ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

पहिलो ६ महीनामा वाणिज्य बैंकको नाफा ८ प्रतिशत बढ्यो

२०७६ फागुन, २  
समाचार
Image Not Found
author avatar ममता थापा

काठमाडौं । सञ्चालन खर्च बढ्दा तथा स्प्रेड दरका कारण वाणिज्य बैंकको नाफा चालू आर्थिक वर्षकोे पहिलो ६ महीनामा खस्किएको छ । गत आवको दोस्रो त्रैमासमा २५ प्रतिशत रहेको बैंकको नाफा वृद्धिदर यस आवको सोही अवधिमा मात्र ८ दशमलव ७५ प्रतिशत रहन पुगेको छ । 

यस आवको दोस्रो त्रैमाससम्म मुलुकका २७ वाणिज्य बैंकले रू. ३२ अर्ब ७५ करोड कुल नाफा गरेका छन् । गत आवको सोही अवधिमा यो नाफा रू. ३० अर्ब ११ करोड थियो । 

यस वर्ष बढी नाफा कमाउने बैंकको पहिलो पाँच सूचीमा राष्ट्रिय वाणिज्य बैंक, नबिल बैक, एनआईसी एशिया बैंक, हिमालयन बैंक र ग्लोबल आईएमई बैंक रहेका छन् । यस अवधिमा राष्ट्रिय वाणिज्य बैंकले रू. २ अर्ब २० करोड नाफा कमाएको छ भने नबिलले  रू. २ अर्ब ४ करोड कमाएको छ । तर, यी दुवै बैंकको नाफा गत आवको भन्दा कम छ । राष्ट्रिय वाणिज्य बैंकको नाफा ८ दशमलव ३१ प्रतिशत र नबिलको ६ दशमलव २ प्रतिशत घटेको छ ।

तर, तेस्रो स्थानमा रहेको एनआईसी एशियाले रू. २ अर्ब १ करोड ६२ लाख नाफा कमाएको छ, यो गत आवको भन्दा ३३ दशमलव ३९ प्रतिशत बढी हो । त्यसैगरी, चौथो स्थानमा रहेको हिमालयन बैंकले १ अर्ब ७४ करोड नाफा कमाएको छ । यस्तै, चुक्तापूँजीका आधारमा नेपालकै ठूलो ग्लोबल आईएमई बैंकले रू. १ अर्ब ६८ करोड नाफा कमाएको छ । 

दोस्रो त्रैमासमा १६ बैंकको नाफा रू. १ अर्बभन्दा माथि छ भने ३ बैंकको नाफा रू. २ अर्बभन्दा बढी छ ।

घट्यो आठ बैंकको नाफा 
चालू आवको ६ महीनाको वित्तीय विवरण अनुसार ८ बैंकको नाफा घटेको छ । तथ्यांक अनुसार नेपाल बैंकको १८ दशमलव शून्य ६  प्रतिशत (चालू आव रू. १ अर्ब ३५ करोड र गत आव १ अर्ब ६६ करोड), सिद्धार्थ बैंकको ४ दशमलव शून्य १ प्रतिशत (चालू आव रू. १ अर्ब २ करोड र गत आव १ अर्ब ६ करोड) र सिटिजन बैंकको १० दशमलव ७२ प्रतिशत (चालू आव रू. ६८ करोड ७७ लाख र गत आव ७७ करोड) ले नाफा घटेको छ । यसैगरी, नेपाल इन्भेस्टमेन्ट बैंकको नाफा १५ दशमलव ६६ प्रतिशत, सिभिलको १४ दशमलव ७५ प्रतिशत, नबिलको ६ दशमलव २ प्रतिशत र एसबीआईको २ दशमलव १५ प्रतिशत नाफा घटेको छ । नाफा कमाउनेमा उत्कृष्ट पहिलो रहेको राष्ट्रिय वाणिज्य बैंकको पनि नाफा भने घटेको छ ।

यसअघि चालू आवको पहिलो त्रैमासमा वाणिज्य बैंकहरूको नाफा ६ दशमलव २५ प्रतिशत बढेको थियो । नेपालका २८ वाणिज्य बैंकहरूको पहिलो ३ महीनाको नाफा रू. १६ अर्ब १७ करोड ६० लाख थियो, जुन गत आवको सोही अवधिमा रू. १५ अर्ब २२ करोड ३६ लाख थियो । 

पछिल्लो समय बैंकको नाफा वृद्धिदरप्रति बैंकरहरू सन्तुष्ट छैनन् । विगतका वर्षमा बैंकहरूको नाफा दोहोरो अंकको प्रतिशतमा वृद्धि हुने गरेको थियो । तर,  चालू आवको सुरुवातदेखि बैंकको नाफा खुम्चिँदै गएको  छ । लगानीको तुलनामा बैंकको नाफा वृद्धि गर्न नसकेको नेपाल बैंकर्स संघका पूर्वअध्यक्ष नेपाल बंगलादेशका प्रमुख कार्यकारी अधिकृत ज्ञानेन्द्रप्रसाद ढुंगाना स्वीकार गर्छन् । 

ढुंगानाका अनुसार वाणिज्य बैंकहरूले करीब २७ खर्ब रुपैयाँ लगानी गरी रू. ३२ अर्बको हाराहारीमा नाफा गर्नु सन्तोषजनक होइन । पछिल्लो समय बैंकहरूलाई केन्द्रीय बैंकले ४ दशमलव ४ प्रतिशतको कर्जा निक्षेप अनुपात (स्प्रेडदर)लाई बाध्यकारी बनाउनु नै नाफा घट्नुको मुख्य कारण बन्न थालेको उनको तर्क छ । बैंकहरूले सम्पत्ति शुद्धीकरण निवारण गर्न तथा आतंकवादी क्रियाकलापमा हुने वित्तीय लगानी रोक्न अनुपालनमा कडाइ गरेपछि पनि नाफामा कमी आएको उनको अनुमान छ ।  

सनराइज बैंकका सीईओ जनक शर्मा पौड्याल अहिले नयाँ व्यावसायिक कर्जाको माग घटेकाले बैंकहरूको नाफामा प्रभाव परेको बताउँछन् ।

प्रतिक्रिया [0]
प्रतिक्रिया दिनुहोस्