ई –पेपर | हाम्रो बारेमा | विज्ञापन | ग्राहक बन्नुहोस | Podcast | NBA
arthik abhiyan
ad banner Mango Tech Digital Marketing Solution

छिम्केश्वरी र सुकुटेमा पर्यटन महोत्सव हुँदै

२०७६ फागुन, १२  
बजार
NA


काठमाडौं (अस) । आन्तरिक पर्यटन प्रवर्द्धन गर्न तनहुँको छिम्केश्वरी र सिन्धुपाल्चोकको सुकुटेमा पर्यटन महोत्सव आयोजना गरिने भएको छ । छिम्केश्वरी पर्यटन व्यवसायी समिति तनहुँ र सिन्धु पर्यटन व्यवसायी संघले आइतवार पर्यटन बोर्डमा संयुक्त पत्रकार सम्मेलन गरी महोत्सवबारे जानकारी दिएका हुन् । 

सुकुटेमा हुने महोत्सव फागुन १७ गतदेखि २० गतेसम्म चल्ने र छिम्केश्वरीमा फाुगन २५ देखि २७ गतेसम्म महोत्सव हुने आयोजकले बताएका छन् । आन्तरिक पर्यटन प्रवद्र्धन गर्दै नेपाल भ्रमण वर्ष सफल बनाउन पर्यटन महोत्सव तथा विविध कार्यक्रम आयोजना गर्न लागिएको जानकारी दुवै आयोजकले दिए । 

तनहुँका विभिन्न पर्यटकीय स्थलमध्ये आँबुखैरेनी गाउँपालिकाअन्तर्गतको छिम्केश्वरी क्षेत्र पनि एक महत्त्वपूर्ण गन्तव्य भएको र त्यस क्षेत्रअन्तर्गत विभिन्न सांस्कृतिक ग्राम र धवलागिरिदेखि लाङ्टाङ्सम्मको हिमशृंखलाको दृश्यावलोकन गर्न सकिने छिम्केश्वरी पर्यटन व्यवसायी समितिका निर्देशक हिरासिंह गुरुङले जानकारी दिए । त्यस्तै, ७ देवीहरूमध्ये जेठी बुढीदेवी माई र माहिली छिम्केश्वरी माई छिम्केश्वरी लेकमै अवस्थित छन् भने साँहिली गोरखकाली माई, काहिँली मनकामना माई, अन्तरी इच्छाकामना माई, जन्तरी अन्नपूर्णा माई र कान्छी अकला माईलाई सोही स्थलबाट दृश्यावलोकनसहित दर्शन गर्न सकिने उनले बताए । महोत्सवमा २५ हजार दर्शक सहभागी हुने र रू. २५ लाखसम्मको कारोबार हुने अपेक्षा गरिएको छ । 

यसैगरी सिन्धु पर्यटन व्यवसायी संघ, सिन्धुपाल्चोकले भोटेकोशीको जलयात्रामार्फत पर्यटन प्रवर्द्धन गर्ने उद्देश्यले प्रथम सुकुटे महोत्सव आयोजना गर्न लागेको हो । साहसिक जलयात्रा तथा स्थानीय कला संस्कृतिका लागि मेला आयोजना गर्न लागिएको जानकारी दिइएको छ । 

साहसिक जलयात्राका लागि विश्वका सातौं स्थानमा रहको भोटेकोशी नदी स्वदेश तथा विदेशी पर्यटकका लागि आकर्षक गन्तव्य रहेको र यसको प्रवर्द्धनले नेपालको दिगो पर्यटनलाई प्रवर्द्धन गर्न सहयोग पुग्ने अपेक्षा गरिएको संघका अध्यक्ष नारायण श्रष्ठले बताए । यो क्षेत्रमा जुगल हिमाल, भैरव कुण्ड, तातोपानी, ओख्रैनी पाँचपोखरी, मुढेलगायत पर्यटकीय स्थल छन् । सुकुटे क्षेत्र र्‍याफ्टिङका लागि प्रसिद्ध मानिन्छ । सुकुटे महोत्सवको २० हजार दर्शकले अवलोकन गर्ने तथा ५ करोड रुपैयाँको कारोबार हुने अपेक्षा आयोजकको छ । 

प्रतिक्रिया [0]
प्रतिक्रिया दिनुहोस्