ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

निजगढ नगरपालिकाको सेवा नयाँ भवनबाट 

२०७६ माघ, ८  
प्रदेश ०२
Image Not Found


बारा (अस) । बाराको निजगढ नगरपालिकाले आफ्नो कार्यालय नयाँ भवनमा सारेको छ । नगरपालिकाले सोमवारदेखि आफ्ना सेवा वडा नं ७ लिच्ची टोलस्थित गणेश भवनबाट सञ्चालन गरेको छ । यसअघि नगरपालिकाको सेवा साबिकको निजगढ गाउँ विकास समितिको कार्यालयबाट सञ्चालन हुँदै आएको थियो । 

दाताहरूले दिएको ११ कठ्ठा जग्गामा करीब ३ करोड रुपैयाँ लागतमा दुईतले १९ कोठे भवन निर्माण गरिएको नगरपालिकाका प्रमुख प्रशासकीय अधिकृत विशकसेन ढकालले जानकारी दिए । जग्गादाताको नामबाट भवन र भवनसम्म पुग्ने सडकका नामकरण गरिएको उनले बताए । गणेश गुरुङको स्मृतिमा गणेश भवन र तेमनाथ तिमल्सिनाको स्मृतिमा तेमनाथ मार्ग नामकरण गरिएको छ । 

पुरानो भवनमा नयाँ संरचना थप गरेर सञ्चालन गरिए पनि कोठा अभावमा विभिन्न विषयगत शाखा सञ्चालन गर्न समस्या हुँदै आएको थियो । भवनमा कोठा अभावले न्यायिक समितिको इजलाशसमेत सञ्चालन हुन नसकेको उपमेयर लिलादेवी लामिछानेले बताइन् । नयाँ भवनको औपचारिक उद्घाटन हुन बाँकी रहेको छ । माघ अन्तिम साता संघीय सरकारका मन्त्रीको उपस्थितिमा औपचारिक उद्घाटन गर्ने कार्यपालिकाले निर्णय भएको उपमेयर लामिछानेले जानकारी दिइन् । प्रतिष्ठा कन्स्ट्रक्शनले निर्माणको जिम्मा पाएको भवनको २०७३ कात्तिक १८ गते तत्कालीन उपप्रधान तथा स्थानीय विकास मन्त्री कमल थापाले शिलान्यास गरेका थिए ।

प्रतिक्रिया [0]
प्रतिक्रिया दिनुहोस्