ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

विद्यालय सुधार कार्यक्रम : तुलसीपुरका २० विद्यालयमा २ करोड लगानी गरिँदै

२०७६ पौष, २२  
प्रदेश ०५
Image Not Found
author avatar उदय बीसी

दाङ । दाङको तुलसीपुर उपमहानगरपालिकाभित्रका २० ओटा सामुदायिक विद्यालयको विकासका लागि १ करोड ९८ लाख रुपैयाँ लगानी गरिने भएको छ । संघीय सरकारको विद्यालय सुधार कार्यक्रम अन्तर्गत सशर्त अनुदान स्वरूप उक्त रकम लगानी गर्न लागेको तुलसीपुर उपमहानगरपालिका, शिक्षा समितिका संयोजक देवबहादुर विकले जानकारी दिए ।

अनुदान वितरणका लागि उपमहानगरपालिकाले विद्यालय समेत छनोट गरिसकेको छ । उपमहानगरपालिका शिक्षा समितिको बैठकको निर्णय अनुसार दुईकोठे ब्लक निर्माणका लागि अनुदान पाउनेहरूमा प्रावि मुलकोट, मावि प्रतापकोट, मावि सेन्टर तुलसीपुर, मावि भित्रिसंक्राम, मावि सुन्दरनगर, मावि हरिपौरी र मावि बेलझुन्डी रहेका छन् । विद्यार्थी संख्याको अनुपातमा कक्षाकोठाको संख्या कम भएकाले यी विद्यालयलाई अनुदानका लागि छनोट गरिएको बताइएको छ ।

त्यसैगरी मावि विजौरी, मावि छोटे र प्रावि करंगालाई छात्रावाससहित शौचालय निर्माणका लागि छनोट गरिएको छ । सूचना प्रविधिका लागि मावि कालाखोला, मावि उरहरी, मावि दुधरास र मावि मानपुरलाई छनोट गरिएको छ । सूचना प्रविधिका लागि छनोट भएका विद्यालयहरूलाई सूचना प्रविधि सम्बन्धी उपकरण वितरण गरिनेछ । त्यस्तै मावि कुटिचौर, मावि दोघरे र मावि भ्युडहर सुनपुरमा पुस्तकालय बनाइनेछ भने मावि खाद्रे, महेन्द्र मावि तुलसीपुर र मावि अम्बापुरमा विज्ञान प्रयोगशाला निर्माण गरिने संयोजक विकले बताए ।

लगानीका लागि विभिन्न मापदण्ड बनाएर छनोट गरिएकाले सम्बन्धित विद्यालयको शैक्षिक विकासमा टेवा पुग्ने संयोजक विकको भनाइ छ । उपमहानगरपालिकाले यस क्षेत्रका सामुदायिक विद्यालयको सुधारका लागि विभिन्न योजना अघि सारेको जानकारी उनले दिए ।

प्रतिक्रिया [0]
प्रतिक्रिया दिनुहोस्