ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

जहाजको प्रतीक्षामा त्रिभुवन अन्तरराष्ट्रिय विमानस्थल        

२०७६ चैत, १३  
समाचार
Image Not Found

चैत १३,  काठमाडौं । कोभिड—१९ को जोखिम नियन्त्रणका लागि सरकारले देशभर लकडाउन गरेको बिहीवार तेस्रो दिन त्रिभुवन अन्तरराष्ट्रिय विमानस्थल शून्य अप्रेशनमा छ ।

अहिलेसम्म हेलिकप्टरको उद्धार (एक/ दुई ओटा मात्रै उडान) उडानबाहेक कुनै पनि उडान भएको छैन । चीनबाट सामग्रीसहित जहाज आउने बताइए पनि अहिलेसम्म कुनै पनि जानकारी नआएको विमानस्थलले बताएको छ ।

विमानस्थलका महाप्रबन्धक देवेन्द्र केसीले विमानस्थलमा हेलिकप्टरको उद्धार उडानबाहेक अहिलेसम्म कुनै पनि उडान नभएको र विमानस्थल सुनसान प्रायः रहेको बताए ।

उनले भने, ‘लकडाउनमा उडान नभए पनि विमानस्थल सञ्चालनमा छ, चीनबाट जहाज आउने कुरा भए पनि अहिलेसम्म विमानस्थललाई कुनै जानकारी आएको छैन । केही सञ्चारमाध्यमले जहाज विमानस्थलमा अवतरण गरेर फर्किसकेको लेखेका छन् त्यसमा कुनै सत्यता छैन, हामी विमानस्थलमै सेवामा छौं ।’     
     
यसको मतलब अहिलेसम्म कुनै पनि जहाज विमानस्थलमा अवतरण गरेका छैनन् र अहिलेसम्म उडानको त्यस्तो योजना पनि छैन । तर पनि अन्तरराष्ट्रिय विमानस्थल जहाजको प्रतीक्षामा छ । आपतकालिन, कार्गोलगायत उडान हुनसक्ने विमानस्थलले बताएको छ ।

नियामक नेपाल नागरिक उड्डयन प्राधिकरणका महानिर्देशक राजन पोखरेलले पनि चीनबाट जहाज आउने कुरा भइरहेको तर कहाँबाट कस्तो जहाज आउने हो अहिलेसम्म कुनै जानकारी नभएको बताए ।     
     
 ‘चीनबाट सामग्रीसहितको जहाज आउने कुरा भएको छ, कुन स्थानबाट कस्तो जहाज आउने भन्नेबारे अहिलेसम्म यकिन जानकारी आएको छैन’, उनले भने । यसैबीच सरकारले बुधबार निर्णय गरेअनुरुप स्वदेश फर्कन चाहने विदेशी नागरिकलाई नेपालको परराष्ट्र मन्त्रालयको समन्वयमा पहल भइरहेको बताइएको छ ।

सरकारको निर्णयअनुरुप विदेशी नागरिकलाई सम्बन्धित मुलुकमा पठाउनका लागि यहाँस्थित विदेशी दूतावासले परराष्ट्र मन्त्रालयमार्फत पहल गरिरहेको महानिर्देशक पोखरेलले बताए ।

सम्भवतः त्यस्ता नागरिकलाई यसैहप्ताभित्र विदेश पठाउने पहल भइरहेको र प्राधिकरणले अन्य सरोकार भएका निकायसँगको समन्वयका आधारमा यसैसाताभित्र उनीहरुलाई विदेश फकाउनेछ ।     
     
 महाप्रबन्धक पोखरेलले भने, ‘विदेशीले आफ्ना नागरिक लैजान चाहेमा यहाँको परराष्ट्र मन्त्रालयसँगको पहलमा त्यस्तो प्रक्रिया अघि बढ्छ, नेपालस्थित राजदूतावासले परराष्ट्र मन्त्रालयमार्फत पहल गरिरहेका छन्, यो हप्ताभित्र त्यस्तो उडान हुनसक्छ  ।’

कोभिड–१९ को संक्रमण फैलिन नदिन सरकारले चैत ११ देखि १८ गतेसम्म देशभर ‘लकडाउन’ गर्ने निर्णय गरेको थियो । आपतकालीन अवस्थामा सरकारले विशेष निर्णय गरेमा आपतकालीन उडान हुनेछ । यसअघि कोभिड –१९ को सम्भावित जोखिमलाई मध्यनजर गर्दै सरकारले यही चैत ९ गते मध्यरातिदेखि नेपालमा उडान भर्ने सबै अन्तरराष्ट्रिय उडान बन्द गर्ने निर्णय गरेको थियो । 

विमानस्थलबाट आन्तरिकतर्फ १० हेलिकप्टरसहित १९ र अन्तरराष्ट्रियमा तीन नेपालीसहित ३० ओटा वायु सेवा प्रदायक कम्पनीले उडान गर्दै आएका छन् । रासस
 

प्रतिक्रिया [0]
प्रतिक्रिया दिनुहोस्