ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

ठमेल पर्यटन विकास परिषद्द्वारा काटियो तार : ठमेल क्षेत्रमा टेलिफोन र इन्टरनेट सेवा पूर्ण बन्द 

२०७६ पौष, ४  
समाचार
NA
author avatar युवराज बस्नेत

काठमाडौं । भिजिट नेपाल २०२० को तयारी भन्दै ठमेल पर्यटन विकास परिषद्ले ठमेल क्षेत्रमा दूरसञ्चार ऐन विपरीत इन्टरनेट तथा टेलिफोनको तार काटिदिएको छ । लापरवाहीपूर्ण तरिकाले काठमाडौंको मुख्य पर्यटकीय गन्तव्य ठमेलमा त्यसरी तार काटिँदा त्यस क्षेत्रको टेलिफोन र इन्टरनेट सेवा पूर्णरूपमा बन्द भएको छ । 

विशेषगरी उक्त क्षेत्रमा विद्युत्का पोलबाट लगिएका  वल्र्डलिङ्क, भायोनेट, सुविसु, टेलिकम लगायत सेवाप्रदायकका इन्टरनेटको तार काटिएको छ । समन्वयविना नै सेवा नै अवरुद्ध हुने गरी तार काट्नु दूरसञ्चार ऐन विपरीत भएको भन्दै नेपाल दूरसञ्चार प्राधिकरण र इन्टरनेट सेवाप्रदायक संघले विरोध गरेका छन् । 

दूरसञ्चार ऐनको दफा ४७ को उपदफा ५ मा ‘कुनै व्यक्तिले बद्नियत साथ दूरसञ्चार लाइन, दूरसञ्चार प्रणाली, सोसम्बन्धी कुनै कार्य वा उपकरणमा प्रतिकूल असर पर्नेगरी कुनै काम गरे, हानि नोक्सनी पु¥याएमा र दुरुत्साहन दिएमा सो अवस्थामा हानि नोक्सानीको बिगोबमोजिम जरीवाना र ५ वर्ष कैद वा दुवै सजाय हुनसक्ने व्यवस्था छ ।’ 

नेपाल दूरसञ्चार प्राधिकरणका अध्यक्ष पुरुषोतम खनालले सम्बन्धित निकायसँग सहकार्य र समन्वय नगरी तार काट्नेजस्तो निन्दनीय कार्य गर्नु कानूनविपरीत भएको बताए । उनका अनुसार दूरसञ्चारका पूर्वाधार तथा उपकरणमा हानि पु¥याउने र तार काट्नेजस्ता काम रोक्न प्राधिकरणले सम्बन्धित मन्त्रालयलाई बिहीवार पत्र पठाइसकिएको छ । 

इन्टरनेट सेवाप्रदायक संघले पनि नेपाल दूरसञ्चार प्राधिकरण र सूचना तथा सञ्चार मन्त्रालयमा मौखिक रूपमा जानकारी दिइसकिएको बताएको छ । संघका एक अधिकारीका अनुसार ठमेल क्षेत्रमा भएको लापरबाहीका कारण रू. ८ करोडभन्दा बढीको क्षति भएको छ । ‘हजारौं ग्राहक सेवाबाट वञ्चित भएका छन्, अफिस, रेष्टूराँ ठप्प छन् तर सरकार भने टुलुटुलु हेरेर बसेको छ,’ ती अधिकारीले भने । 

तार काटिएपछि ठमेल क्षेत्रका डेडिकेटेड इन्टरनेट जडान गरेका कर्पोरेट ग्राहकदेखि होटेल, रेस्टूराँ लगायतका सबै व्यावसायिक प्रतिष्ठान र स्थानीयका घरहरूमा  सो सेवा पूर्ण रूपमा ठप्प छ । स्थानीय वासिन्दाले पनि सो क्षेत्रमा इन्टरनेट सेवा बन्द भएकोमा विरोध गरेका छन् । इन्टरनेट सेवाप्रदायक संघले ठमेलमा जस्तै अन्यत्र पनि तार काटिनसक्ने भन्दै चिन्ता व्यक्त गरेको छ । 

ठमेल पर्यटन विकास परिषद्का कोषाध्यक्ष पुनेअराम लागेजुले ठमेलको तार व्यवस्थापनका लागि पटक–पटक बैठकमा बोलाउँदा पनि सेवाप्रदायक नआएपछि तार काट्न बाध्य भएको बताए । उनका अनुसार तार व्यवस्थापन गर्ने विषयमा मंसिर १७ गते परिषद्ले सार्वजनिक सूचना जारी गरेको थियो । सेवाप्रदायकले परिषद्को सूचनालाई बेवास्ता गरेपछि तार काटिएको उनको भनाइ छ । परिषद् र सेवाप्रदायकबीच विगत ४ वर्षदेखि यस विषयमा विवाद चल्दै आएको बताइएको छ । 

सञ्चार तथा सूचना प्रविधि मन्त्रालयका सचिव दीपक सुवेदीले यस विषयमा मन्त्रालयको ध्यानाकर्षण भएको र मन्त्रालयले जतिसक्दो छिटो यसबारे ‘एक्सन’ लिने बताए । 

प्रतिक्रिया [1]
User Image

केशव अधिकारी

[Dec 20, 2019 01:05am]

घर भित्र नै भद्रगोल छ भने बाहिरका पाहुनालाई कसरी स्वागत गर्ने?


प्रतिक्रिया दिनुहोस्