arthik abhiyan
ad banner Mango Tech Digital Marketing Solution

विदेशी शिक्षण संस्था सञ्चालनबारे नयाँ मापदण्ड लागू

२०७६ पौष, १७  
शिक्षा
NA


काठमाडौं । शिक्षा, विज्ञान तथा प्रविधि मन्त्रालयले विदेशी शिक्षण संस्थाको सम्बन्धनमा उच्च शिक्षा सञ्चालन गर्नेसम्बन्धी निर्देशिका, २०५९ संशोधन गरी नयाँ मापदण्ड लागू गरेको छ । गत मंसिर २४ गतेको मन्त्रीस्तरीय निर्णयअनुसार दोस्रो संशोधनसहित यो निर्देशिका जारी गरिएको हो । यससँगै अब विदेशी शिक्षण संस्थाको सम्बन्धनमा शैक्षिक कार्यक्रम सञ्चालन गर्ने प्रयोजनका लागि अनुमति प्रदान गर्दा वा सम्बन्धन परिवर्तन र कार्यक्रम थपका लागि निवेदन गर्ने शैक्षिक संस्थाका सम्बन्धमा नयाँ मापदण्ड लागू गर्नुपर्नेछ ।

मन्त्रालयको उच्च शिक्षा शाखाले जारी गरेको सूचनामा निर्देशिकाले शिक्षण संस्था स्थापना तथा सञ्चालनका लागि आवश्यक पर्ने प्रारम्भिक मापदण्ड निर्धारण गरेको छ । शिक्षण संस्थाको स्थापना गर्दा औद्योगिक क्षेत्र र मूल सडकबाट केही टाढा, तर दमकल र एम्बुलेन्स गुड्न सक्ने बाटो भएको स्थानमा हुनुपर्नेछ । यस्तै शिक्षण संस्थामा अध्यापन गराउने सबै शिक्षकको शैक्षिक योग्यता सम्बन्धित विषयमा कम्तीमा द्वितीय श्रेणीमा स्नातकोत्तर हुनुपर्ने उल्लेख छ । 
तर स्नातकोत्तर तहका शैक्षिक कार्यक्रम समेत सञ्चालन गर्ने शिक्षण संस्थामा कार्यक्रम अनुसार प्रत्येक कार्यक्रममा कम्तीमा एकजना विद्यावारिधि तहको शिक्षक अनिवार्य हुनुपर्ने र इन्जिनीयरिङ तथा सूचना प्रविधिका लागि शिक्षकको शैक्षिक योग्यता स्नातकोत्तर हुनुपर्नेछ । नर्सिङ कार्यक्रमका लागि प्रिन्सिपलको शैक्षिक योग्यता नर्सिङ विषयमा स्नातकोत्तर, शिक्षकमध्ये २५ प्रतिशत स्नातकोत्तर र अन्य स्नातक उत्तीर्ण भई नर्सिङ काउन्सिलमा दर्ता भएको हुनुपर्ने व्यवस्था छ ।

‘शिक्षण संस्थाले कार्यक्रम सञ्चालनका लागि काठमाडौं उपत्यकामा भए कम्तीमा तीन रोपनी, पहाडमा भए ६ रोपनी र तराईमा भए पाँच कठ्ठा जग्गाको व्यवस्थापन गर्नुपर्नेछ,’ निर्देशिकामा उल्लेख छ । शिक्षण संस्थाको भुइँदेखि सिलिङसम्मको उचाइ कम्तीमा ९ फिट हुनुपर्ने, कोठामा प्रशस्त प्रकाश छिर्ने, क्रश भेन्टिलेशन भएको हुनुपर्ने र भवन भूकम्प प्रतिरोधक प्रविधिबाट निर्मित हुनुपर्ने उल्लेख छ । यसैगरी पुस्तकालय, चमेनागृह, शिक्षक विद्यार्थी अनुपात, प्रतिकक्षा विद्यार्थी संख्या आदिबारे पनि मापदण्ड तोकिएका छन् । रासस

प्रतिक्रिया [0]
प्रतिक्रिया दिनुहोस्