arthik abhiyan
ad banner Mango Tech Digital Marketing Solution

गण्डकी प्रदेश : सबै स्थानीय तहमा ‘हेलिप्याड’ 

२०७६ पौष, २९  
प्रदेश गण्डकी
NA
author avatar नरहरि पौड्याल

कास्की । गण्डकी प्रदेश सरकारले प्रदेशअन्तर्गतका सबै स्थानीय तहमा ‘हेलिप्याड’ निर्माणको अभियान थालेको छ । स्थानीय तहमा विपद् व्यवस्थापन तथा आपतकालीन उद्धार कार्यलाई सहज बनाउन र पर्यटकको आवागमलाई हेलिकोप्टरमार्फत सजिलो बनाउने उद्देश्यले ‘हेलिप्याड’ निर्माणको अभियान थालिएको हो । गण्डकी प्रदेशमा ८५ ओटा स्थानीय तह  छन् ।

सबै स्थानीय तहमा एक/एक ओटा हेलिप्याड निर्माण गर्ने योजनासहित प्रदेश सरकारको उद्योग, पर्यटन, वन तथा वातावरण मन्त्रालयले नेपाल नागरिक उड्डयन प्राधिकरणसँग छलफल थालेको छ । प्राधिकरणको प्राविधिक सहयोगमा सबै स्थानीय तहमा हेलिप्याड निर्माणको सम्भावनाबारेको अध्ययन अघि बढिसकेको प्रदेशका उद्योग, पर्यटन, वन तथा वातावरण मन्त्री विकास लम्सालले बताए । 

प्रदेश सरकारले म्याग्दी, गोर्खा, मनाङ र मुस्ताङमा हेलिप्याड निर्माण गर्न आर्थिक वर्ष २०७५/७६ को बजेटमा करीब रू. ८ लाख विनियोजन गरेको छ । मन्त्री लम्सालका अनुसार ती चार जिल्लामा चालू आवभित्रै हेलिप्याड निर्माण गरिसकिने छ । हेलिप्याड निर्माणपछि आकस्मिक बिरामी र दुर्घटनाका घाइतेलाई तत्कालै उद्धार गरी अस्पतालसम्म पुर्‍याउन तथा पर्यटकीय क्षेत्रमा हेलिकोप्टरमार्पmत पर्यटकलाई सहजरूपमा आवतजावत गर्न सहयोग पुग्ने उनको भनाइ छ ।
चालू आवमा सबै स्थानीय तहमा हेलिप्याड निर्माण गर्न पर्याप्त बजेट विनियोजन नभए पनि स्थानीय तहहरूसँग छलफल गरी आगामी आवमा यथेष्ट बजेट विनियोजन गरिने मन्त्री लम्सालले बताए । प्रदेशअन्तर्गतका स्थानीय तहहरूमा हेलिकोप्टरको पहुँच पुर्‍याउन आवश्यक पर्ने प्राविधिक सहयोग गर्न नेपाल नागरिक उड्डयन प्राधिकरण तयार रहेको प्राधिकरण, पोखराका प्रमुख भोलाप्रसाद गुरागाईंले बताए ।

हेलिप्याड निर्माणका लागि सबैभन्दा पहिले प्राविधिक टोलीले हेलिकोप्टर अवतरण र उडान सहज रूपमा गर्नसकिने उपयुक्त स्थानको छनोट गर्ने बताइएको छ । पोखरा क्षेत्रीय अन्तरराष्ट्रिय विमानस्थलका आयोजना प्रमुख इन्जिनीयर विनेश मुनंकर्मीका अनुसार ‘हेलिप्याड’ बनाउन विभिन्न प्राविधिक प्रक्रिया पूरा गर्नुपर्छ । साथै जमीनको सतह सामान्यतया १५ सेन्टिमीटर पिपिसी ढलान गरेको हुनुपर्छ । यसैगरी खुल्ला सहजरूपमा हेलिकोप्टर बस्न मिल्ने सुरक्षित स्थान हुनुपर्छ । 

प्रतिक्रिया [0]
प्रतिक्रिया दिनुहोस्