ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

दशैंका प्रमुख शक्तिपीठहरू

Oct 3, 2019  
अभियान परिशिष्ट (सप्लिमेन्ट)
Image Not Found
author avatar अभियान संवाददाता

बडादशैंमा घटस्थापनाको दिनदेखि नै विभिन्न शक्तिपीठमा पूजाअर्चना गरिन्छ । यी पीठहरूमा पूजाअर्चना गर्नुको पछाडि अनेकौं धार्मिक विश्वास एवं किंवदन्ति जोडिएका छन् । दशैंमा विशेषगरी महाकाली, महालक्ष्मी, महासरस्वती, अम्बिका, उमा, दुर्गालगायत विभिन्न स्वरूपमा नवदुर्गाको पूजा गरिन्छ । काठमाडौंका शोभा भगवती, दक्षिणकाली र भद्रकाली, नुवाकोटको भैरवी, गोरखाको मनकामना, काभ्रेको पलाञ्चोक भगवती लगायत मठमन्दिरमा घटस्थापनादेखि नै देवीदर्शन र पूजाअर्चनाका लागि भक्तजनको भीड लाग्छ । भक्तपुरमा अष्टमातृका शक्तिपीठहरूमा तिथिअनुसार पूजा, आराधना गरिन्छ ।

देशका प्रमुख शक्तिपीठहरू
श्री दन्तकाली : यो मन्दिर सुनसरी जिल्लाको धरानमा पर्छ । पौराणिक मान्यता अनुसार सत्ययुगमा सतीदेवीको दाँत पतन भएको हुनाले दन्तकाली नाम रहेको हो । यस मन्दिरमा बडादशैंको शुरू दिन घटस्थापनादेखि नै विविध पूर्वक पूजा, आराधना गरिन्छ । 

पाथीभरा : ताप्लेजुङको पाथीभरा देवीस्थानमा पनि दशैंमा मेला लाग्ने गर्छ । यो समयमा यहाँको मौसम अनुकूल हुने भएकाले यात्रा कठिनपूर्ण भए पनि धर्मावलम्बीहरू पुग्ने गर्छन् । 

छिन्ताङ भगवती : छिन्ताङ धनकुटा जिल्लाको प्रसिद्ध देवस्थल हो । यो मन्दिर धनकुटा बजारबाट १६ किलोमिटर पश्चिममा छ । यो मन्दिरलाई जालपादेवीको मन्दिर पनि भनिन्छ । यहाँ दशैंमा भव्य मेला लाग्ने गरेको छ ।

कंकालिनी : कंकालिनी मन्दिर सप्तरी जिल्लाको राजविराजदेखि २३ किलोमिटर पूर्व हनुमाननगर कंकालिनी नगरपालिकामा पर्छ । कंकालिनी मन्दिर भक्तजनको मनोकामना पूरा गर्ने शक्तिपीठमध्ये एक पीठ मानिएकाले नेपाल र भारतका भक्तजनको महŒवपूर्ण आस्थाको केन्द्र छ । यस मन्दिरमा महान् चाड दशैंमा ठूलो मेला लाग्ने गर्छ । 

गढीमाई : बाराको गढीमाईमा पनि दशैंमा ठूलो मेला लाग्ने गर्छ । 

गुह्येश्वरी : बाग्मती नदीको किनारमा रहेको गुह्येश्वरी मन्दिर सतीदेवीको गुह्य पतन भएको स्थानका रूपमा मानिन्छ । यस मन्दिरमा सर्वप्रथम तेत्तीसकोटि देवताले पूजाआराधना गरेको पौराणिक मान्यता छ । गुह्येश्वरीमा पनि घटस्थापनादेखि नै विशेष पूजाआराधना हुने गरेको छ । 

पलाञ्चोक भगवती : काभ्रेको पाँचखालस्थित पलाञ्चोक भगवती मन्दिरमा पनि बडादशैं अवधिभर मेला लाग्ने गर्छ । पाँचखाल उपत्यकाबाट ७ किलोमिटर दूरीमा रहेको यो मन्दिरमा पनि पूजाअर्चनाका लागि धर्मालम्बीहरूको भीड लाग्छ । 

कालिञ्चोक : दोलखाको कालिञ्चोक देवीस्थानमा पनि बडादशैंमा विशेष पूजाआजा हुने गर्छ । हिमालको काखमा रहेको यस ठाउँमा बडादशैंमा आन्तरिक पर्यटकको भीड लाग्ने गर्छ । 

बगलामुखी : पाटन दरबारबाट केही मिनेट उत्तरमा पर्ने बगलामुखी कुम्भेश्वर मन्दिरपरिसरमा रहेको छ । तन्त्रशास्त्र अनुसार १० महाविद्यामध्ये बगलामुखी पनि एक हुन् । यस मन्दिरमा पनि नवरात्र शुरू भएसँगै दर्शनार्थीको भीड लाग्ने गरेको छ । बिहीवार विशेष भीड हुने बगलामुखीको दर्शनबाट मनोकांक्षा सिद्धि हुने विश्वास गरिन्छ ।

दक्षिणकाली : राजधानी काठमाडौंबाट दक्षिणी भेगमा करीब १७ किमि दूरीमा रहेको कालीदेवीको मन्दिर नै दक्षिणकाली मन्दिर हो । यो मन्दिरमा कालीको मूर्तिबोहक अन्य देवीदेवताका मूर्ति पनि छन् । यस मन्दिरमा पनि घटस्थापनादेखि नै भक्तजनको भीड बढ्छ । 

मनकामना : गोरखाको मनकामना मन्दिर नपुग्ने मानिस सायदै कम होलान् । यस मन्दिरमा पनि बडादशैंमा दर्शनार्थीको भीड लाग्छ । 

कालिकादेवी : लमजुङको बेँसीशहरबाट २ घण्टा उकालो चढेपछि पुगिने कालिकादेवीको मन्दिरमा महानवमीका दिन विशेष पूजाआजा हुन्छ । यसलाई ‘लमजुङ कालिका’ पनि भनिन्छ ।

श्री वागेश्वरी : बाँके, नेपालगञ्जमा अवस्थित यस स्थलमा सतीदेवीको जिब्रो पतन भएको मान्यता छ । यस स्थानमा सर्वप्रथम किन्नर गणले पूजाआराधना गरेको मानिन्छ । साथै नवरात्रभर यस मन्दिरमा पनि भक्तजनको भीड लाग्ने गरेको छ ।

सुपा देउराली : अर्घाखाँचीको सुपा देउराली पनि महत्त्वपूर्ण शक्तिपीठ हो । पूर्वपश्चिम राजमार्गस्थित कपिलवस्तुको गोरुसिंगेबाट सन्धिखर्क जाने यो मन्दिरमा १२ महीनै भीड लाग्ने गर्छ । 

अर्घाकोट भगवती : अर्घाखाँचीको नरपानीबाट १६ किलोमिटर उत्तरमा यो मन्दिर छ । दशंैमा यहाँ विशेष मेलाका साथै पशुबलि दिने चलन छ ।

चन्दननाथ दत्तात्रय : जुम्लाको खलंगास्थित चन्दननाथको मन्दिर जुम्लाकै प्रसिद्ध मन्दिर हो । दत्तात्रय भनिने यो मन्दिरमा पूजाआजा नगरे देशमा अनिष्ट हुन्छ भन्ने भनाइ छ । घटस्थापनाको दिन मन्दिरको लिंगो फेर्ने चलन छ । दशैंमा सामान्य घुइँचो लाग्ने यो मन्दिरमा तीज, शिवरात्रि तथा एकादशीमा मेला लाग्छ । 

त्रिपुरा सुन्दरी : डोल्पा जिल्लाको जुफाल जुफाल विमानस्थलबाट करीब २ घण्टा पैदल हिँडेपछि भेरी नदी आउँछ । त्यही भेरी नदीको किनारमा प्रसिद्ध त्रिपुरासुन्दरीको मन्दिर छ । चैतेदशैं र बडादशैंमा ठूलो मेला लाग्ने यो मन्दिर डोल्पावासीको शक्तिकेन्द्र हो । 

देवलहाट मन्दिर : बैतडीको सदरमुकामबाट ५ सय मिटर दूरीमा रहेको देवलहाटको मन्दिर पाण्डवहरूले वनवासको अन्त्यतिर बनाउन लगाएको जनश्रुति छ । युद्धका बेला पाण्डवहरूले असत्यमाथि विजय गर्न पाऊँ भन्ने कामना गर्दै यो मन्दिर बनाएका थिए । 

मालिकादेवी : मालिकादेवीको मन्दिर बाजुरा जिल्लाको १४ हजार ४ सय फिट उचाइमा छ । यहाँनिकै पहिलेदेखि नै शक्तिकेन्द्रका रूपमा पूजा गरिँदै आएको छ । 

बडी मालिकास्थान : बडी मालिका मन्दिर मार्तडीबाट ३ दिनको पैदलयात्रापछि पुगिन्छ । १२ हजार २ सय १९ फीट उचाइमा अवस्थित यो मन्दिरमा दशंै र चैतेदशैंमा ठूलो मेला लाग्छ । यहाँ अष्टमीमा बलि दिएर टीका भेट्न घर पुग्ने चलन छ ।

काठमाडौंमा पूजिने मन्दिरहरू
काठमाडौंमा देवीका प्रसिद्ध मन्दिरहरूमा नरदेवी, शोभाभगवती, नक्साल भगवती, कंकेश्वरी, मैतीदेवी, कालिकास्थान, संकटा, भद्रकाली, रक्तकाली, हाडीगाँउस्थित मनमानेश्वरी मन्दिर, टुँडालदेवी, कमलाक्षी, वज्रवाराही लगायत पर्छन् ।

प्रतिक्रिया [0]
प्रतिक्रिया दिनुहोस्