arthik abhiyan
ad banner

जुत्ताचप्पलमा स्वदेशी उत्पादनको ६० % हिस्सा, भृकुटीमण्डपमा एक्स्पो शुरु   

Nov 9, 2019 
समाचार
Image Not Found

कात्तिक २३, काठमाडौं । मुलुकको समग्र मागको ६० प्रतिशत जुत्ता स्वदेशी उत्पादनले धानेको छ । आगामी वर्ष ८० प्रतिशत नेपाली जुत्ताले ओगट्ने अपेक्षा लिइएको छ । जाडो मौसमलाई लक्षित गरी ‘विन्टर फुटवेयर बिजनेस एक्स्पो’ शुरु गरिएको छ । 

जुत्ताचप्पल उत्पादक तीन उद्योग मिलेर शुक्रवारदेखि आगामी मंसिर ५ गतेसम्म भृकुटीमण्डपमा सञ्चालन हुने उक्त एक्स्पोमा बिएफ डियर हिल सुज, रन सुज, शिखर सुजका जुत्ताचप्पल रहेका छन् । 

एक्स्पोको उद्घाटन गर्दै प्रदेश ३ का आर्थिक मामिला एवं योजनामन्त्री कैलाश ढुंगेलले देशको विकासका लागि निजी क्षेत्रको महत्वपूर्ण भूमिका हुनेहुँदा व्यवसायमैत्री वातावरण बनाइने प्रतिबद्धता व्यक्त गरे ।     

हरेक वर्ष नेपाली जनताको मागअनुसार जुत्ताको उत्पादन वृद्धि हुँदै गएकामा खुशी व्यक्त गर्दै आफ्नो प्रदेशका कर्मचारीलाई स्वदेशी उत्पादनका लागि प्रेरित गरिने बताए । 

शिखर सुज कम्पनीका अध्यक्ष रामकृष्ण प्रसाईंले उपभोक्तालाई चर्चित ब्राण्डका न्यानो खालका जुत्ता एउटै छानोमुनि सस्तोमा किन्ने सो मेला अभूतपूर्व अवसर हुने बताए । उनले मेलामा ७० प्रतिशतसम्म छुटमा जुत्ताचप्पल उपलब्ध गराइएको बताए ।     

बिएफ डियर हिल सुजका अध्यक्ष होमनाथ उपाध्यायले जाडोमा जुत्ताचप्पल किन्ने उपभोक्तालाई लक्षित गरी मेला आयोजना गरिएको बताए । मेलामा विवाहका मौसमलाई लक्षित थरीथरीका पार्टीसुजसमेत उपलब्ध गराइएको छ । मेलामा रू.२५० देखिका चप्पल तथा रू.५०० देखि जुत्ता उपलब्ध हुनेछन् ।

मेलामा पार्टी, स्पोर्टस्, क्याजुअल, स्कुल, कार्यालयका युनिफर्म जुत्ता, महिलाले लगाउने चप्पल, गमबुटलगायत सबै प्रकारका जुत्ताचप्पल छन् । रासस
 

प्रतिक्रिया [0]
प्रतिक्रिया दिनुहोस्