arthik abhiyan
ad banner Mango Tech Digital Marketing Solution

सुर्खेतमा पत्थर प्रशोधन केन्द्र स्थापना हुँदै 

२०७६ पौष, २९  
प्रदेश ०६
Image Not Found
author avatar आकाश तारा बयक

सुर्खेत । आगामी ६ महीनाभित्र सुर्खेतमा पत्थर प्रशोधन केन्द्र स्थापना हुने भएको छ । मूल्यवान पत्थरहरू उत्खनन्, प्रशोधन एवम् निर्यात गर्ने उद्देश्यले त्यस्तो केन्द्र स्थापना गर्न लागिएको उद्योग, वाणिज्य तथा आपूर्ति मन्त्रालयले बताएको छ । प्रशोधन केन्द्रमा त्यस्ता रत्न र पत्थरहरूको कटिङ तथा पोलिसिङको काम हुनेछ । साविकको घरेलु तथा साना उद्योग विकास समिति सुर्खेतको मुख्य कार्यालय परिसरमा धातुको कटिङ, पोलिसिङ तथा ड्रिलिङका लागि पूर्वाधार निर्माणका कामहरू अन्तिम चरणमा पुगेका छन् । 

सानो स्तरमा अहिले पनि कटिङ, पोलिसिङ तथा ड्रिलिङका कामहरू भइरहेको उद्योग तथा उपभोक्ता हित संरक्षण निर्देशनालयका निर्देशक शम्भुप्रसाद पौडेलले बताए । उनका अनुसार कटिङ, पोलिसिङ तथा ड्रिलिङका दुई सेट मेसिनमा प्रति सिफ्ट १२ जनाले काम गर्न सक्छन् । ‘सुर्खेतमा २०६५ सालदेखि नै सानो स्तरमा रत्न पत्थर प्रशोधन विकास केन्द्र स्थापना भएको थियो,’ उनले भने, ‘कर्णाली प्रदेशमा पाइने बहुमूल्य धातुको पहिचान गरी सुर्खेतमा प्रशोधनको काम हुँदै आएको छ ।’ उनले साविकको घरेलु तथा साना उद्योग विकास समितिमार्फत रत्न पत्थर कटिङ, पोलिसिङ तथा ड्रिलिङसम्बन्धमा वर्षेनि सयौं युवालाई तालीमसमेत दिँदै आएको बताए । 

विश्वमा पाइने ८०० धातुमध्ये नेपालमा आठ प्रकारका धातु पाइन्छन् । काइनाइट, टुर्मालिन, क्वार्ज, एक्वामेरिन, गार्नेट, डेब्युराइट, हेम्बरराइट नेपालमा पाइने धातु हुन् । निर्देशक पौडेलले कर्णाली प्रदेशका हिमाली क्षेत्र रत्न पत्थरका लागि उत्कृष्ट क्षेत्र रहेको बताए । ‘सरकारले सम्भावित ठाउँको अन्वेषण गरी उत्खनन्का लागि निजीक्षेत्रलाई दिने योजना बनाएको छ,’ उनले भने, ‘कर्णालीका सुर्खेत, दैलेख, कालिकोटसँगै लमजुङ, गोरखा, धादिङ, सँखुवासभा, ताप्लेजुङ, ओखलढुंगा रत्न तथा पत्थर रहेका सम्भावित जिल्लामा पर्छन् ।’ उनले बहुमूल्य धातुको कटिङ, पोलिसिङ तथा ड्रिलिङका लागि सुर्खेत, धादिङ र डोटीमा रत्न र पत्थर प्रशोधन वस्तु विकास केन्द्रको स्थापना भइसकेको जानकारी पनि दिए । 

औद्योगिक केन्द्र बन्दै सुर्खेत
सुर्खेतलाई कर्णाली प्रदेशको औद्योगिक केन्द्रका रूपमा विकास गरिने भएको छ । प्रादेशिक राजधानीसमेत रहेको सुर्खेतलाई सरकारले औद्योगिक केन्द्र बनाउने घोषणा गरेको हो । करीब रू. २ करोड लागतमा वीरेन्द्रनगरमा जडीबुटी प्रशोधन केन्द्र भवनको शिलान्यास भई निर्माणसमेत शुरू भइसकेको छ । केन्द्रको निर्माणपछि यस क्षेत्रमा पाइने बहुमूल्य जडीबुटीको प्रशोधन सुर्खेतमै हुने छ । 

रत्न पत्थर प्रशोधन केन्द्रको स्थापनाका लागि काम थालिएपछि सुर्खेतलाई प्रादेशिक औद्योगिक केन्द्रका रूपमा विकास गर्न लागिएको सुर्खेत उद्योग वाणिज्य संघका महासचिव लक्ष्मण कँडेलले बताए । उनले कर्णाली प्रदेशमा रहेका बहुमूल्य खनिज पदार्थ र जडीबुटीको प्रशोधन गर्न सकिएमा देशकै अर्थतन्त्र बलियो हुने उल्लेख गरे । ‘जडीबुटी र खनिजबाटै कर्णाली प्रदेशको अर्थतन्त्रलाई थेग्न सकिने देखिन्छ,’ उनले भने, ‘पश्चिम सुर्खेतको चौकुने र लखरपाटा सिमेन्ट उद्योग पनि तत्काल सञ्चालन गर्न सरकारले प्रयास थाल्नु पर्छ ।’ उनले यी उद्योगहरु सञ्चालन भएमा सुर्खेत वास्तविक रूपमै औद्योगिक केन्द्र बन्ने दाबी गरे ।

प्रतिक्रिया [0]
प्रतिक्रिया दिनुहोस्