो नगरपालिका अहिले दूध र मासुमा आत्मनिर्भर भएको छ ।

गत आवमा पूर्वाधार विकासमा के कस्ता काम भए ? 
पहिलो कुरा त नगरपालिकाले कुनै पनि योजना बहुवर्षीय बनाएको छैन । अहिले आएर सिन्धुलीगढीको पुनर्निर्माण र नगरपालिकाका वडा नं ९ र १० जोड्ने पुल वहुवर्षीय बन्दै छ । गतवर्ष केही सडक कालोपत्र गर्‍यौं । सिन्धुलीगढीको पूर्वाधार निर्माणमा केही काम भएको छ । गतवर्ष योजनाको डीपीआर बनाउनेतर्फ केन्द्रित भयौं । नगर क्षेत्रमा पाँचओटा प्रतीक्षालय निर्माण गर्‍यौं । विगत २ वर्षको अवधिमा करीब १० किलोमिटर बाटो कालोपत्र गरिएको छ ।

विकास बजेट कार्यान्वयनका समस्या र चुनौती के के छन् ?
यहाँको मौसमको कारण असार–साउनदेखि भदौ–असोजसम्म काम गर्न सक्दैनौं । त्यस्तै चेतनाको अभावले गर्दा पनि विकास निर्माणमा समस्या परेको छ । फागुन–चैतमै सक्नुपर्ने काम लम्बिएर असार मसान्तसम्म पुग्ने गरेको छ । तर कमलामाई नगरपालिकाको सन्दर्भमा भने बजेट खर्च गर्न नसकेर फ्रिज भएको छैन । 

बजेट फ्रिज भएको छैन भन्नुभयो, यो कसरी सम्भव भयो ?
उपभोक्ता समिति वा ठेकदार मार्फत भएका काम चाँडो सक्न ताकेता गरेका गर्नुपर्छ । दिएको सीमाभित्र काम हुँदैन भने कारबाहीको प्रक्रियामा जानुपर्छ । नगरले पनि यही तदारुकता साथ काम गरेकाले बजेट फ्रिज हुने अवस्था आएको छैन ।

शिक्षा, स्वास्थ्य र रोजगारी प्रवर्द्धनका लागि नगरले कसरी काम गर्दै छ ?
जुन जुन स्थानमा मावि विद्यालय थिए दरबन्दी थिएनन्, त्यहाँ दरबन्दीको व्यवस्था गरेका छौं । आगामी दिनमा शिक्षामा नयाँ योजना तथा कार्यक्रम ल्याउँदै छौं । जुन बालबालिका विद्यालय जान सक्ने अवस्थामा छैनन्, विद्यालय पोशाक, कापीकलम नभएर विद्यालय गएका छैनन्, त्यस्ता बालबालिकालाई सहयोग गरेका छौं । स्वास्थ्यको क्षेत्रमा सबै वडामा शहरी स्वास्थ्य क्लिनिकहरू सञ्चालन गरेका छौं । बर्थिङ सेन्टरको स्थापना भएका छन् । कुनै पनि ठाउँमा औषधि उपचारको अभाव हुन दिएका छैनौं । रोजगारीको क्षेत्रमा विभिन्न समूहलाई शीपमूलक तालीम दिएका छौं । शीप सिकेकाहरूले सम्बन्धित उद्यम व्यवसाय गर्न चाहेमा किस्ताबन्दीमा साँवा फिर्ता गर्नेगरी विनाब्याज ऋण दिने व्यवस्था गरेका छौं ।
 
शहरी विकास तथा व्यवस्थापनका लागि के गरिँदै छ ?
शहरीकरणमा फोहोरमैला व्यवस्थापन मुख्य चुनौती हो । नगरपालिकाले विभिन्न टोल सुधार समिति र सरोकारवाला निकायसँगको सहकार्यमा फोहोरमैला व्यवस्थापन तालीम, गोष्ठी आयोजना गरेका छौं । यसका लागि समुदायको तर्फबाट हुन सक्ने कामबारे छलफल र परामर्श भएका छन् । सोही अनुसार सबैले आआप्mनो तर्फबाट सहयोग गर्नुपर्छ । बजार क्षेत्रमा भत्किएका कालोपत्र सुधार गरिएको छ । अप्रिय घटना हुन नदिन तथा निगरानीका लागि सीसी क्यामेरा जडान गरिएका छन् । रातभर सडक उज्यालो बनाउन सोलार बत्तीको व्यवस्था गरेका छौं ।

नगरको विकासमा चुनौती के देख्नुहुन्छ ?
सबैभन्दा ठूलो चुनौती हामीमा चेतनाको कमी छ । जनतालाई सबै काम नगरले गर्छ भन्ने छ । आप्mनो भूमिका, दायित्व र कर्तव्यबारे खासै सोचेको पाइएन । हामी अधिकार मात्र माग्ने भयौं, कर्तव्य वहन गरेनौं । अर्को चुनौती आर्थिक अभाव पनि हो । २० करोड रुपैयाँ लाग्ने योजनाका लागि ५ करोड मात्र दिन सक्ने अवस्था छ । त्यसो हुँदा उक्त योजना सक्न ४ बर्ष लाग्छ । ४ वर्षसम्ममा पहिले शुरू गरेको काम बिग्रि–भत्किसकेको हुन्छ ।

दिगो विकासको अवधारणलाई कसरी अवलम्बन गर्नु भएको छ ?
बजेट मात्र होइन, चेतनाको हिसाबले पनि दिगो विकासका योजना तर्जुमा गर्नुपर्ने आवश्यकता बोध गरेका छौं । दिगो विकासका १७ ओटा सूचक छन् । यीमध्ये हामीले केही पूरा गरेका छौं । यस्ता सूचक एकैपटक पूरा गर्न सम्भव छैन । दिगो विकासका लागि पहिलो कुरा त खाना, नाना, स्वास्थ्य, शिक्षा लगायत आवश्यकता पूरा हुनुपर्‍यो । मानिस खाली पेटमा कालोपत्र बाटो हिँड्न सक्दैन । त्यसैले उसको न्यूनतम आवश्यकता पूरा भयो कि भएन भन्नेमा हामीले ध्यान दिनुपर्छ । त्यसैले हेर्दा सामान्य लाग्ने, तर खास समस्या समाधान गर्दै दिगो विकासको लक्ष्यमा अघि बढ्ने योजना छ ।

प्रतिक्रिया [0]
प्रतिक्रिया दिनुहोस्