arthik abhiyan
ad banner Mango Tech Digital Marketing Solution

अर्थमन्त्री डा. खतिवडा अमेरिका प्रस्थान, विश्व बैंक र आईएमएफका वरिष्ठ अधिकारीहरुसँग द्विपक्षीय छलफल हुने

Oct 15, 2019 
समाचार
Image Not Found
author avatar अभियान संवाददाता

असोज २८, काठमाडौं । विश्व बैंक समूह र अन्तरराष्ट्रिय मुद्रा कोष (आईएमएफ) को संयुक्त वार्षिक बैठकमा सहभागी हुन अर्थमन्त्री डा. युवराज खतिवडा मंगलवार संयुक्त राज्य अमेरिका प्रस्थान गरेका छन् । विश्व बैंक र अन्तरराष्ट्रिय मुद्रा कोष अन्तर्गत नेपाल दक्षिण पूर्व एशियाली मतदान समूहको सदस्य रहेको सन्दर्भमा सो समूहद्वारा आयोजना हुने संयुक्त बैठकमा अर्थमन्त्री डा. खतिवडा सहभागी हुने कार्यक्रम रहेको उनको सचिवालयले जानकारी गराएको छ । अर्थमन्त्री डा. खतिवडा कात्तिक ६ गते स्वदेश फर्किने कार्यक्रम छ ।

सो अवसरमा अर्थमन्त्री डा. खतिवडाले विश्व बैंक समूह तथा अन्तरराष्ट्रिय मुद्रा कोषका वरिष्ठ अधिकारीहरुसँग द्विपक्षीय छलफल गर्नेछन् । उनले अन्तरराष्ट्रिय विकास संस्थाबाट नेपालको नीतिगत सुधारको लागि प्राप्त हुँदै आएको सहायतालाई थप प्रभावकारी बनाउने उपायलगायत सहायताका थप क्षेत्र र सम्भावना बारे विस्तृत छलफल गर्ने बताइएको छ ।

बैठकमा सहभागी हुने सिलसिलामा संघीयता कार्यान्वयनको क्रममा नेपालले हासिल गरेका अनुभवको आदान प्रदान गर्ने कार्यक्रममा अर्थमन्त्री डा. खतिवडा सहभागी हुने छन् । साथै विश्व बैंकको अन्तरराष्ट्रिय विकास संस्थासँग नेपालको सहकार्य ५० वर्ष पुगेको अवसरमा आयोजना हुने कार्यक्रममासमेत अर्थमन्त्री सहभागी हुने छन् । नेपाललाई सहयोग गरिरहेका अन्य दातृ मुलुक तथा संस्थाका उच्च पदाधिकारीहरुसँग पनि उनले द्विपक्षीय भेट गर्ने बताइएको छ ।

दक्षिण एशियाली क्षेत्रीय सहयोग संगठन (सार्क) को अध्यक्षता हाल नेपालले गरिरहेको परिप्रेक्ष्यमा सार्कका अर्थमन्त्रीहरु सम्मिलित अनौपचारिक बैठकको अध्यक्षता समेत अर्थमन्त्री डा. खतिवडाले गर्नेछन् । भ्रमणका क्रममा अर्थमन्त्री डा. खतिवडाले एशियाली विकास बैंकका उपाध्यक्षसँग समेत आपसी सहयोगका विषयमा छलफल गर्ने उनको सचिवालयले बताएको छ । प्रतिनिधिमण्डलमा अर्थ मन्त्रालय, अन्तरराष्ट्रिय आर्थिक सहायता समन्वय महाशाखाका सह सचिव श्रीकृष्ण नेपाल समेत सहभागी हुनेछन् ।

प्रतिक्रिया [0]
प्रतिक्रिया दिनुहोस्