ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

चिनियाँ अर्थतन्त्र २९ वर्षयताकै सुस्त

२०७६ माघ, ४  
अन्तरराष्ट्रिय
Image Not Found

माघ ४, पेचिङ (चीन) । सन् २०१९ मा चिनियाँ अर्थतन्त्र २९ वर्षयताकै सुस्त बन्न पुगेको छ । चीनको तथ्यांक विभागले सार्वजनिक गरेको तथ्यांक अनुसार गत वर्ष चीनको अर्थतन्त्र ६ दशमलव १ प्रतिशत बढेको हो ।

यो वृद्धिदर चीनको लागि २९ वर्षयताकै कम हो । कमजोर आन्तरिक माग र अमेरिकासँगको व्यापार युद्धको कारण चीनको अर्थतन्त्र सुस्ताएको हो । पछिल्लो दुई वर्षदेखि चीनले आर्थिक सुधारको लागि विभिन्न कार्यक्रम अघि सारिरहेको छ । 

तर उक्त कार्यक्रमले चीनको आर्थिक वृद्धि बढाउन भने सकेको छैन । अमेरिकासँगको सम्बन्धमा सुधारको आशामा चीनको म्यानुफ्याक्चरिङ र व्यावसायिक मनोबलमा भने सुधार आइरहेको छ ।हालै मात्र अमेरिका र चीनले पहिलो चरणको व्यापार सम्झौतामा हस्ताक्षर गरेका छन् ।

अझै पनि पछिल्लो समय देखिएको सुधार निरन्तर जारी रहनेमा विश्लेषकले आशंका व्यक्त गर्दै आएका छन् । अर्थतन्त्र सुस्ताएसँगै चीनले त्यसमा सुधारको लागि  थप स्टिमुलसका कार्यक्रम ल्याउने अपेक्षा छ ।

चीनले यसअघि पनि आर्थिक सुधारको लागि विभिन्न योजना ल्याएको थियो । जसमा कर कटौती गर्नेदेखि स्थानीय सरकारलाई पूर्वाधार परियोजनाका लागि उल्लेख्य मात्रामा ऋणपत्र विक्री गर्ने अधिकार प्रदान गरिएको थियो । 

चिनियाँ बैंकहरूलाई पनि विशेषगरी साना व्यवसायलाई ऋण दिन सरकारले प्रेरित गरिरहेको छ । गत वर्ष चीनको स्थानीय मुद्रामा दिइएको नयाँ ऋण अहिलेसम्मकै उच्च २४ खर्ब ४० अर्ब डलरमा पुगेको थियो । 

इतिहास हेर्ने हो भने चीनले निकै लामो समय अहिलेको भन्दा तीव्र गतिको आर्थिक वृद्धि हासिल गरेको थियो । २१ औं शताब्दीको शुरूआती दशकमा उसको अर्थतन्त्रमा दोहोरो अंकको आर्थिक वृद्धि देखिएको थियो ।

 तर अहिले हासिल भएको ६ दशमलव १ प्रतिशतको आर्थिक वृद्धि पनि विश्वका प्रमुख अर्थतन्त्रको तुलनामा तीव्र गतिको सुधार हो । उदाहरणको लागि अमेरिकालाई लिन सकिन्छ । 

विश्वको सबैभन्दा ठूलो अर्थतन्त्रको आर्थिक वृद्धिदर गत वर्षको लागि २ दशमलव २ प्रतिशत मात्र रहने आकलन छ । केहीले भने व्यापार युद्धले चीनलाई वास्तवमा फाइदा पुगेको बताएका छन् ।

कुनै पनि मुलुकको लागि ३ दशककै सुस्त अर्थतन्त्र बन्नु एक ठूलो चुनौती भए पनि चीनको लागि यो समस्या नरहेको उनीहरूको भनाइ छ । एजेन्सी

प्रतिक्रिया [0]
प्रतिक्रिया दिनुहोस्