arthik abhiyan
ad banner

चालू वर्षमै ४१ जिल्लामा विद्युतीकरण हुन्छ : ऊर्जामन्त्री पुन

Nov 8, 2019 
समाचार
Image Not Found

कात्तिक २२, घोराही । ऊर्जा, जलस्रोत तथा सिँचाइमन्त्री वर्षमान पुन ‘अनन्त’ले चालू आर्थिक वर्षमै दाङसहित देशका ४१ जिल्लामा विद्युतीकरण गरिने बताएका छन् । उनले देशमा विद्युत् उत्पादनको मात्रा बढिरहेकाले देशका अंधिकांंश जिल्लाका प्रत्येक गाउँबस्तीमा विद्युत पुर्‍याउने सरकारको लक्ष्य पूरा हुन लागेको बताए । ‘पहिलो चरणमा ४१ जिल्ला पूर्णरुपमा विद्युतीकरण गरिन्छ’, उनले भने, ‘आगामी वर्ष अरु थप जिल्लामा  पनि विद्युतीकरण गरिने तयारी छ ।’ मन्त्री पुनले विद्युत्सँगै सौर्य, बायोग्यासलगायत वैकल्पिक ऊर्जाका माध्यमबाट देशलाई उज्यालो बनाउने अभियानमा लागिएको बताए । 

प्रेस सङ्गठन दाङ शाखले शुक्रवार घोराहीमा आयोजना गरेको पत्रकार भेटघाटमा उनले हालसम्म केही विद्युत् भारतबाट आयात गरिए पनि आगामी वर्षदेखि भने निर्यातको चरणमा पुगिने जानकारी दिए । चालू आर्थिक वर्षमा साढे आठ प्रतिशत आर्थिक वृद्धिदर पनि विद्युत्को सहज पहँुचकै कारण सम्भव भएको जिकिर गर्दै मन्त्री पुनले  आगामी वर्षमा थप एक हजार मेगावाट विद्युत् मुख्य प्रसारण लाइनमा जोडिने हुँदा कृषि, ऊर्जा, पर्यटन र होटेल व्यवसायमा लगानीको थप बाटो खुलेको छ भने । 

नेपालले भारत, बङ्गलादेश र चीनसँग विद्युत् बेच्ने सहमति गरिसकेकाले आउँदो १० वर्षमा १५ हजार मेगावाट विद्युत् उत्पादन गरेर यी तिनै देशमा  विद्युत् विक्री गर्ने लक्ष्यका साथ सरकारले काम गरिरहेको पनि जानकारी गराए । सरकारले देशको भौतिक एवं मानवीय विकासका लागि बाह्य र आन्तरिक लगानी बढाइरहेको हुँदा ‘समृद्ध नेपाल सुखी नेपाली’को नारा छिट्टै पूरा हुने मन्त्री पुनले आशा व्यक्त गरे । रासस

प्रतिक्रिया [0]
प्रतिक्रिया दिनुहोस्