ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

‘असारमा मेलम्चीको पानी काठमाडौंमा आइपुग्छ’

रू. २८ अर्ब खर्च, प्रगति ८९.७ प्रतिशत

२०७६ फागुन, २  
समाचार
Image Not Found
author avatar हिमा वि.क.

काठमाडौं । आगामी असारसम्ममा मेलम्चीको पानी काठमाडौंमा झार्ने दाबी सरकारले गरेको छ । मेलम्चीको पानी काठमाडौंमा ल्याउने मिति पटक–पटक परिवर्तन गर्दै आएको सरकारले आयोजनाका जटिल कामहरू सम्पन्न भइसकेको र अन्य कार्यहरू पनि तीव्ररूपमा भइरहेकाले असारसम्ममा सुन्दरीजलमा पानी खसाल्ने दाबी गरेको हो । 

खानेपानीमन्त्री विना मगरले बिहीवार मेलम्ची खानेपानी आयोजनाको श्वेतपत्र जारी गर्दै हाल आयोजनामा भइरहेका कामको आधारमार्फत मिति तोकिएको दाबी गरिन् । मन्त्रीको दाबीअनुसार अबको ५ महीनामा मेलम्चीको पानी काठमाडौं उपत्यकामा आउनेछ । तोकिएको समयमा आयोजना सम्पन्न नहुँदा हालसम्म निराशामात्रै प्राप्त भएको भन्दै मगरले भनिन्, ‘अब यस्तो नहोस् भन्नका लागि समयतालिका अनुसार नै काम गरेको हुँदा सोही समयमा काठमाडौं उपत्यकामा पानी आउनेछ ।’

सरकारले गत असोज ११ र २४ गते सिनोहाइड्रो कम्पनीसँग आयोजनाको बाँकी रहेको सुरुङ र हेडवक्र्स क्रमशः १२ र १५ महीनामा निर्माण सम्पन्न गर्नेगरी सम्झौता गरेको थियो । सम्झौता अनुसार कम्पनीले काम गर्ने हो भने असारसम्ममा पानी आउने सम्भावना कम देखिन्छ । सरकारले सम्झौता अवधिभन्दा अघि नै काम सम्पन्न गरे ठेक्काको १० प्रतिशत बोनस दिने नीति लिएको र ठेक्का पाएको कम्पनी बढी अनुभवी भएको हुँदा समयभन्दा अघि नै काम सम्पन्न हुने मेलम्ची खानेपानी विकास समितिका कार्यकारी निर्देशक तिरेशप्रसाद खत्रीले जानकारी दिए ।

श्वेतपत्र प्रस्तुत गर्दै खत्रीले भने, ‘यसअघि कम्पनी तथा कामदारका कारण निर्माणमा ढिलाइ हुँदै आएको थियो, अहिले त्यस्तो समस्या छैन र कम्पनीले दु्रतगतिमा निर्माण गरेको छ ।’ अहिले हेडवक्र्स निर्माण ३५ प्रतिशत सम्पन्न भइरहेको भन्दै खत्रीले फागुन मसान्तसम्ममा कफर ड्याम (अस्थायी बाँध)को निर्माण ४० प्रतिशत सम्पन्न गर्ने लक्ष्य रहेको बताए । 

मन्त्री मगरले हालसम्म मुलुकभर २२ प्रतिशतमात्र प्रशोधित पानीको प्रयोग हुँदै आएको बताइन् । मेलम्चीको पानी उपत्यकामा आएपछि यो दरमा उल्लेख्य वृद्धि हुने विश्वास उनले व्यक्त गरिन् । श्वेतपत्रमा चालू आर्थिक वर्षभित्रै काठमाडौं उपत्यकामा १७ करोड लिटर खानीपानी आपूर्ति हुने उल्लेख गरिएको छ । सुरुङ निर्माण कम्पनी सीएमसीसँग ठेक्का तोडेपछि अहिले उक्त आयोजनाको सुरुङ तथा हेडवर्क्स(नदीमा बाँध बाधेर सुरुङमा पानी ल्याउने प्रक्रिया) सिनोहाइड्रो कम्पनीमार्फत भइरहेको छ ।

सिनोभन्दा पहिलाको ठेकेदार कम्पनी सीएमसीले काम छाडेर गएपछि मेलम्चीमा अन्योल बढेको थियो । कम्पनीसँग आबद्ध श्रमिकहरूको आन्दोलनका कारण पनि काम ठप्प भएको थियो । सरकारले ती श्रमिकलाई रू. २ करोड ९६ लाख ज्याला भुक्तानी दिएपछि भने आयोजना निर्माण अघि बढिरहेको छ । सीएमसी कम्पनीसँग आबद्ध स्थानीय आपूर्तिकर्ताले भने अझै भुक्तानी पाएका छैनन् । उनीहरूले झन्डै रू. २ अर्ब भुक्तानी दाबी गरेका छन् भने त्यसको यकिन गर्न सरकारले गत असोजमा खानेपानी मन्त्रालयका सहसचिवको संयोजकत्वमा अध्ययन टोली गठन गरेको थियो । उक्त दाबी भुक्तानीको काम छिट्टै सम्पन्न हुने मन्त्रालयले उल्लेख गरेको छ । 

समितिका प्रवक्ता राजेन्द्र पन्तले सुरुङको बाँकी काम गर्न रू. ८५ करोड र हेडवर्क्स बनाउन रू. १ अर्ब २ करोडमा उक्त कम्पनीलाई ठेक्का दिइएको बताए । उनका अनुसार सुरुङ र हेडवक्र्समा कुल ३१ ओटा गेट तथा फ्रेम जडान गर्नुपर्नेछ । केही गेट तथा फ्रेम जडानको कार्य भइसकेको छ । यसैगरी अन्य गेटहरू बनिसकेको र जडान गर्न बाँकी रहेकाले अन्य पूर्वाधार तोकिएको समयभन्दा अघि बन्न सक्ने पर्याप्त आधार रहेको उनको दाबी छ । अहिले अधिकांश चिनियाँ कामदारहरू पनि साइटमै रहेको उनले बताए ।

श्वेतपत्रमा आयोजना कार्यान्वयनको परिमार्जित तालिका पनि उल्लेख गरिएको छ । सोहीअनुसार चालू आर्थिक वर्षमा कफरड्याम निर्माण तथा वैकल्पिक पाइप डाइभर्शन सञ्चालन, १४ ओटा गेट जडान, मुख्य सुरुङको फिनिसिङ, भेन्ट साफ्ट जडान, अडिट सुरुङमा अनुगमन उपकरण जडान, सुरुङको परीक्षण तथा सञ्चालन हुने उल्लेख गरिएको छ । 

आयोजनाको प्रमुख संरचनामा मुख्य डाइभर्शन सुरुङमा अडिट, फ्लसिङ १ दशमलव ६१ किमी र मुख्य सुरूङ २५ दशमलव ९२ किमीको छ । पहिलो चरणमा ८ दशमलव ५ करोड लिटर र दोस्रो चरणमा थप सोही क्षमता बराबरकै पानी प्रशोधन केन्द्र निर्माण गरिनेछ । आयोजनामा ६८ किलोमिटर प्रवेशमार्ग स्तरोन्नति गरिएको छ । आयोजनाका लागि हालसम्म रू. २८ अर्ब १३ करोड खर्च भइसकेको छ भने समग्र आयोजनाको प्रगति ८९ दशमलव ७० प्रतिशत रहेको छ । 

प्रतिक्रिया [0]
प्रतिक्रिया दिनुहोस्