arthik abhiyan
ad banner Mango Tech Digital Marketing Solution

मर्मत नहुँदा बरहथवा खानेपानी योजना सञ्चालन हुन सकेन

२०७६ पौष, २९  
प्रदेश ०२
Image Not Found
author avatar श्रवण थापा

सर्लाही । सर्लाहीको बरहथवा नगरपालिकामा २ वर्षदेखि बन्द भएको खानेपानी योजना अझै सञ्चालन हुन सकेको छैन । नगरपालिकाले बाटो विस्तारको क्रममा बरहथवा खानेपानी तथा सरसफाइ उपभोक्ता समितिको पाइपलाइनमा क्षति पुगेको थियो । सम्बन्धित निकायले २ वर्षसम्ममा पनि पाइपलाइन मर्मत नगर्दा स्थानीय पानी उपभोग गर्नबाट वञ्चित भएका छन् । लाखौंैं खर्चिएर सञ्चालनमा ल्याइएको खानेपानी योजनाको पानी उपभोग गर्न नपाएपछि उनीहरू पानीको वैकल्पिक स्रोत खोज्न बाध्य भएका छन् ।

नगरपालिका–५, हात्तीडण्डामा ११ वर्ष लगाएर निर्माण गरिएको उक्त खानेपानी आयोजनबाट २०६४ देखि पानी वितरण शुरू गरिएको थियो । १ दशकदेखि नियमित पानी उपभोग गरिरहेका स्थानीय बासिन्दा आफूहरू ट्युबवेलको आर्सेनिकयुक्त पानी पिउन बाध्य छन् । पानी जस्तो अत्यावश्यक सेवामा समेत   राजनीति भएकाले आफूहरूले दूषित पानी पिउनुपरेकोे स्थानीय राजेन्द्र महतोले गुनासो गरे । खानेपानी योजना समयमै मर्मत नहुँदा आयोजनाका अधिकांश उपकरण समेत काम नलाग्ने अवस्थामा पुगेको उनको भनाइ । लाखौंको लगानीमा सञ्चालित उक्त योजनाबाट  करीब ५०० घरधुरीले पानी उपभोग गर्दै आएको उपभोक्ता समितिका अध्यक्ष दुखा महतोले जानकारी दिए । बाटो निर्माणको क्रममा डोजरले खानेपानीको ७ किलोमिटर पाइपलाइन नष्ट गरेको उनको भनाइ छ । ‘उक्त पाइपलाइन मर्मत गर्न करीब ५० लाख हाराहारीमा खर्च हुन्छ,’ उनले भने, ‘तर, नगरपालिकाले यसका लागि हालसम्म एक पैसा पनि बजेट छुट्याएको छैन ।’ समितिले विभिन्न श्रोतबाट ३२ लाखमा खरीद गरेको जेनेरेटर समेत प्रयोगमा नआउँदा खिया लागेको उनले बताए । यस्तै, आयोजनाले ७५ हजार रुपैयाँ बिजुलीको महशुल तिर्न तथा  कर्मचारीको तलब भत्ता समेत दिन नसकिएको उनको भनाइ छ ।

उपभोक्ता समितिको हठका कारण उक्त खानेपानी आयोजना  अलपत्र परेको बरहथवा नगरपालिकाले बताएको छ । उपभोक्ता समिति आफू पनि राम्रोसँग खानेपानी सञ्चालन गर्न नसक्ने अनी नगरपालिकालाई सञ्चालनको जिम्मा दिन पनि नमानेकाले जनताले स्वच्छ खानेपानीबाट वञ्चित हुनु परेको बरहगवा नगरपालिकाका प्रमुख देवानन्द महतोले बताए । ‘हामी ५० लाख खर्च लागे पनि लगानी गर्न तयार छौं,’ उनले भने, ‘तर पैसा लगानी गरेपछि दीर्घकालीन रूपमा जनताले पानी खान पाउने ग्यारेन्टी गर्नुपर्छ ।’ समस्या समाधान गर्न नगरपालिकाले पटक पटक पहल गरे पनि उपभोक्ता समितिको ढिपीले समाधान हुन नसकेको महतोको आरोप छ । 

प्रतिक्रिया [0]
प्रतिक्रिया दिनुहोस्