arthik abhiyan
ad banner Mango Tech Digital Marketing Solution

देवघाटमा माघेसंक्रान्ति मेलाको तयारी सकियो

२०७६ पौष, २९  
प्रदेश गण्डकी
NA


तनहुँ । तनहुँ, नवलपुर, र चितवनको संगमस्थल देवघाटधाममा लाग्ने माघेसंक्रान्ति मेलाको तयारी सकिएको छ ।  संगममा सहजै स्नान गर्न सकिनेगरी मेला व्यवस्थापन तथा सुरक्षाको काम गरिगरिएको देवघाट क्षेत्र विकास समितिका अध्यक्ष शिवराज पौडेलले बताए । 

मेलालाई व्यवस्थित बनाउन १५ ओटा विभिन्न उपसमिति बनाएर काम अघि बढाइएको छ । मेलामा खानेपानी, विद्युत्, यातायात, जलयात्रा, पार्किङ, प्राथमिक उपचार लगायतको तयारी गरिएको पौडेलले उल्लेख गरे । 

दर्शनार्थीलाई हिँड्न र स्नान गर्न सहज होस् भनेर बाटो सम्याउने, ढुङ्गा राख्ने काम भएको देवघाट क्षेत्र विकास समितिका कार्यकारी निर्देशक धीरनबाबु घिमिरेले बताए । चितवन र तनहुँ जोड्ने जीर्ण बन्दै गएको झोलुंगे पुल समेत मर्मत गरी दुई लाममा भक्तजनलाई नदी वारपार गर्ने व्यवस्था गरिएको घिमिरेले जानकारी दिए । साथै, मेला अवधिभर देवघाट क्षेत्रमा मांस मदिरापान निषेध गरिएको छ ।

अघिल्ला वर्षका मेलामा कुरिनटारमा रहेको सशस्त्र प्रहरी बलको विपद् व्यवस्थापन तालीम शिक्षालयका गोताखोरको टोली मात्रै उद्धारमा खटिने गरेकामा यस वर्षबाट नेपाली सेनाको गोताखोर टोलीसमेत थपिएको घिमिरेले बताए । गोसाइँकुण्डबाट बग्दै आएकी त्रिशूली र मुक्तिनाथबाट आएकी कालीगण्डकीको वेणी संगम देवघाटमा माघेसंक्रान्तिका दिन नुहाउँदा धार्मिक फल प्राप्त हुने विश्वास छ ।

स्वदेशका मात्रै नभएर भारतका भक्तजन पनि माघेसंक्रान्ति स्नान गर्न देवघाट आउने गर्दछन् । माघेसंक्रान्तिमा देवता पनि नुहाउन र तीर्थ गर्न देवघाट आउने मान्यता रहेको छ । रासस
 

प्रतिक्रिया [0]
प्रतिक्रिया दिनुहोस्