ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

पूर्वाधार विकासका काम तीव्र पारेका छौं

Nov 6, 2019  
अन्तरवार्ता
Image Not Found
रामचन्द्र चौधरी, प्रमुख, चन्द्रपुर नगरपालिका, रौतहट

रौतहटको उत्तरी क्षेत्रमा पर्ने चन्द्रपुर नगरपालिका जनसंख्या र भौगोलिक हिसाबले जिल्लाकै ठूलो स्थानीय तह हो । पूर्व–पश्चिम राजमार्गसँग जोडिएको यो नगरपालिकाको पूर्वमा सर्लाहीको बाग्मती नगरपालिका, पश्चिममा जिल्लाकै गुजरा नगरपालिका, उत्तरमा मकवानपुरको चुरेफेदी, दक्षिणमा वृन्दावन र गुजरा नगरपालिका पर्छन् । जिल्लाका १८ स्थानीय तहमध्ये चन्द्रपुर नगरपालिका सुगम मानिन्छ । स्थानीय तहको निर्वाचनपछि नगरको विकास निर्माणले गति लिएको नगर प्रमुख रामचन्द्र चौधरी बताउँछन् । प्रस्तुत छ, नगरका विकास गतिविधि, आगामी योजना लगायत विषयमा आर्थिक अभियानका रौतहट संवाददाता दीपेश पौडेलले चौधरीसँग गरेको कुराकानीको सार :

तपाईं नगर प्रमुख भएर आएपछि यहाँका जनताले महसूस गर्नेगरी भएका विकासका काम के के हुन् ?
भाडाको घरमा बस्दै आएको नगरपालिकाको कार्यालयलाई आफ्नै भवनमा ल्याउने योजना थियो । सोही अनुसार प्राथमिकतामा राखेर द्रुतगतिमा भवन निर्माण गर्‍यौं । अहिले नगरपालिकाले आफ्नो भवनबाटै कार्यसम्पादन गरिरहेको छ । जनप्रतिनिधिको जिम्मेवारी पाए पनि कर्मचारी अभाव जस्ता विविध समस्याले नगरपालिकाको काम अस्तव्यस्त थियो । निकै चुनौती र समस्या भएका बेला नगर प्रमुखको जिम्मेवारी पाएका थियौं । त्यसैले यसको व्यवस्थापन गर्दै नगरपालिकाको कामलाई सरल र सहज बनाउन अग्रसर भयौं । नगरवासीले अहिले जनप्रतिनिधि आएको महसूस गर्न पाएका छन् । नगरवासीको समस्या वा गुनासोका बारेमा प्रत्यक्ष संवाद गर्दै आएका छौं । कार्यालयमा आएका सेवाग्राहीले नगरप्रमुखसँग सजिलै जिज्ञासा वा समस्या राख्न सक्ने व्यवस्था गरिएको छ, जस कारण नगरवासीकै संग्लग्नतामा समस्याको समाधान गर्न सकेका छौं । साथै विकासका काममा पनि सहज भएको छ ।

गत आर्थिक वर्षमा पूर्वाधार विकासमा के कस्ता काम भए ?
गतवर्ष पूर्वाधार विकासका कामले गति लिएको छ । जिल्लामा सबैभन्दा बढी कालोपत्र यही नगरपालिकामा भएको छ । करीब २० किलोमिटर सडक स्तरोन्नति गरेका छौं । अन्य सडकको काम पनि अघि बढाएका छौं । आगामी दिनमा १७ किलोमिटर सडक कालोपत्र हुनेछ । नगरलाई स्मार्ट सिटी बनाउने योजना छ । सोही अनुसार पूर्वाधार विकास गर्न लागिपरेका छौं । यस्तै नगरको प्रोफाइल पनि बन्दै छ । नगरपालिकाले अनलाइन प्रणालीलाई विशेष जोड दिएको छ । नगरपालिका तथा वडा कार्यालयका सबैजसो काम यसै प्रणालीबाट हुँदै आएका छन् । नगरभित्रका माध्यमिक विद्यालयहरूमा कम्प्युटर जडान गर्दै छौं । अस्पतालको औषधि लगायत व्यवस्थापनमा नगरपालिकाले सहयोग गरेको छ । यस्तै खेलकुदको क्षेत्रमा पनि काम गरेका छौं । समग्रमा गत आर्थिक वर्षमा पूर्वाधार विकासमा उल्लेख्य काम भएका छन् । 

विकास बजेट कार्यान्वयनका समस्या र चुनौती के के छन् ?
विकास बजेट कार्यान्वयनको मुख्य समस्या र चुनौती भनेको कर्मचारी समायोजन नै हो । कर्मचारी समायोजनका कारण कार्यालयमा कर्मचारीको अभाव छ । स्थानीय तहलाई हरेक किसिमको जिम्मेवारी दिइएको भए पनि कर्मचारी अपुग छ, जस कारण कार्यसम्पादनमा समस्या आउने गरेको छ । योजना सम्पन्न भइसकेको अवस्थामा पनि भुक्तानी समयमै दिन सकिरहेका छैनौं । यी समस्याको मुख्य कारण नै कर्मचारी समायोजन र अभाव हो । 

शिक्षा, स्वास्थ्य र रोजगारी प्रवद्र्धनका लागि नगरले कसरी काम गर्दै छ ?
नगरपालिकाभित्र सामुदायिक विद्यालय ४६ ओटा छन् । यस्तै ४२ ओटा निजी विद्यालय र ५८ ओटा बाल विकास केन्द्र छन् । सबै विद्यालयलाई व्यवस्थित गर्दै एकै प्रकारको शिक्षा अवलम्बन गर्ने योजना छ । सामुदायिक विद्यालयमा पनि अंग्रेजी माध्यमबाट पठनपाठन गर्ने योजना नगरपालिकाले बनाएको छ र केही विद्यालयमा शुरुआत समेत भइरकेको छ । आगामी केही वर्षभित्र सामुदायिक विद्यालयमा अंग्रेजी माध्यमबाट पठनपाठन शुरू हुनेछ, यसले नगरको शिक्षामा सुधार आउने अपेक्षा गरेका छौं । स्वास्थ्यमा पनि उत्तिकै महत्त्व दिएका छौं । साविक गाविसमा रहेका स्वास्थ्य संस्थालाई स्तरोन्नति गरेर हरेक नागरिकको पहुँचमा स्वास्थ्य सेवा पुर्‍याइएको छ । चन्द्रनिगाहपुर सरकारी अस्पताललाई १५ शैय्याको बनाएका छौं भने तीनओटा शहरी स्वास्थ्य केन्द्र खोलेका छौं । नगरमा स्वास्थ्य बीमा कार्यक्रम सञ्चालन भएको छ । यसबाट अधिकांश नगरवासी लाभान्वित भएका छन् । म आफै स्वास्थ्य बीमा समितिको अध्यक्ष समेत भएकाले यो कार्यक्रमको सफल कार्यान्वयनमा जोड दिएको छु ।   

शहरी विकास तथा व्यवस्थापनका लागि के गरिँदै छ ?
शहरी विकासका लागि चन्द्रपुर नगरपालिका स्मार्ट सिटीको अवधारणामा अघि बढेको छ । देशभर प्रस्तावित १३ ओटा स्मार्ट सिटीमध्ये यो नगरपालिका पनि परेको छ । नगरपालिकाले सडक, सूचना तथा प्रविधि लगायत पूर्वाधारको विकासलाई प्राथमिकता दिएको छ । नगरका सबै क्षेत्रमा सूचना तथा प्रविधिको पहुँच पु¥याउने लक्ष्य छ । शहरी विकास अन्तर्गत भौतिक पूर्वाधार विकासमा जोड दिएका छौं । यस्तै पार्क, पर्यटकीय क्षेत्र, खेलमैदान तथा खानेपानीको विकास र व्यवस्थापनमा पनि काम गर्दै छौं । 

तोकिएको समयमा विकास निर्माणको लक्ष्य हासिल गर्न कसरी काम हुँदै छ ?
तोकिएको समयमा विकासको लक्ष्य हासिल गर्ने नगरपालिकाले मापदण्ड अपनाएको छ । धेरै काम गर्न खोजिए पनि विभिन्न कारण सफल भएका छैनौं । विकास निर्माणको लक्ष्य प्राप्त गर्न दक्ष र प्राविधिक जनशक्तिको पनि आवश्यकता पर्छ । तर नगरपालिकामा प्राविधिक जनशक्ति कम भएकाले तोकिएको समयमा चाहे अनुसारको उपलब्धि हासिल हुन सकेको छैन । यद्यपि जनताकै माझमा पुगेर योजना छनोट भएकाले जनचाहना अनुसार नै विकासका काम हुँदै आएका छन् । 

नगरपालिकाको कर सम्बन्धी स्थानीयको भनाइ के छ ?
नगरपालिकामा कर सम्बन्धी गुनासो आउने गरेको छ । घरबहाल करमा राज्यले १० प्रतिशत ताकेको छ । अन्य स्थानीय तहले २ प्रतिशत थपेर १२ प्रतिशत लिने गरेका छन् । तर चन्द्रपुर नगरपालिकाले राज्यले तोकेको जति (१० प्रतिशत)मात्र कर उठाइरहेको छ । नगरपालिकाले करको दायरा फराकिलो बनाएको छ । टेन्डरमार्फत कर संकलनको व्यवस्था गरेका छौं । यसै वर्षदेखि दशमलव ५ प्रतिशतका दरले एकीकृत सम्पत्ति कर लगाएका छौं । 

पर्यटन विकास र प्रवर्द्धनका लागि नगरपालिकाका योजना के के छन् ?
पर्यटन विकास र प्रवद्र्धनका लागि नगरपालिकाले बृहत् योजना अघि सारेको छ । भर्खरै मात्र नगर क्षेत्रभित्र झरना फेला परेको छ, जुन आकर्षणको केन्द्र बन्ने भएकाले यसको विकासका लागि नगरपालिकाले योजना बनाएको छ । नुनथर पर्यटन क्षेत्र, शहीद पार्क, पौराई ब्रम्हथान, कोटिहोम, निजानन्द धाम, डाबरी लगायत धार्मिक तथा पर्यटकीय स्थलमा लगानी गरेका छौं । नगरभित्रका ऐतिहासिक तथा पर्यटकीय स्थलको संरक्षण गरी पर्यटन विकास र प्रवर्द्धन गर्नेछौं । आन्तरिक आय वृद्धिका लागि पनि पर्यटकीय क्षेत्रको महत्त्व छ । त्यसैले पर्यटन विकासलाई पनि प्राथमिकता दिएका छौं । नगरमा आन्तरिक तथा बाह्य पर्यटकको आगमन बढाउन सके यहाँको आर्थिक गतिविधि पनि बढ्ने अपेक्षा गरेका छौं । सरकारले तय गरेको १०० गन्तव्यको सूचीमा मर्धर सिमसार क्षेत्र समेत परेकाले यसको विकासमा जोड दिएका छौं ।

प्रतिक्रिया [0]
प्रतिक्रिया दिनुहोस्