ई –पेपर | हाम्रो बारेमा | विज्ञापन | ग्राहक बन्नुहोस | Podcast | NBA
arthik abhiyan
ad banner Mango Tech Digital Marketing Solution

चामल खरीदको टेन्डरमा दोस्रोपटक पनि आवेदन परेन

२०७७ बैशाख, २८  
समाचार
NA

काठमाडौं (अस) । खाद्य व्यवस्था तथा व्यापार कम्पनी लिमिटेडले चामल खरीदका लागि आह्वान गरेको टेन्डरमा दोस्रो पटक पनि आवेदन नपरेपछि पुनः टेन्डर आह्वान गरिने भएको छ । चैत ५ गते गरेको पहिलो टेन्डरमा १ महीनासम्म पनि आवेदन नपरेपछि वैशाख १० गते दोस्रो पटक टेन्डर आह्वान गरिएको थियो । तर दोस्रो पटकमा समेत कुनै पनि आवेदन नपरेपछि अब तेस्रो पटक टेन्डर आह्वान गरिने कम्पनीकी सूचना अधिकारी शर्मिला न्यौपाने सुवेदीले जानकारी दिइन् । उनका अनुसार शुक्रवार बोलपत्र पेश गर्ने अन्तिम दिन थियो । तर अन्तिमसम्म पनि कसैले बोलपत्र पेश नगरेकाले अब तेस्रो पटक टेन्डर गरिने भएको हो । यद्यपि टेन्डर खोल्ने मितिबारे भने अझै टुंगो लागेको छैन ।

कम्पनीका महानिर्देशक नेत्रप्रसाद सुवेदीले दुई पटकसम्म पनि टेन्डर नपर्नुमा लकडाउनपछि सामानको मूल्यमा भएको वृद्धि र ढुवानीमा असहजता नै प्रमुख कारण रहेको बताए । तेस्रो पटक पनि टेन्डर नपरेमा बजारको अध्ययन गरेर टेन्डरको बजेट पुनः इस्टिमेट गरिने उनको भनाइ छ । त्यसपछि पनि टेन्डर नपरेर मौज्दात सकिने स्थिति आएमा कम्पनीकै खरीद केन्द्रहरूलाई ५÷५ लाखको चामल खरीदको जिम्मा दिन सकिने उनले बताए । तर तत्काल यसबारे आफूले नसोचेको जानकारी उनले दिए । आफूसँग भएको खाद्यान्नको मौज्दात घट्न थालेपछि कम्पनीले १० हजार टन चामल खरीदका लागि टेन्डर आह्वान गरेको थियो । ‘लकडाउनअघि कम्पनीसँग २३ हजार टन चामल मौज्दात रहेकोमा १८ हजार टन अझै बाँकी रहेकोले अहिले नै आत्तिहाल्नुपर्ने स्थिति छैन,’ उनले भने । हाल कम्पनीसँग चामलसँगै, मुसुरो, रहर र केराउको दाल १५ क्वीन्टल, फापर ६ सय क्वीन्टल र कर्णालीको सिमी ५०० क्वीन्टल मौज्दात रहेको छ ।

प्रतिक्रिया [0]
प्रतिक्रिया दिनुहोस्