ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

स्मार्ट लाइसेन्सको असफलता

Nov 1, 2019  
सम्पादकीय
NA


यातायात व्यवस्था विभागले स्मार्ट सवारी चालक अनुमतिपत्र (लाइसेन्स) छाप्ने मास प्रिन्टर ल्याएको साढे २ महीना बितिसक्दा पनि लाइसेन्स छपाइको काम शुरू भएको छैन ।
 
लाइसेन्सको माग अत्यधिक भएपछि ठूलो संख्यामा कार्ड छाप्ने मेशिन मास प्रिन्टर किन्ने निर्णय विभागले गरेको थियो । प्रतिघण्टा ५ सयका दरले कार्ड छपाइ हुने भएकाले केही समयमा नै स्मार्ट कार्डको समस्या समाधान हुने उसको दाबी थियो । तर, प्रिन्टरसमेत सञ्चालन गर्न नसकेर विभागले आफ्नो अक्षमता पुष्टि गरेको छ । त्यसो त विभागले अनेक बहाना बनाउँदै सवारी चालक अनुमतिपत्रमा सेवाग्राहीलाई दुःख दिएको छ । त्यस्तै बिचौलिया खडा गरेर सेवाग्राहीबाट अवैध रकम असुलेको आरोपसमेत विभागमाथि लाग्दै आएको छ ।

एउटा कार्ड पनि छापेर दिन नसक्दा नेपालको कर्मचारी संयन्त्रको अकर्मण्यता र गैरजिम्मेवारी स्पष्ट देखिएको छ ।

सवारी चालक अनुमतिपत्रलाई अत्याधुनिक बनाउने भन्दै सरकारले २०७२ मङ्सिरदेखि स्मार्ट लाइसेन्स वितरण शुरू गरेको थियो । शुुरूमा काठमाडौंबाट मात्र वितरण गरिएको यो कार्ड पर्याप्त तयारीविनै २०७४ देखि देशभरका विभागका कार्यालयबाट उपलब्ध गराउन थालेपछि समस्या बढेको हो । कार्ड छाप्ने मेशिनसमेत व्यवस्था गर्न नसक्ने र सञ्चालन गर्न नसक्ने विभागको कामका कारण देशकै बेइज्जत हुने अवस्था आएको छ । एउटा कार्ड पनि छापेर दिन नसक्दा नेपालको कर्मचारी संयन्त्रको अकर्मण्यता र गैरजिम्मेवारी स्पष्ट देखिएको छ ।

सवारी चालक अनुमतिपत्रको माग कति छ र त्यसलाई कसरी व्यवस्थित गर्ने भन्ने काम यातायात व्यवस्था विभागको हो । यसका लागि लिखित तथा प्रयोगात्मक परीक्षालाई व्यवस्थित गर्नु र उत्तीर्ण व्यक्तिलाई अनुमतिपत्र दिनु पनि उसको जिम्मेवारी हो । तर, प्रमुख फेरिएको बहानामा वा अन्य कारणले विभागले कुनै पनि काम तोकिएको समयमा गर्न सकेको छैन, सेवाग्राहीलाई झन्झटमा पार्न छाडिएको छैन । स्मार्ट कार्डकै कुरा गर्ने हो भने कहिले ठेक्का नलागेको, कहिले ठेकेदारले सम्झौता अनुसार काम नगरेको, कहिले प्रिन्टर बिग्रिएको त कहिले नेट नभएको भन्दै सेवाग्राहीलाई झुलाउने गरेको छ ।
 
विभागको कार्यशैली हेर्दा समस्याको दिगो समाधानभन्दा पनि टालटुल गर्दै यसलाई लम्ब्याउने र सेवाग्राहीका अगाडि अनुमतिपत्र प्राप्त गर्नु भनेको निकै गाह्रो काम हो भन्ने प्रमाणित गर्नु हो जस्तो लाग्छ । अन्यथा एउटा व्यक्तिले गर्न सक्ने छपाइको काम सरकारको यत्रो ठूलो संयन्त्रले गर्न नसक्ने भन्ने पनि हुन्छ ?
 
कार्ड छपाइ ढिला हुनुमा विभागले जेजस्ता तर्कहरू दिएको छ ती पत्याउन लायक नै देखिँदैनन् । ठेक्का अनुसार प्रिन्टर आपूर्ति भएन, प्रिन्टर चलाउन जान्ने दक्ष कामदार भएनन् जस्ता तर्क पत्याउन लायक देखिँदैनन् । आपूर्तिकर्ता कम्पनीले नै यस्तो मेशिन सञ्चालनको तालीम दिने र केही समय सेवा दिने प्रचलन नै छ । तर, मेशिन आइसकेको अढाइ महीनासम्म पनि छपाइ नै गर्न नसक्नु त राष्ट्रिय लज्जाको विषय नै हो । ठेक्का अनुसार काम नभएको भए आपूर्ति गर्ने कम्पनीलाई कारबाही गर्ने अधिकार विभागसँग हुन्छ । तर, अरूलाई दोष देखाएर आफू ‘पानीमाथिको ओभानो’ बन्न चाहिँ पाइँदैन ।

अहिले ७ लाखभन्दा बढीले चीटको भरमा सवारीसाधन चलाइरहेका छन् । विदेशी नियोगका कर्मचारीहरूलाई पनि यस्तै चीटको भरमा सवारीसाधन चलाउन दिँदा नेपालको कार्यक्षमताबारे पक्कै पनि सकारात्मक सन्देश जाँदैन । लाइसेन्स लिएर वैदेशिक रोजगारमा जान ठीक परेका मानिसको पीडा चर्कै छ । चीट हराउने सम्भावना पनि उत्तिकै छ ।
 
त्यसो त स्मार्ट कार्ड भनिए पनि यस्तो कार्ड पढ्न सक्ने मेशिन जम्मा दुईओटा मात्रै छ, त्यो पनि काठमाडौंमा मात्र । कार्डको वास्तविकता जाँच्नुपरे कार्ड काठमाडौं नै ल्याउनुपर्ने बाध्यता छ । यस्तोमा स्मार्ट कार्ड भनेर सेवाग्राहीलाई दुःख दिनु गलत हो ।
 
राष्ट्रिय परिचयपत्रसँग यसलाई पनि आबद्ध गर्ने सरकारी तयारी छ । तर, लाइसेन्समा देखिएको बेथिति राष्ट्रिय परिचयपत्रमा पनि नहोला भन्न सकिँदैन ।

 

प्रतिक्रिया [2]
User Image

Tek Thulung Rai

[Nov 1, 2019 03:42am]

सर्कार्ले जोकोही वा जुनसुकै बिभागका प्रत्यक कर्मचारिलाइ पाउने सुबिधा दियेकै छ जुन चिजको आवस्यक्ता पर्छ त्यस्को निम्ती राज्यबाट उपलब्ध नभयेको त सुन्नमा आयेको छैन सानो पृन्टरबाट ढिला-सुस्तिका कारन ठूलो पृन्टर्को माग बमोजिम प्राप्त भयेपछि बिभागले पनि लाइसेन्स्को राजश्व लियेर सरल र छिटो गरि उपलब्ध गराउनु बिभागको परम कर्तब्य हो यो पनि नभय सर्कार्ले सिधै कार्बाही गर्ने हो मास पृन्टर भयेर पनि किन बिभागले अटेर र लापर्बाही गर्छ किन दुनियालाइ किन दुख दिन्छ किन सर्कार चुप लागेर बस्छ अझै किन भ्रस्टचार,किन अत्यचार,जन्ता चुप लागेर बस्तैन जन्ता सचेत छ यस्तो अपराधिलाइ छिटो भन्दा छिटो कार्बाही होस तु गेट-आउट


User Image

Hari Tandukar

[Nov 1, 2019 01:24am]

यो स्मार्ट लाईसेन्स नै होईन । स्मार्ट लाईसेन्स मा भएको चिप्समा कुनै पनि दाता नै छैन मलाई उपलब्ध गराइएको लाईसेन्स त एउटा स्कुलको विध्यारथी परिचय पत्र जस्तो छ । साधारण कलर थर्मल पृइन्टर बाट पृन्त गरिएको ।


प्रतिक्रिया दिनुहोस्