arthik abhiyan
ad banner Mango Tech Digital Marketing Solution

तथ्यांकोवाच : अदुवा निर्यातमा नेपालको सम्भावना

पाकिस्तानमा ९ अर्ब तथा बंगलादेशमा ५ अर्ब रुपैयाँको बजार

२०७६ मंसिर, ३०  
अंक समाचार
Image Not Found
author avatar अभियान संवाददाता

काठमाडौं (अस) । आईटीसी ट्रेडम्यापका अनुसार सन् २०१८ मा वश्वमा अदुवाको कुल आयात ९४ करोड अमेरिकी डलर (१०८ अर्ब रुपैयाँ) बराबरको भएको छ । उक्त वर्ष पाकिस्तानले ८ करोड ३० लाख अमेरिकी डलर (करीब ९ अर्ब ४९ करोड रुपैयाँ) र बंगलादेशले ४ करोड १० लाख अमेरिकी डलर (झन्डै ४ अर्ब ७२ करोड रुपैयाँ) बराबरको अदुवा आयात गरेका छन् । यी दुई देशको अदुवाको आयात नै करीब १४ अर्ब २१ करोड रुपैयाँ जतिको छ ।

नेपालको समग्र पहाडी भागमा अदुवा प्रशस्त मात्रामा उत्पादन भइरहेको र हुने सम्भावना छ । पहाडलाई तरकारी, फलफूल र नगदेबालीको हबका रूपमा विकास गर्ने नेपालको मूलनीति रहेको छ । नेपाली अदुवा विश्वका विकसित देशहरूमा पनि निर्यात भइरहेको सन्दर्भमा अदुवाको बजार विविधीकरणको सम्भावना पनि प्रशस्त छ ।

एकचोटि नेपाली अदुवाले प्रवेश पाएका मुलुकमा थप प्रयास गरेमा प्रशोधित र ताजा अदुवा निर्यात गर्न सकिन्छ । आपूर्ति परिमाण र गुणस्तरको प्रत्याभूति दिन सक्ने अवस्थामा विश्वमा रहेको १०८ अर्ब रुपैयाँ बराबरको बजार नेपालका लागि ठूलो अवसर हो । यो अवसर सदुपयोग गर्न राष्ट्रिय अदुवा बाली विकास परियोजना सञ्चालन गर्नुपर्दछ ।

उक्त परियोजना अन्तर्गत अदुवा कृषकलाई एकद्वार प्रणाली मार्फत आर्थिक तथा प्राविधिक सहयोग, अनुदान, प्रोत्साहन र संरक्षणको व्यवस्था गरिनुपर्छ । भूपरिवेष्ठित मुलुक भएकाले ढुवानी आदिमा रहेको बढ्दो लागत न्यूनीकरण र उचित भण्डारणको व्यवस्थाका लागि सरकारबाट यथेष्ट सहयोग हुनुपर्छ । यसैगरी नेपाली अदुवालाई अन्य देशका उत्पादनसँग मूल्य प्रतिस्पर्धी बनाउन अदुवा सम्बद्ध सबै क्रियाकलापलाई अनन्तकालीन करमुक्तिको सुविधा प्रदान गर्न अति जरुरी छ । यस्तो व्यवस्था हुन सकेमा अदुवाको निर्यात नेपालको आर्थिक समृद्धिको आधार बन्न सक्दछ ।

                    

प्रतिक्रिया [0]
प्रतिक्रिया दिनुहोस्