ई –पेपर | हाम्रो बारेमा | विज्ञापन | ग्राहक बन्नुहोस | Podcast | NBA
arthik abhiyan
ad banner Mango Tech Digital Marketing Solution

कृषि पकेट क्षेत्रका किसानलाई प्रविधि हस्तान्तरण

२०७७ बैशाख, २४  
कर्णाली प्रदेश
Image Not Found
author avatar विनोद लम्साल

वैशाख २४, वीरेन्द्रनगर । कर्णाली प्रदेश सरकारले चालू आर्थिक वर्षमा अघि बढाइएका कृषि पकेट क्षेत्रहरुमा उपयुक्त प्रविधि वितरण शुरू गरेको छ ।

किसानको उत्पादन वृद्धि गर्न सहयोग पुर्‍याउने उद्देश्यले भूमि व्यवस्था, कृषि तथा सहकारी मन्त्रालय अन्तर्गत कृषि विकास निर्देशनालयले अनुदानमा प्रविधि वितरण गरेको हो । 

प्रदेशका १० ओटै जिल्लामा आवश्यकता अनुसार कृषिसम्बन्धी उपकरण वितरण गर्न शुरू गरिएको बताएको छ । समूहमार्फत व्यावसायिक रूपमा कृषिलाई अघि बढाएका कृषकका लागि कृषि विकास निर्देशनालयको ५० प्रतिशत र बाँकी कृषि समूहको रकमबाट प्रविधि खरीद गरी वितरण गरिएको हो ।

 भूमि व्यवस्था, कृषि तथा सहकारी मन्त्री विमला केसीले प्रदेशमा कोरोनाको महामारीले रोगभन्दा छिटो भोकमरी आउन सक्ने बताइन् । अब हरेक युवा कृषिमा व्यावसायिक हुनुपर्ने उनको भनाइ थियो । मन्त्री केसीले कृषि पेशालाई आधुनिकीकरण गर्दै व्यावसायिक बनाउनुपर्नेमा जोड दिइन् । 

कृषकले उत्पादन गरेको तरकारीको बजारीकरणमा सघाउन आफूहरुले सहजीकरण गरिररहेको र उत्पादनले बजार पाउँदैन कि भन्ने चिन्ता नगर्न पनि उनले आग्रह गरिन् ।

कृषि विकास निर्देशनालयका निर्देशक चित्रबहादुर रोकायाले प्रदेशका १० ओटै कृषि विकास कार्यालयमार्फत कृषकलाई कृषि सामग्रीमा अनुदान तथा सहुलियत प्रदान गरिरहेको बताए । सामग्रीको अनुदान वितरणको काम सामाजिक दूरी कायम गर्दै वितरण गरिएको उनको भनाइ छ ।

निर्देशनालयका अनुसार भेरीगंगा नगरपालिका–४, हर्रेमा रहेको कालिका तरकारी पकेट, गुर्भाकोट नगरपालिका– मेहलकुनास्थित गंगामाला तरकारी ब्लक, वडा नं.९ चिसापानीस्थित माझखण्ड तरकारी पकेट, वडा नं ५ थग्लेनीस्थित प्रगतिशील तरकारी पकेट समितिलाई हाते ट्र्याक्टर, प्लाष्टिक टनेल, स्प्रे, हजारी, पाइप, पानी ट्यांकी, बीउबिजन सहयोग गरिएको छ ।

निर्देशनालयको ५० प्रतिशत अनुदान सहयोग र किसानको ५० प्रतिशत लागत सहभागिता गरी करीब ९० लाख रुपैयाँ बराबरको उपयुक्त प्रविधि हस्तान्तरण गरिएको छ ।
 

प्रतिक्रिया [0]
प्रतिक्रिया दिनुहोस्