arthik abhiyan
ad banner Mango Tech Digital Marketing Solution

२६ अंकले नेप्से बढ्दा १ अर्बभन्दा बढीको कारोबार, १३०० विन्दु माथि नेप्से

१२ ओटा कम्पनीको शेयर मूल्यमा सर्किट

२०७६ माघ, २  
लगानी नेप्से विश्लेषण
Image Not Found
author avatar अभियान संवाददाता

माघ २, काठमाडौं । साताको अन्तिम कारोबार दिन नेप्से परिसूचक बढेर बन्द भएको छ । बिहीवार नेप्से परिसूचक २६ अंकले बढ्दा नेप्सेमा १ अर्बभन्दा बढीको कारोबार भएको छ । 

यस दिन १ हजार २८४ दशमलव २९ विन्दुबाट सुरु भएको परिसूचक कारोबारको पहिलो घण्टामा बढेर १ हजार ३०० को विन्दुमा रहेको थियो । सो विन्दुपश्चात् निरन्तर बढेको बजार अन्तमा १ हजार ३१० दशमलव २३ विन्दुमा पुगेर बन्द भएको हो । 

बैंक तथा वित्तीय क्षेत्रमा तरलता बढेसँगै व्याजदर घट्न थालेपछि कारोबार रकममा वृद्धि आएको देखिन्छ । बुधवारको तुलनामा यस दिन नेप्से परिसूचक २ दशमलव शून्य २ प्रतिशत बढेर बन्द भएको छ । 

बिहीवार कारोबारमा आएका १२ समूहको परिसूचकमध्ये ‘अन्य’ समूहको परिसूचक बाहेक बाँकी सबै समूहको परिसूचक बढेर बन्द भएको छ । 

यस दिन वित्त समूहको परिसूचक सर्वाधिक ४ दशमलव १६ प्रतिशत बढेको छ भने उत्पादन तथा प्रशोधन समूहको परिसूचक ४ दशमलव शून्य ३ प्रतिशत बढेर बन्द भएको छ । 

यस्तै व्यापार लगायत होटल, लघुवित्त, जीवन बीमा र म्युचुअल फन्ड समूहको परिसूचक ३ प्रतिशतभन्दा बढी बढेर बन्द भएको छ ।

विकास बैंक र निर्जीवन बीमा समूहको परिसूचक २ प्रतिशतभन्दा बढी बढेको छ । बैंकिङ समूहको परिसूचक १ दशमलव ६९ प्रतिशत बढेको छ भने जलविद्युत् समूहको शून्य दशमलव ७८ प्रतिशत बढेको छ । घटेर बन्द भएको ‘अन्य’ समूहको परिसूचक शून्य दशमलव २५ प्रतिशत घटेको हो ।
 

बिहीवार  १ अर्बभन्दा बढीको कारोबार

बिहीवार रू.१ अर्ब ६९ करोड ९९ लाख बराबरको शेयर कारोबार भएको छ ।

यो अघिल्लो कारोबार दिनको तुलनामा ८७ दशमलव ८८ प्रतिशत बढेको हो । गत कारोबार दिन बुधवार रू.९० करोड ४८ लाख रकम बराबरको शेयर कारोबार भएको थियो ।

सेन्सेटिभ इन्डेक्स ३ दशमलव ९० अंक बढेर २ सय ८२ दशमलव ८७ विन्दुमा बन्द भएको छ ।

१२ कम्पनीको शेयरमूल्यमा सर्किट

बिहीवारको कारोबारमा १२ कम्पनीको शेयरमूल्यमा सकारात्मक सर्किट लागेको छ । 

एनआईबीएल प्रगती फन्डको एकाई मूल्य लगायत आईसीएफसी फाइनान्स, ग्लोबल आईएमइ लघुवित्त, तिनाउ मिसन डेभलपमेन्ट बैंक र मल्टीपर्पस फाइनान्सको शेयरमूल्य १० प्रतिशत बढेको छ भने नेश्नल माइक्रोफाइनान्स, इन्फीनिटी लघुवित्त लगायत ८ कम्पनीको शेयरमूल्य ९ प्रतिशतभन्दा बढी बढेका छन् । 
सर्वाधिक शेयरमूल्य बढ्ने १० कम्पनीमध्ये अधिकांश कम्पनी लघुवित्त र वित्त समूह अन्तर्गतका रहेका छन् । 

यस्तै शेयरमूल्य घटेर कारोबार हुनेमा महिला सहयात्रा माइक्रोफाइनान्सको शेयरमूल्य २ दशमलव ६८ प्रतिशत घटेको छ भने हिमालयन पावर पार्टनरको शेयरमूल्य १ दशमलव ९१ प्रतिशत घटेको छ ।
 

१२ समूहको परिसूचक


हिमालयन डिस्टिलरीको सर्वाधिक कारोबार

बिहीवार हिमालयन डिस्टिलरीको सर्वाधिक शेयर कारोबार भएको छ । 

कम्पनीको १ लाख १५ हजार ५१२ कित्ता शेयरको खरीदविक्री हुँदा रू.१४ करोड ३८ लाख बराबरको शेयर कारोबार भएको छ । कम्पनीको शेयरमूल्य रू.१ हजार २६८ रहेको छ ।

 कारोबार रकमकै आधारमा दोस्रोमा शिवम् सिमेन्टको रू.१३ करोड ५९ लाख बराबरको शेयर कारोबार भएको छ । कम्पनीको अन्तिम शेयरमूल्य रू.५२४ कायम रहेको छ । 

यस्तै एनआईसी एशिया बैंकको रू.६ करोडभन्दा बढीको शेयर किनबेच भएको छ भने नेपाल लाइफ इन्स्योरेन्स लगायत नेपाल बैंक र कुमारी बैंकको रू.४ करोडभन्दा बढीको शेयर किनबेच भएको छ । 

यस दिन कारोबारमा आएका १८१ कम्पनीमा १५४ कम्पनीको शेयरमूल्य बढेको छ भने १५ कम्पनीको घटेको छ । साथै १२ कम्पनीको शेयरमूल्य स्थिर रहेको छ । बिहीवारको एडी रेशियो १० दशमलव २७ रहेको छ । 
 

प्रतिक्रिया [0]
प्रतिक्रिया दिनुहोस्