ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

नयाँ वर्ष २०७७ मा प्रधानमन्त्रीको सन्देश : संकटबाट सिर्जित चुनौतीलाई अवसरमा रूपान्तरित गरौं

२०७७ बैशाख, १  
समाचार
Image Not Found
author avatar टीपी भुसाल

वैशाख १, काठमाडौं । प्रधानमन्त्री केपी शर्मा ओलीले कोरोना भाइरस संक्रमणबाट प्रभावित हुने सबै वर्ग र क्षेत्रका नागरिकको अभिभावकत्व सरकारले लिने बताउनुभएको छ । 

नयाँ वर्ष विसं २०७७ का अवसरमा दिनुभएको भीडीयो सन्देशमा प्रधानमन्त्री ओलीले संकटले सम्भावनाको पनि ढोका खोल्ने उल्लेख गर्दै संकट सिर्जित चुनौतीलाई अवसरमा रूपान्तरित गर्ने प्रतिवद्धता व्यक्त गर्नु भएको छ । 

कोभिड –१९ को विश्वव्यापी महामारीबाट सिर्जित संकटकै बीच अवसर पहिल्याएर देश अघि बढ्ने सबैभन्दा पहिले जनतालाई महामारीबाट उम्काइने र सँगसँगै रोजीरोटीको जोहो गरिने प्रधानमन्त्रीले सम्बोधनमा उल्लेख गर्नुभएको छ ।

कृषि, साना तथा मझौला उद्योगका अतिरिक्त स्वरोजगारीका नयाँ सम्भावनाहरूको खोजी गर्न सम्बन्धित क्षेत्रका व्यवसायी, विशेषज्ञहरू र स्वयं युवाहरूसँग मिलेर ठोस योजना अगाडि सारिनेसमेत उहाँले बताउनुभएको छ । 

कोरोना भाइरस संक्रमणको महामारीले स्वास्थ्य पूर्वाधारमा लगानी गर्न सिङ्गो विश्वलाई घच्घच्याएको उल्लेख गर्दै प्रधानमन्त्रीले सन्देशमा सरकारले यसलाई गम्भीर ध्यान दिने बताउनु भएको छ । 

पुरानो वर्षलाई विदा गर्ने र नयाँ वर्षलाई स्वागत गर्ने यो घडी उल्लास र उमंगको पर्व हुनुपर्ने भए पनि यस वर्षलाई साह्रै अप्ठ्यारो परिस्थितिमा स्वागत गरिरहेको भन्दै उहाँले सन्देशमा सामाजिक दुरी सहितको एकताबाटै यो युद्धलाई जित्न बताउनुभयो । 

सर्वसाधारण जनता र कमजोर वर्गलाई यथासम्भव सामाजिक संरक्षण प्रदान गर्ने, यस समस्याबाट प्रभावित निजी क्षेत्रलाई प्रोत्साहन उपलब्ध गराउने, कृषक तथा आम श्रमिकहरूको आय निरन्तरताका लागि आवश्यक व्यवस्था गरिने उहाँले जारी गरेको सन्देशमा उल्लेख छ । 

प्रधानमन्त्रीले अग्रमोर्चामा रहेर कोरोना भाइरसकाविरुद्ध कठीन लडाइको अगुवाइ गरिरहेकाहरूको मनोबल उच्च पार्नसमेत अपीलसमेत गर्नुभएको छ ।
 

प्रतिक्रिया [0]
प्रतिक्रिया दिनुहोस्