ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

राहत वितरणमा जुट्दै दैलेखका स्थानीय तह

२०७६ चैत, २३  
कर्णाली प्रदेश
Image Not Found
author avatar पंखबहादुर शाही

चैत २४, दैलेख । दैनिक ज्याला मजदूरी गरेर छाक टार्नुपर्ने अवस्था भएका नागरिकलाई दैलेखका स्थानीय तहहरूले राहत वितरण शुरू गरेका छन् । दुल्लु नगरपालिकाले नगरभित्रका एक हजार नागरिकलाई खाद्यान्न सामग्री आइतवारदेखि वितरण गर्न थालेको छ ।

नगरपालिकाले वडा नं ७ मा रहेका ४५ परिवारलाई २५ केजी चामल, २ केजी दाल, १ केजी नुन, १ केजी चिनी, २ सय ग्राम चियापत्ती, १ पोका तेल वितरण गरेको छ । नगरपालिकाले अन्य वडामा पनि राहत सामग्री वितरण गर्ने भएको छ ।

नगर प्रमुख घनश्याम भण्डारीले लकडाउनका कारण कुनै पनि नागरिकलाई भोकै मर्न नदिने दाबी गरेका छन् । त्यसका लागि नगरपालिकाले विपत् व्यवस्थापन कोष स्थापना गरेको छ । यस्तै सदरमुकाम समेत रहेको नारायण नगरपालिकाले शनिवार देखि राहत वितरण शुरू गरेको छ । नगरपालिकाभित्र रहेका ९५४ घरधुरीलाई राहत वितरण शुरू गरिएको नगरपालिकाले बताएको छ ।

 सबैभन्दा बढी समस्यामा परेका नारायण नगरपालिका–६ नमूना बस्तीमा बसोवास गर्ने बादी समुदाय लगायतलाई सरकारले तोकेको मापदण्डका आधारमा राहत वितरण शुरू गरिएको हो । ११ ओटा स्थानीयतह रहेका अधिकांश स्थानीय तहले राहत कोष स्थापना गरेका छन् । नारायण नगरपालिकाले ३० लाख, महाबु गाउँपालिकाले ५० लाख, डुंगेश्वर गाउँपालिकाले २५ लाख, चामुण्डाबिन्द्रासैनी नगरपालिकाले ५० लाख र ठाटीकाँध गाउँपालिकाले २१ लाख रुपैयाँको राहत कोष स्थापना गरेका छन् । उक्त कोषमा सहयोग जुट्ने क्रम जारी रहेको सम्बन्धित पालिकाहरूले बताएका  छन् ।

यसैबीच, आइतवार नेपाली कांग्रेस नगर कार्य समिति दुल्लुले दुल्लु नगरपालिका–२ को क्वारेन्टाइनमा खाद्यान्न सामग्री प्रदान गरेको छ । कार्यसमितिले चामल, दाल, तरकारी लगायत खाद्य सामग्री सहयोग गरेको समितिका सभापति टंक रिमालले जानकारी दिए । उनका अनुसार कांग्रेसले नगरभित्रका १३ ओटै वडामा रहेका क्वारेन्टाइनमा खाद्यान्न सामग्री सहयोग गर्नेछ । 

प्रतिक्रिया [0]
प्रतिक्रिया दिनुहोस्