ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

उर्वर भूमिमै ‘घना बस्ती’ कार्यक्रम

२०७६ माघ, २  
प्रदेश ०५
Image Not Found
author avatar माधवकुमार ओली

रोल्पा । अर्गानिक तरकारी उत्पादनमा राम्रो पहिचान बनाएको रोल्पाको माडीचौर क्षेत्र पछिल्लो समय शहरीकरणको चपेटामा पर्न थालेको छ । रोल्पा नगरपालिकाको ७ नं वडा कार्यालय यहीँ भएकाले यसअघि नै बस्ती विकास हुँदै गएको थियो । पछिल्लो समय संघीय सरकारको शहरी विकास मन्त्रालयको ‘घना बस्ती विकास’ कार्यक्रमका लागि जिल्ला समन्वय समिति रोल्पाले पनि यही क्षेत्र नै सिफारिश गरेपछि खेतीयोग्य जमीनको खण्डीकरण बढेको छ ।

जिल्लामै पहिचान बनाएको माडीचौरको कृषिक्षेत्र शहरीकरणले संकटमा पर्न थालेको भन्दै स्थानीयले चिन्ता व्यक्त गरेका छन् । ‘पहिले भन्दा अहिले कृषि उत्पादनमा कमी आउन थालेको छ’ प्रगतिशील महिला कृषि सहकारी संस्था रोल्पा नपा–७ माडीचौरकी सचिव राधा पुनले भनिन्, ‘यसरी घना बस्ती विस्तार हुँदै जाने हो भने अब यहाँ कृषि गर्नै मुश्किल छ ।’

माडीचौरमा उत्पादित तरकारीले सदरमुकामसम्मको माग धानेको छ । यस्तै धान, गहुँ र मकैको बीउ जिल्ला बाहिर निकासी समेत हुने गरेको छ । अघिल्लो वर्षसम्म माडीचौरलाई कृषिको पकेट क्षेत्रको रूपमा विकास गर्ने भन्दै आएका स्थानीय जनप्रतिनिधिले समेत अहिले घना बस्ती विकासकोे योजना बनाएका छन् । रोल्पा नगरपालिकाले चालू यो कार्यक्रमकै लागि बजेट विनियोजन गरेको छ । यद्यपि घना बस्ती विकासले तत्काल कृषि उत्पादनमा असर नपर्ने नगरपालिकाका प्रमुख पूर्ण केसीको तर्क छ । ‘हामीले कृषिसँगै घना बस्ती कार्यक्रम अघि बढाउने सोचमा छौं,’ उनले भने ‘यसले यहाँको पहिचान मेटिँदैन ।’

स्थानीयको सुझाव र आवश्यकताका आधारमा कुन ठाउँमा के कस्ता पूर्वाधार विकासका योजना बनाउने भन्नेमा सरकार गम्भीर बन्नुपर्ने स्थानीय त्रिपनी घर्तीले औंल्याइन् । ‘घना बस्ती विकास पनि राम्रै हो,’ उनले भनिन्, ‘तर माडीचौर क्षेत्रमै बस्ती बसाल्नुपर्छ भन्ने भनाइ उचित होइन ।’

प्रतिक्रिया [0]
प्रतिक्रिया दिनुहोस्