arthik abhiyan
ad banner Mango Tech Digital Marketing Solution

पर्यटनमा ‘स्याटलाइट अकाउन्टिङ सिस्टम’ 

थप तथ्यांक संकलनका लागि मोेडालिटी तय हुँदै 

Nov 13, 2019  
समाचार
Image Not Found
author avatar टीपी भुसाल

काठमाडौं । पर्यटन क्षेत्रमा ‘स्याटलाइट अकाउन्टिङ सिस्टम’ लागू गर्ने क्रममा आवश्यक तथ्यांक संकलनका लागि नयाँ मोडालिटी तय गरिने भएको छ । नेपाल राष्ट्र बैंक, केन्द्रीय तथ्यांक विभाग र अध्यागमन कार्यालय तथा आफैसँग भएका ‘डेटा इन्ट्री’ गरिरहेको नेपाल पर्यटन बोर्डले सम्बद्ध क्षेत्रका अन्य तथ्यांक समेट्न नयाँ मोडालिटी तय गर्न लागेको हो ।

‘स्याटलाइट अकाउन्टिङ सिस्टम’ पर्यटन क्षेत्रबाट देशको आर्थिक क्षेत्रमा पुर्‍याएको योगदान गणना गर्ने प्रणाली हो । पर्यटन क्षेत्रभित्रका विभिन्न सूचक समावेश गरी यो गणना गरिन्छ । कुल गार्हस्थ्य उत्पादन (जीडीपी) मा अहिले पर्यटन क्षेत्रअन्तर्गतका होटल र ट्राभल कम्पनीबाट मात्र योगदान गइरहेको अवस्थामा उक्त क्षेत्रभित्रकै अन्य क्षेत्रलाई मुलुकको अर्थतन्त्रसँग जोड्नका लागि यसले सहयोग गर्नेछ । यसका लागि एक दर्जनभन्दा बढी सर्वे पूरा गरी ‘डेटा इन्ट्री’ शुरू गरिएको पर्यटन मन्त्रालयले जानकारी दिएको छ ।  

नेपालको समग्र अर्थतन्त्रमा पर्यटन क्षेत्रको योगदानलाई बढाउन चालू आर्थिक वर्षदेखि सरकारले औपचारिक रूपमा ‘स्याटलाइट अकाउन्टिङ सिस्टम’को काम थालिसकेको छ । 

राष्ट्रसंघीय विश्व पर्यटन संगठन (यूएनडब्ल्यूटीओ)को प्राविधिक तथा यूएनडीपीको रू. ५० लाखको आर्थिक तथा प्राविधिक सहयोगमा बोर्डले यो प्रणालीअनुसार ‘डेटा इन्ट्री’को काम शुरू गरेको हो । नयाँ मोडालिटी तय गर्न नेपाल राष्ट्र बैंक, केन्द्रीय तथ्यांक विभाग तथा अन्य सरोकारवालाहरूसँग छलफल गरिएको बोर्डले जानकारी दिएको छ । मन्त्रालयले चालू आवभित्रै यसको तयारीको काम पूरा गरी नयाँ आर्थिक वर्षदेखि यो प्रणालीलाई पूर्णरूपमा लागू गर्ने सोच राखेको पर्यटन मन्त्रालयका सहसचिव तथा प्रवक्ता घनश्याम उपाध्यायले जानकारी दिए । 

मन्त्रालयले पनि चालू आवमा सम्पादन हुने प्रमुख प्राथमिकताका कार्यक्रमहरूको सूचीमा यसलाई पनि समेटेको छ । यो प्रणालीको विकासले पर्यटन क्षेत्रको छरिएका तथ्यांक र यसको समग्र योगदान आउने भएकाले यो अत्यन्त महत्त्वपूर्ण भएको उनले बताए ।

छुटेको क्षेत्रको तथ्यांक संकलनका लागि कस्तो मोडालिटी तय गर्ने भन्ने बारेमा सरोकारवालाहरूसँग छलफल भएको र छिट्टै नयाँ मोडालिटी तय गरिने पर्यटन बोर्डका सूचना अधिकारी मणि लामिछानेले बताए । ‘हामीले थप तथ्यांक संकलनका लागि नयाँ मोडालिटी तय गर्नेबारे छलफल गरेका छौं । मोडालिटी तय भएपछि पर्यटनमा हाल नसमेटिएका तर पर्यटन क्षेत्रसँग सम्बद्ध तथ्यांक पनि समावेश हुनेछन्,’ उनले भने । हाल पर्यटन क्षेत्रका सबै सूचकको गणना गरिएको छैन । नयाँ मोडालिटीले छुटेका सूचकलाई पनि समावेश गर्ने छ ।  

जीडीपीमा पर्यटन क्षेत्रको यथार्थ योगदान पत्ता लगाउन र पर्यटनसँग सम्बद्ध तथ्यांक एकीकृत रूपमा थाहा पाउन यो प्रणालीले सहयोग गर्ने सरकारको अपेक्षा छ । 
वर्ल्ड टुरिजम् काउन्सिलका अनुसार अहिले नेपालमा पर्यटन क्षेत्रले करीब ५ लाख रोजगारी सृजना गरेको छ । जुन नेपालको कुल रोजगारीको ३ दशमलव २ प्रतिशत हो । नेपालको तथ्यांकअनुसार अहिले कुल गार्हस्थ्य उत्पादनमा पर्यटन क्षेत्रको योगदान २ दशमलव ८ प्रतिशतमात्र रहेको छ । त्यसमा होटल, ट्राभल, ट्रेकिङ आदि क्षेत्रमात्र समावेश छन् ।

सन् २०२० सम्ममा कुल गार्हस्थ्य उत्पादनमा पर्यटन क्षेत्रको योगदान १० प्रतिशतसम्म पुग्ने संस्कृति, पर्यटन तथा नागरिक उड्डयन मन्त्रालयको अनुमान छ । वल्र्र्ड टुरिजम् काउन्सिलकै तथ्यांकलाई आधार मान्दा पनि नेपालको जीडीपीमा पर्यटन क्षेत्रको योगदान करीब ८ प्रतिशत  छ । यो प्रणाली लागू भएपछि अर्थतन्त्र र कुल गार्हस्थ्य उत्पादनमा पर्यटन क्षेत्रको योगदान बढ्ने सरकारी अपेक्षा छ । 
 

प्रतिक्रिया [0]
प्रतिक्रिया दिनुहोस्