ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

एयर इन्डियाको आम्दानी खस्किएपछि सम्पूर्ण शेयर विक्री गर्ने योजनामा भारत

२०७६ माघ, १३  
अन्तरराष्ट्रिय
Image Not Found

माघ १३, नयाँदिल्ली । भारत सरकारले राष्ट्रिय ध्वजाबाहक बिमान सेवा एयर इन्डियाको खस्कदो अवस्थालाई ध्यानमा राख्दै कम्पनीको सम्पूर्ण शेयर विक्री गर्ने योजना सोमवार सार्वजनिक गरेको छ । भारतको आर्थिक मन्दीसँगै राजस्व संकलनमा प्रभाव पर्न थालेको भन्दै कम्पनीमा थप पूँजी लगानी गर्न नसकिने भारत सरकारको धारणा छ ।     
     
भारत सरकारले गत वर्ष नै कम्पनीको आंशिक शेयर विक्री गर्ने योजना सार्वजनिक गरेर प्रस्ताव माग गरेपनि कुनै पनि समूहले कम्पनी खरीद गर्न इच्छा देखाएका थिएनन् । तर यसपटक सरकारले सम्पूर्ण शेयर विक्री गर्ने योजना अघि सारेको छ ।     
     
सरकारले सोमवार बिमान कम्पनी खरीद गर्न चाहनेहरुबाट इच्छापत्र माग गरेको छ । एयर इन्डियाले हाल स्वदेश र विदेशका धेरै गन्तव्यमा उडान गरिरहेको छ । तर विगत दशकमा कम्पनीको आम्दानीमा व्यापक गिरावट आएपछि सरकारले हरेक वर्ष लगानी गर्नुपर्ने अवस्था सिर्जना भएको छ । यस कम्पनीको हाल ८ अर्ब अमेरिकी डलर ऋणभार छ ।     
     
प्रधानमन्त्री नरेन्द्र मोदीले आफ्नो कार्यकालमा सरकार सञ्चालित धेरै ओटा कम्पनीलाई निजीकरण गर्न आदेश दिइसकेका छन् । भारतको अर्थतन्त्रमा रुग्ण सरकारी कम्पनीमा वर्षैपिच्छे ठूलो धनराशी खर्च गर्नु परेको भन्दै सरकारले निजीकरणलाई प्रोत्साहन गरेको बताएको छ । भारतको अर्थतन्त्रको वृद्धि गत जुलाईदेखि सेप्टेम्बरको अवधिमा ४ दशमलव ५ प्रतिशत मात्र रहेको छ र यो सन् २०१८ भन्दा सबैभन्दा न्यून हो ।     
     
मोदी सरकारले एयर इन्डियामा विदेशी लगानीकर्ता आकर्षित हुने ठूलो विश्वास गरेको छ । सरकारले आगामी मार्चसम्ममा सरकारी पूँजी विक्रीबाट करीब १५ अर्ब डलर सरकारी कोषमा संचित गर्ने योजना बनाएको छ ।     
     
एयर इन्डियाले सन् २०१९ मा देशभित्र १ करोड ८३ लाख ६० हजार यात्रुलाई सेवा दिएको थियो । तर सरकारी नीति, नियम र हस्तक्षेपका कारण यस कम्पनीले निजी क्षेत्रका कम्पनीसँग प्रतिस्पर्धा गर्न नसकी चाहेजति प्रगति गर्न सकेको छैन । खासगरी सन् २००७ मा इन्डियन एयरलाइन्ससँग मर्ज गरेपछि कम्पनीको घाटा हरेक वर्ष बढेको छ ।     
     
एयर इन्डियासँग हाल १२१ ओटा बिमान तथा एयर इन्डिया एक्सप्रेसमा २५ ओटा बिमान छन् । भारतीय समाचार संस्था प्रेस ट्रस्ट अफ इन्डियाका अनुसार एयर इन्डियाको कर्मचारी युनियनले सोमवार सरकारका प्रतिनिधिसँग कम्पनीको निजीकरणका विषयमा छलफल गर्न लागेको छ ।     
     
गत साता, अन्तरराष्ट्रिय मुद्रा कोषले भारतको आर्थिक वृद्धि जटिल अवस्थामा रहेको र तत्काल सुधारका कार्यहरु अगाडि नबढाए समस्या अझ बढ्ने बताएको थियो ।  रासस/ एपी
 

प्रतिक्रिया [0]
प्रतिक्रिया दिनुहोस्