ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

पोखरा महानगरले तीन आयोजना बनाउन सांसदसँग थाल्यो छलफल 

२०७६ माघ, १  
प्रदेश गण्डकी
Image Not Found
author avatar नरहरि पौड्याल

कास्की । पोखरा महानगरपालिकाले सार्वजनिक निजी साझेदारी (पीपीपी) का लागि छनोट भएका आयोजनाबारे सांसदसँग छलफल चलाएको छ । महानगरले कास्कीबाट संघीय र गण्डकी प्रदेश सभामा प्रतिनिधित्व गर्ने सांसदहरूसँग पोखरा महानगरभित्र सञ्चालन हुने सार्वजनिक निजी साझेदारीका आयोजनाबारे छलफल गरेको हो । 

सेतीखोंच साहसिक पर्यटन पूर्वाधार विकास आयोजना, पातले छाँगोमा निर्माण गरिने सिसाको पुल तथा अन्य पूर्वाधार विकास आयोजना र सराङकोट पर्यटन पूर्वाधार विकास आयोजनाबारे मंगलवार छलफल भएको थियो । 

पोखरा महानगरका प्रमुख मानबहादुर जिसीको अध्यक्षतामा भएको कार्यक्रममा सांसदहरूले महानगरले ल्याएका योजनालाई कार्यान्वयन तहमा लैजानुपर्ने बताउँदै पीपीपी मोडेलमा योजना बनाउँदा सार्वजनिक हितलाई केन्द्रमा राख्न सुझाव दिएका छन् । 

कार्यक्रममा युवा तथा खेलकुद मन्त्री जगतबहादुर विश्वकर्माले महानगरले सार्वजनिक हितलाई ख्याल गरेर नै पीपीपी आयोजनालाई अगाडि बढाउने बताए । ‘महानगरले ल्याएका आयोजनाले पोखराको सुन्दरतालाई अझ प्रवद्र्धन गर्दछ,’ उनले भने, ‘आयोजना कार्यान्वयन गर्दा सार्वजनिक रूपमा छलफल हुनु आवश्यक छ र महानगरले सरोकारवालासँग छलफल गरेर काम अगाडि बढाउनु उचित हुन्छ ।’ कास्की क्षेत्र नम्बर ३ का सांसद समेत रहेका विश्वकर्माले हरेक सम्भवनाको खोजी गर्दै पोखरामा थप पर्यटकीय गतिविधि बढाउने योजनालाई प्राथमिकता दिनुपर्ने बताए । 

कास्की क्षेत्र नम्बर १ का सांसद तथा पूर्वमन्त्री खगराज अधिकारीले सेतीखोंचमा साहसिक पर्यटकीय पूर्वाधार निर्माण गर्दा शवदह स्थल र रामघाटबाट नदीजन्य पदार्थ उत्खननलाई व्यवस्थित गर्नुपर्ने उल्लेख गरे । उनले महानगरले ल्याएका योजना सम्पन्न गर्न सक्दो सहयोग गर्ने प्रतिबद्धता पनि व्यक्त गरेका छन् । 

गण्डकी प्रदेश सांसद तथा विकास समितिका सभापति दीपक कोइरालाले थोरै लगानी गरेर राम्रो आमदानी गर्न सकिने धेरै ठाउँ भएकाले त्यसप्रति महानगरले ध्यान दिनुपर्ने बताए । उनले लेखनाथका ताललाई समेटेर योजना बनाउँदा थोरै लगानीमा धेरै आम्दानी गर्न सकिने तर्क गरे । 

त्यस्तै, प्रदेश सांसद मनबहादुर गुरुङले रामघाटलाई तालका रूपमा विकास गर्न त्यसबारे अध्ययन गर्नुपर्ने बताए । योजना ल्याएपछि त्यसलाई कार्यान्वयन हुनेगरी ल्याउनु पर्नेमा उनको जोड छ ।  प्रदेश सांसद विन्दुकुमार थापाले महानगरले ल्याएको योजनाले पोखराको पर्यटनमा थप टेवा पुग्ने बताए । उनले सेती नदीमा पर्यटकीय पूर्वाधार निर्माण गर्दा नदीलाई प्रदूषित हुनबाट जोगाउनुपर्ने उल्लेख गरे । प्रदेश सांसद रामजी बरालले आन्तरिक पूँजीलाई सही रूपमा परिचालन र व्यवस्थापन गर्नुपर्ने बताए । उनले सेतीबाट नदीजन्य पदार्थ उत्खननलाई व्यवस्थित गर्नुपर्नेमा जोड दिए । 

प्रदेश सांसद राजीव पहारीले मापदण्ड लागू गर्न तथा सार्वजनिक सम्पत्तिको संरक्षणमा कठोर भएर काम गर्नुपर्ने उल्लेख गरे । उनले अबको विकासको मोडेल नै पीपीपी भएकाले महानगरले ल्याएका आयोजना सम्पन्न गर्न संघ र प्रदेशले पनि सक्दो सहयोग गर्नुपर्ने बताए । 

कार्यक्रममा प्रदेश सांसद मित्रकुमारी गुरुङ सुवेदी र पुष्पा केसी भण्डारीले पनि महानगरले अगाडि सारेका योजनालाई सफल बनाउन तीन तहका सरकारबीच समन्वय आवश्यक पर्नेमा जोड दिएका थिए । 

महानगरका प्रमुख मानबहादुर जिसीले सार्वजनिक हितलाई ध्यानमा राखेर नै महानगरले तीन आयोजनालाई पीपीपी मोडेलमा अगाडि बढाएको बताए । उनले योजनालाई सम्पन्न गर्न संघ र प्रदेशको पनि साथ र सहयोग आवश्यक पर्ने उल्लेख गरे । पूर्वाधार र विकासको काम गर्दा सम्बन्धित क्षेत्रका संघीय सांसदको नेतृत्वमा प्रदेश सांसद र स्थानीय तहका जनप्रतिनिधिसहितको टीम बनाएर काम गर्दा विकासले गति लिने तथा योजना डुब्लिकेशनको समस्या पनि नहुने भएकाले टिम बनाएर काम गर्न उनले प्रस्ताव गरेका थिए ।

सार्वजनिक निजी साझेदारी कार्यक्रमका सहजकर्ता अनन्तप्रसाद कोइरालाले ३ ओटा आयोजनाकबारे कार्यक्रममा प्रस्तुति राखेका थिए । उनले सेती खोंच विकास आयोजनाको प्रस्तावित लगानी रू. १ अर्ब ५८ करोड, पातले छाँगो सिसा पुल तथा अन्य पूर्वाधार विकास आयोजनामा रू. ४९ करोड १९ लाख, सराङकोट पर्यटन पूर्वाधार विकास आयोजनाको प्रस्तावित लगानी रू. १४ करोड ७४ लाख रहेको जानकारी दिए ।
 

प्रतिक्रिया [0]
प्रतिक्रिया दिनुहोस्