ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

अमेरिकी शेयरमा ४६ वर्षकै उच्च साप्ताहिक वृद्धि 

२०७६ चैत, २८  
अन्तरराष्ट्रिय
Image Not Found

चैत २९, वाशिङटन डीसी (अमेरिका) । अमेरिकी शेयर बजारमा ४६ वर्षयताकै उच्च साप्ताहिक वृद्धि देखिएको छ । 

कोरोना भाइरसको महामारीका कारण आर्थिक परिदृश्य धूमिल बनेको भएपनि केन्द्रीय बैंक ‘फेडरल रिजर्भ’ (फेड)ले अर्थतन्त्रलाई टेवा दिन थप स्टिमुलस कार्यक्रम घोषणा गरेपछि शेयर परिसूचक उच्च वृद्धि भएको हो । 

यस हप्ता एसएण्डपी ५०० परिसूचक १२ प्रतिशतले बढेको छ । एसएण्डपीमा भएको यो वृद्धि सन् १९७४ यताकै उच्च साप्ताहिक वृद्धि हो । कोरोना भाइरसको आर्थिक प्रभाव खराब बन्दै गएपछि वित्तीय बजारमा तीव्र उतारचढाव देखिएको छ । 

विश्व अर्थतन्त्रको भविष्य कस्तो रहने हो भन्ने चिन्तामा लगानीकर्ताहरुले सुरक्षित लगानीका रुपमा हेरिने सुनमा लगानी बढाउँदा पहेंलो धातुको भाउ भने ७ वर्षकै उच्च बिन्दुमा उक्लिएको छ । 

शुक्रवार न्यूयोर्क मर्कन्टाइल एक्सचेञ्जको कोमेक्स डिभिजनमा कारोबार बन्द हुँदा सुनको भाउ प्रतिऔंस १ हजार ७३६ डलर २० सेन्टमा पुगेको थियो । 
अर्थतन्त्रमा महामारीले पार्ने धक्का कम गर्न फेड आक्रामक देखिने अपेक्षामा शेयर लगानीकर्ताहरु उत्साहित भएको विश्लेषण गरिएको छ । 

यूरोपमा कोरोना भाइरसको संक्रमण र मृत्यु दरमा आएको कमीले पनि लगानीकर्ताहरु उत्साहित बनेको एक्सिकर्पमा प्रमुख बजार रणनीतिज्ञ स्टेफन इनेस बताउँछन् । 

कर्जा बजारलाई टेवा दिन २३ खर्ब डलर उपलब्ध गराउने र आर्थिक उतारचढाव विरुद्ध लड्न सक्रिय र आक्रामक रुपमा कदम चाल्ने फेडले बिहीवार बताएको थियो । 

अमेरिकामा कोरोना भाइरसको संक्रमणका कारण मर्नेको संख्या यस अघि भनिएको भन्दा कम हुन सक्ने भन्नेबारे त्यहाँको संक्रामक रोग हेर्ने निकायका प्रमुख एन्थोनी फओसीले दिएको अभिव्यक्तिका कारण पनि यस हप्ता बजार उकलो लागेको हो ।

यसअघि अमेरिकामा कोभिड–१९ का कारण २ लाख ४० हजारको मृत्यु हुने अनुमान गरिएको थियो । पछिल्लो समय भने यो संख्या ६० हजार आसपास रहने बताइएको छ । एजेन्सी
 

प्रतिक्रिया [0]
प्रतिक्रिया दिनुहोस्