ई –पेपर | हाम्रो बारेमा | विज्ञापन | ग्राहक बन्नुहोस | Podcast | NBA
arthik abhiyan
ad banner Mango Tech Digital Marketing Solution

कञ्चनपुरका ४३ योजनालाई काम गर्ने अनुमति

२०७७ बैशाख, २२  
सुदूरपश्चिम प्रदेश
Image Not Found

वैशाख २२, भीमदत्तनगर । कञ्चनपुरमा लकडाउनका बेला यहाँका विकास निर्माणका कामलाई सावधानी अपनाएर अघि बढाउन स्थानीय प्रशासनले ४३ योजनालाई अनुमति दिएको छ ।

कोरोना भाइरस नियन्त्रणका लागि लकडाउन गरिएपछि यहाँका विकास निर्माणको काम ठप्प रहेको थियो । लकडाउनको अवधि लम्बिने भएपछि जिल्ला प्रशासन कार्यालय कञ्चनपुरले केही दिनयता साना, मझौला र ठूला आयोजनाको काम गर्न दिइने अनुमति दिएको हो ।

कञ्चनपुरका सहायक प्रमुख जिल्ला अधिकारी गोकर्णप्रसाद उपाध्यायले यहाँको महाकाली पुल योजना, महाकाली सिँचाइ तेस्रो चरण, हुलाकी राजमार्ग, विभिन्न पुल–पुलेसा, कल्भर्ट, सडक तटबन्धलगायतका योजनालाई काम गर्न अनुमति दिइएको जानकारी दिए । ‘निर्माणस्थलमा सामाजिक दूरी, मजदूरको सुरक्षा सतर्कतालगायत विषयमा समेत अनुगमन गरिनेछ’, उनले भने, ‘केही समयअघि क्वारेन्टाइनबाट ल्याएर २९ जना भारतीय मजदूरलाई पनि महाकाली पुलको काममा लगाइएको छ ।’

यता निर्माण व्यवसायीले भने काम गर्ने अनुमति दिए पनि निर्माण सामग्री अभाव रहेको बताएका छन् । ‘बजार नहुँदा कामले गति लिन सक्ने अवस्था छैन’, कञ्चनपुर निर्माण व्यवसायी संघका सचिव योगेन्द्र ठकुराठीले भने, ‘गिट्टी र बालुवाले मात्रै काम हुने कुरो भएन ।’ निर्माण सामग्री बजारमा नहुनुुका साथै भारतीय बजारबाट विगतमा आउने गरेको उनको भनाइ छ । 

‘सरकारले खोले पनि बजारलाई खुकुलो बनाउने विषयमा पनि पहल गर्नुपर्छ’, उनले भने, ‘अहिले ठेकेदारहरु आफूसित स्टक भएको सामान प्रयोग गरेर काम गर्दैछन् ।’

सरकारले लकडाउनका बेला ठूला योजना निर्माणका लागि भौतिक दूरी कायम गर्नुपर्ने, निर्माणमा खटिएका मजदूरको दैनिक नियमित ज्वरो मापन गर्नुपर्ने, सुरक्षा सावधानी अपनाउनुपर्ने र निर्माणस्थलमा एम्बुलेन्स सेवासमेत व्यवस्था गर्नुपर्ने लगायतको मापदण्ड जारी गरेको छ । रासस

प्रतिक्रिया [0]
प्रतिक्रिया दिनुहोस्