ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

एक दशकयता पहिलो पटक घट्दै विश्वको तेल माग

२०७६ फागुन, १  
अन्तरराष्ट्रिय
Image Not Found

फागुन १, पेरिस (फ्रान्स) । विश्वमा तेलको माग घट्ने अनुमान गरिएको छ । 

अन्तरराष्ट्रिय ऊर्जा निकाय (आईईए)का अनुसार गत वर्षको सोही अवधिको तुलनामा सन् २०१९ को जनवरी–मार्च त्रैमासमा तेलको माग दैनिक ४ लाख ३५ हजार ब्यारेलले घट्ने छ । 

पहिलो त्रैमासमा तेलको मागमा आउने भनिएको यो कमी एक दशकभन्दा लामो समययता पहिलो हुने मासिक प्रतिवेदनमा आईईएले बताएको छ । नयाँ कोरोना भाइरसको महामारीका कारण चीनमा आर्थिक गतिविधि सुस्ताएको छ । यसले गर्दा त्यहाँबाट हुने तेलको माग प्रभावित भएको छ । 

एजेन्सीले सन् २०२० को तेलको वृद्धि प्रक्षेपण पनि घटाएको छ । उसका अनुसार यस वर्ष विश्वको तेल माग दैनिक ८ लाख २५ हजार ब्यारेल रहने छ । यो सन् २०११ यताकै न्यून हो । यस अघि गरिएको प्रक्षेपणको तुलनामा यो दैनिक ३ लाख ६५ हजार कम हो । 

आर्थिक विकास तथा सहयोगका लागि संगठन (ओइसीडी)मा आबद्ध देशहरुको खपत अपेक्षा गरेभन्दा कम रहेपछि सन् २०१९ को वृद्धि प्रक्षेपण समेत ओईसीडीले घटाएर दैनिक ८ लाख ८५ हजार ब्यारेलमा झारेको छ । 

कोरोना भाइरसका कारण विश्वभर ५९ हजार संक्रमित भएको र १ हजार ३०० भन्दा धेरैको मृत्यु भइसकेको समयमा एजेन्सीले प्रक्षेपण कटौती गरेको छ । कोरोना भाइरसले विश्व बजारमा लगानीकर्ताको मनोबल खस्काइरहेको छ । यसले चीनको आर्थिक गतिविधि समेत घटाइरहेको छ । 

भाइरसको महामारीका कारण त्यहाँ कारखाना र व्यवसाय बन्द छन् । यात्रामा प्रतिबन्ध लगाइएको छ । भाइरसको महामारीले अन्यत्र समेत आर्थिक मञ्च र व्यावसायिक सम्मेलनहरु प्रभावित भएका छन् ।

भाइरसले तेलको मागमा परेको नकारात्मक प्रभावका कारण जनवरीमा मात्रै ब्रेन्ट क्रुडको भाउ प्रतिब्यारेल १० डलरले घटी ५५ डलरमा आएको थियो । 

पेट्रोलियम निर्यातकर्ता देशहरुको संगठन र संगठन बाहिरका रुसलगायत प्रमुख तेल उत्पादकहरुले बजारमा सन्तुलन ल्याउन कच्चा तेलको उत्पादन घटाउने अपेक्षामा यस हप्ता तेलको भाउले टेवा पाएको थियो । 

तर एजेन्सीको माग प्रक्षेपण ‘बियरिस’ रहेपछि बिहीवार बजार दबाबमा आएको छ । लन्डनस्थित आईसीईको कोमेक्स डिभिजनमा बिहानी कारोबारमा ब्रेन्ट क्रुडको भाउ प्रतिब्यारेल ६५ सेन्टले घटी ५५ डलर १४ सेन्टमा आएको थियो । 

सोही समयमा न्यूयोर्क मर्कन्टाइल एक्सचेञ्जको कोमेक्स डिभिजनमा वेष्ट टेक्सास इन्टरमिडियट (डब्ल्यूटीआई)को भाउ पनि ३९ सेन्टले घटेर ५० डलर ७८ सेन्टमा आएको थियो । 

यो समाचार तयार पार्दाखेरि नेपाली समयअनुसार साँझ ४ः१५ बजे ब्रेन्टको भाउ २ दशमलव १६ प्रतिशतले घटेर ५५ डलर ४९ सेन्टमा आएको थियो । सोही समयमा डब्ल्यूटीआईको भाउ पनि १ दशमलव ७७ प्रतिशतको कमीसहित प्रतिब्यारेल ५० डलर ७५ सेन्टमा आएको थियो । एजेन्सी
 

प्रतिक्रिया [0]
प्रतिक्रिया दिनुहोस्