arthik abhiyan
ad banner Mango Tech Digital Marketing Solution

भ्रमण वर्षका तगारा

२०७६ पौष, १८  
पाठक विचार
NA


सरकारले २० लाख पर्यटक भित्र्याउने लक्ष्यका साथ भ्रमण वर्षको शुभारम्भ भव्यताका साथ गरेको छ । यो भव्यता स्वदेशभित्र प्रचार गर्न निकै सहयोगी भए पनि विदेशमा यसले खासै सकारात्मक सन्देश दिने देखिँदैन । प्रचार जति भए पनि यहाँ रहेका समस्याहरूलाई सम्बोधन नगरेसम्म पर्यटनको लक्ष्य पूरा गर्न कठिन हुने देखिन्छ । यसमा थुप्रै सानातिना समस्या छन् । 

पहिलो त त्रिभुवन विमानस्थलदेखि होटलसम्म पुग्ने सडकहरू गतिला छैनन् । त्यस्तै अवस्था छ, पर्यटकीय स्थलसम्म पुग्ने सडकहरूको पनि । विश्वसम्पदा सूचीमा रहेको बौद्ध होस् वा विदेशी पर्यटकको रोजाइमा पर्ने भक्तपुरको नगरकोट पुग्ने सडक त्यसले आकर्षण होइन, विकर्षण नै पैदा गर्छ । काठमाडौंमा जामको समस्या पनि उत्तिकै छ । नेपाल भित्रिने नाका र काठमाडौं, पोखरा, चितवन र बर्दिया जस्ता पर्यटकीय क्षेत्रमा पुग्ने सकडहरूको अवस्था पनि दयनीय छ ।

हवाई पूर्वाधार र सेवामा पनि आशालाग्दो अवस्था छैन । नेपाल आउन हवाई भाडा निकै महँगो छ । पर्यटकले गर्ने ठूलो खर्च यसकै लागि हुन्छ र त्यसको फाइदा पनि नेपालले पाउँदैन किनभने ती विदेशी विमान सेवाबाट नेपाल भित्रिन्छन् । नेपाल आउने हवाई भाडाले अन्य पर्यटकीय गन्तव्य पुग्न सकिने भएपछि नेपाल आउनसक्ने पर्यटक अन्यत्र मोडिएका छन् । त्यसो त हवाई पूर्वाधार र विमान कम्पनीको कमजोर सेवाका कारण नेपाल आउने पर्यटकहरूले सास्ती भोग्नुपर्छ । अध्यागमन र सुरक्षालगायत आन्तरिक व्यवस्थापन पनि सन्तोषजनक छैन ।

नेपालमा होटल र तिनमा संख्या त बढेका छ तर सेवाको गुणस्तर बढेको पाइँदैन । पर्यटकहरू विनम्र र स्तरीय सेवा, मीठो खाना, स्वस्थ तथा सुरक्षित वातावरण, खुला स्थान, सेवाअनुसारको उचित मूल्य र स्पा आदि खोज्छन् तर त्यसअनुसार सुविधा दिन सकिएको छैन । तारे होटलहरूकै सेवामा गुनासो छ भनिन्छ । अस्वस्थ प्रतिस्पर्धाले गर्दा पर्यटकमाझ सकारात्मक सन्देश जान सकेको छैन ।

यस्तोमा भ्रमण वर्षको उद्घाटन जति नै भव्य भनिए पनि त्यसले पर्यटक आगमनमा खासै असर पार्ने देखिँदैन । नेपालभित्रै पनि भ्रमण वर्ष १९९८ ले जत्तिको उत्साह र जनसहभागिता यो भ्रमण वर्षको उद्घाटनमा देखिएन । यस हिसाबले उद्घाटन नै फितलो थियो भन्न सकिन्छ ।

रमेश अधिकारी, नयाँबजार, काठमाडौं ।

प्रतिक्रिया [0]
प्रतिक्रिया दिनुहोस्