arthik abhiyan
ad banner Mango Tech Digital Marketing Solution

सिनेटमा पठाइयो ट्रम्पविरुद्धको अभियोगपत्र 

२०७६ माघ, २  
अन्तरराष्ट्रिय
Image Not Found

माघ २, वाशिङटन डीसी (अमेरिका) । अमेरिकाको तल्लो सदनले राष्ट्रपति डोनाल्ड ट्रम्प विरुद्धको महाभियोगसम्बन्धी आरोपपत्रहरू त्यहाँको माथिल्लो सदनलाई पठाएको छ । 

बुधवार हाउस अफ रिप्रिजेन्टेटिभ्सले औपचारिक रूपमै सिनेटलाई आरोप पत्र सुम्पिएको हो । राष्ट्रपतिविरुद्धको महाभियोग सम्बन्धी थप प्रक्रिया सिनेटले शुरू गर्नेछ । 

आरोपपत्रहरू सिनेटमा पठाउने प्रस्तावको पक्षमा २२८ मत र विपक्षमा १९३ मत खसेको थियो । आरोपपत्रहरूमा हाउस अफ रेप्रेजेन्टेटिभ्सकी सभामुख न्यान्सी पेलोसीले हस्ताक्षर गरेकी थिइन । 

आफ्ना प्रतिद्वन्द्वी पूर्व उप–राष्ट्रपति जो बाइडनमाथि अनुसन्धान शुरु गर्न यूक्रेनलाई दबाब दिएको र कंग्रेसलाई अवरुद्ध भएको भन्दै डिसेम्बर १८ मा तल्लो सदनले ट्रम्पमाथि महाभियोग लगाएको थियो । 

तर ती आरोपलाई ट्रम्पले भने शुरूदेखि नै अस्वीकार गर्दै आएका छन् । सिनेटमा पढेर सुनाइएपछि आरोपपत्रहरूलाई बिहीवार अपराहन्न सार्वजनिक गरिने रिपब्लिकन सिनेटर मिच मक्कनेलले बताएका छन् । 

उनका अनुसार मंगलवार महाभियोगसम्बन्धी सुनुवाइ शुरू हुनेछ । बढीमा २ हप्तामा यो मामिलाबारे फैसला हुने अपेक्षा छ ।  प्रत्यक्षदर्शीलाई समेत सोधपुछ गर्न बोलाइयो भने फैसला फेबु्रअरीसम्म लम्बिने बताइएको छ । 

तल्लो सदनमा विपक्षी दल डेमोक्रेटको पकड छ । महाभियोग पारित गर्न डेमोक्रेटहरुले ६७ मत जुटाउनु पर्छ । माथिल्लो सदनमा भने ट्रम्पको सत्तारूढ दल रिपब्लिकनको प्रभुत्व छ । 

२० रिपब्लिकन सिनेटरले महाभियोगको पक्षमा मतदान गरे मात्रै महाभियोग पारित हुने स्थिति छ । तर अधिकांश रिपब्लिकनले महाभियोगको विपक्षमा मतदान गर्ने घोषणा गरिसकेका छन् । त्यसैले यो महाभियोग पारित नहुने सम्भावना बढी छ ।

 महाभियोग पारित भए ट्रम्प पदबाट हट्नेछन् र उनको स्थानमा बाँकी कार्यकाल माइक पेन्सले कार्यकारी राष्ट्रपतिको भूमिका निर्वाह गर्नेछन् । एजेन्सी
 

प्रतिक्रिया [0]
प्रतिक्रिया दिनुहोस्