ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

ट्राफिक व्यवस्थापनसम्बन्धी अन्तरक्रिया

२०७६ फागुन, २  
बजार
NA
author avatar अभियान संवाददाता

चितवन । उद्योग वाणिज्य संघ चितवनले जिल्लाका विभिन्न स्थानमा ट्राफिक व्यवस्थापनसम्बन्धी अन्तरक्रिया कार्यक्रम आयोजना गरेको छ । भरतपुर महानगरपालिकाअन्तर्गत पुल्चोकबाट लायन्स चोक, पुल्चोकबाट पोखरा बसपार्क र महानगरका व्यावसायिक स्थान र राजमार्गमा यस्तो कार्यक्रम गरेको संघले जानकारी दिएको छ । 

कार्यक्रममा ट्राफिकसम्बन्धी विषयमा छलफल तथा अन्तरक्रिया गरिएको उद्योग वाणिज्य संघ–चितवनका अध्यक्ष राजु श्रेष्ठले बताए । महानगरभित्रका ट्राफिक समस्याका कारण व्यवसायमा असर परेकाले समस्या समाधानको उपाय खोजी गर्न अन्तरक्रिया कार्यक्रम गरिएको उनको भनाइ छ । 

जिल्लाको व्यावसायिक केन्द्रको रूपमा रहेका पुल्चोक, मेनरोड, लायन्सचोक र भरतपुर महानगर क्षेत्रका विभिन्न व्यावसायिक स्थलमा भएको पार्किङ एवं ट्राफिक समस्याका कारण व्यवसायमा नकारात्मक असर परेको श्रेष्ठले बताए । सवारी साधनको संख्या वृद्धि, सर्वसाधारणको बाक्लो चहलपहल र ट्राफिक व्यवस्थापनका आवश्यक पूर्वाधार नहुँदा बजार क्षेत्रमा समस्या सिर्जना भएको उनको भनाइ छ । 

कार्यक्रममा जिल्ला ट्राफिक प्रहरी कार्यालयका प्रमुख दयाकृष्ण भट्टले नारायणगढ क्षेत्र नेपालकै केन्द्रविन्दु भएको र राजमार्गको लाइफलाइन पर्ने हुनाले समस्या समाधान गर्न सम्पूर्ण सरोकारवाला सक्रिय हुनुपर्ने बताए । ट्राफिक प्रहरीमा भएको जनशक्तिको अभावले पनि ट्राफिक व्यवस्थापनमा जटिलता आएको उनको भनाइ छ । 

कार्यक्रममा संघका निवर्तमान अध्यक्ष सहनलाल प्रधानले समस्या समाधानका लागि दीर्घकालीन सोचसहितको दृष्टिकोण तयार गर्नुपर्नेमा जोड दिए । यस्तै संघका वरिष्ठ उपाध्यक्ष चुननारायण श्रेष्ठ, उपाध्यक्ष भोजराज कौडाल, कासस अशोक अधिकारी, श्रीगणेश टोल विकास समितिका अध्यक्ष सिद्धार्थलाल चुके, उपाध्यक्ष बालगोपाल चुके, संगमटोल विकास संस्थाका अध्यक्ष रामहरि श्रेष्ठ लगायतले बजार क्षेत्रमा देखिएका ट्राफिक व्यवस्थापनको समस्या समाधान गर्न सरोकारवाला निकायले चाँडो काम थाल्नुपर्नेमा जोड दिएका छन् । 

उक्त क्षेत्रको स्थलगत अवलोकन गरी ट्राफिक समस्या समाधानका लागि आवश्यक अध्ययन गर्न संघका अध्यक्ष राजु श्रेष्ठको संयोजकत्वमा सरोकारवाला संघ/संस्था र निकायमा आबद्ध व्यक्ति संलग्न १३ सदस्यीय अध्ययन समिति गठन गरिएको उद्योग वाणिज्य संघ–चितवनका कार्यक्रम अधिकृत निलबहादुर केसीले जानकारी दिए । समितिमा जिल्ला ट्राफिक प्रहरी कार्यालय चितवन, भरतपुर महानगरपालिका, सडक विभाग, टोल विकास संस्थाका प्रतिनिधि सम्मिलित छन् ।

प्रतिक्रिया [0]
प्रतिक्रिया दिनुहोस्